Read CHUYA QELLQA La Biblia en Quechua de Ayacucho 2012 Hechos 24 Bible Online

Hechos 24 - CHUYA QELLQA La Biblia en Quechua de Ayacucho 2012 bible

Hechos 24

¹Pichqa punchawmantam Sumo sacerdote Ananías chayaramurqa Tértulo sutiyuq abogadontin hinaspa wakin kamachikuqkunapiwan. Hinaspam Pablota acusanankupaq prefecto Felixman anchuykurqaku.

²Chaymi Pablota pusaykaramuptinku abogado Tértulo acusaspan kaynata nirqa: Gobernador Félix, gracias qanman kachun, qamraykum hawkayaypi kach-kaniku, yachaywan kamachikupti-kim nacionniykupi tukuy imakunapas ruwasqa karqa.

³Ancha reqsisqa gobernador Félix, llaqtaykupi tukuy chaykuna ruwasqaykimantam llapallayku ancha-anchata agradecekuykiku.

⁴Ichaqa manam tiempoyki pierdechiyta munanikuchu, chayraykum ruegakuyki asllapi uyariykuwanaykikupaq.

⁵Kay Pabloqa peste onqoy hinam. Tukuy hinastinpim judiokunata rakinamuchkan, payqa nazareno partidopa cabecillanmi.

⁶Temploykutapas millakuypaqtam ruwayta munarqa, chayraykum hapirurqaniku [5][leyniykuman hina juzganaykupaq.

⁷Ichaqa comandante Lisiasmi hamuruspan maqapawaspanku Pablota qechuruwarqaku.

⁸Hinaspam kamachiwarqaku qayllaykipiña Pablota acusanaykupaq]. Chaynaqa, kikikiyá tapuykuy acusasqaykuqa cheqap kasqanta yachaykunaykipaq, nispa.

⁹Chaynata Tértulo rimaruptinmi chaypi kaq judiokunapas nirqaku: Arí, tukuy kaykunaqa cheqappunim, nispanku.

¹⁰Chaymi gobernador Felixqa Pablota señascharqa rimarikunanpaq. Hinaptinmi Pabloqa kaynata nirqa: Qanmi kay nacionpi unay wataña juez kachkanki, chaymi ñawpaqnikipi imam kaqta kunan rimarikusaq.

¹¹Yaqa chunka iskayniyuq punchawllaraqmi Diosta yupaychanaypaq Jerusalén llaqtaman chayarqani. Chaymanta yachaykuyta munaspaykiqa tapukachakuykuyá.

¹²Ño-qaqa manam templopipas, sinagogapipas hinaspa callekunapipas piwanpas atipanakurqanichu, nitaqmi chaqwatapas hatarichirqanichu. Manataqmi chayna ruwachkaqtachu ñoqataqa tariwarqaku.

¹³Acusawasqankumantaqa manam paykunaqa pruebasunkimanchu.

¹⁴Ichaqa manam negakunichu, ñawpaq taytaykunapa Diosnintam yupaychani musoq yachachikuyman hina, chaytam paykuna ninku: “Rakinachiq partidom” nispanku. Ñoqaqa creenim Moisespa hinaspa profetakunapa lliw qellqasqanta.

¹⁵Ñoqapas paykuna hinam Diospi suyachkani allin runakunatawan mana allin runakunata hamuq punchawpi Dios kawsarichimunanta.

¹⁶Chayraykum Diospa qayllanpipas hinaspa runakunapa qayllanpipas concienciaypa mana acusasqan kawsakuyta munani.

¹⁷Unay watakunamantañam nacionniyman kutirqani wakcha judiokuna yanapanaypaq qollqeta apaspay chaynataq Diosmanpas ofrendaykunata qonaypaq.

¹⁸Chayta ruwachkaptiymi Asia lawmanta hamuq judiokuna, templopi rikuruwarqaku. Chay ratopiqa costumbreykuman hinam chuyanchakuspay kachkarqani, ichaqa manam chaqwata ruwaspaychu nitaq achka runakunawanchu.

¹⁹Sichum contraypi imapas kaptinqa Asia lawmanta hamuq judiokunachiki kayman hamuspa acusawanmanku.

²⁰Mana chayqa kaypi kaqkunayá rimarichunku, cortepi juzgawaspanku ima mana allintam ñoqapi tarisqankuta.

²¹Paykunapa qayllanpi kachkaspayqa kayllatam rimarurqani: “Wañuqkunata Dios kawsarichinanmanta yachachisqayraykum juzgawachkankichik”, nispay.

²²Pablopa nisqanta gobernador Félix uyariykuspanmi Jesucristomanta yacha-chikuyta allinta yachasqanrayku nirqa: Soldadokunapa kamachiqnin Lisias hamuptinñam kay asuntomanta allinta yachasaq, nispa.

²³Hinaspanmi capitanninta kamachirqa: Pablota ama kacharispa cuidaychik, ichaqa amam harkakunkichikchu pipas watukamuspan yanapanantaqa, nispan.

²⁴Punchawkuna pasaruptinmi, gobernador Felixqa judío castamanta warmin Drusilapiwan palacionman rispan, Pablota qayachimurqa Jesucristoman iñikuymanta willananpaq.

²⁵Ichaqa runapa allin ruwananmanta, controlakuy yachaq kanamanta hinaspa llapallan runakunaqa Diospa juzgasqan kananmanta Pablo rimaruptinmi, gobernador Félix mancharikuspan nirqa: Pasakuyña, tiempoy kaptinñam qayachimusqayki, nispan.

²⁶Kachaykunanpaq qollqe qonanta munaspanmi achka kutita qayachimuq paywan parlananpaq.

²⁷Iskay wata pasaruptinmi, gobernador kayninmanta Félix lloqsikurqa, hinaptinmi paypa rantinpi Porcio Festoña yaykurqa. Felixmi judiokunawan kuyachikuyta munaspan Pablota hina presollata saqerurqa.