Read CHUYA QELLQA La Biblia en Quechua de Ayacucho 2012 Hechos 26 Bible Online

Hechos 26 - CHUYA QELLQA La Biblia en Quechua de Ayacucho 2012 bible

Hechos 26

¹Chaymi Pablota Agripa nirqa: Kikikimantayá rimarikuy, nispa. Hinaptinmi Pabloqa makinwan señaschaspa kaynata nirqa:

²Reynilláy Agripa, llapa judiokuna tukuy acusawasqanmanta qampa qayllaykipi rimarikunaypaq kaspaymi kusikuni.

³Qamqa yachankim judiokunapa llapallan costumbrentapas chaynataq atipanakusqankutapas, chayraykum aswanraq kusikuni, qamtam mañakuyki pacienciawan uyariykuwanaykipaq.

⁴Lliw judiokunam yachanku imaynam warma kasqaymantaraq llaqtaypipas hinaspa Jerusalén llaqtapipas kawsasqaytaqa.

⁵Munaspankuqa willakunmankum ñoqaqa unayña fariseo kasqayta. Yachasqaykichikpi hinam wakin judiokunamantapas fariseokunaqa leykunata allinta kasukuniku.

⁶Kunanñataqmi ñawpaq taytanchikkunaman Diospa promesan suyasqayrayku juzgasqa kachkani.

⁷Chay promesapa cumplikunantam Israelpa mirayninmanta kaq chunka iskayniyuq ayllukunapas, tukuy sonqonkuwan Diosta tuta punchaw yupaychaspanku suyachkanku. Reynilláy Agripa, chay promesa suyasqayraykum judiokuna acusawachkanku.

⁸¿Imanasqataq qamkuna mana creenkichikchu wañuqkunata Dios kawsarichimunanta?

⁹Ñawpaqtaqa kikiypunim piensar-qani Nazaretmanta kaq Jesuspa contranpi tukuy mana allinkuna ruwayta.

¹⁰Chaynatam ruwarqani Jerusalén llaqtapipas. Sacerdotekunapa kamachiqninkuna autorizawaptinmi achka iñiqkunata carcelarqani. Wañuchiptinkupas “allinmi” niqmi kani.

¹¹Jesucristota neganankupaqmi ñakarichirqani. Chaynatam llapa sinagogapipas ruwarqani, paykunapaq llumpayta piñakuspaymi ñakarichinaypaq huklaw llaqtakunapipas maskamurqani.

¹²Chaykuna ruwamunaypaqmi sacer-dotekunapa kamachiqninkuna auto-rizawaptin Damasco llaqtaman rirqani.

¹³Reynilláy, chawpi punchawta richkaspayñataqmi intimantapas aswan kancharichkaq achkiyta rikururqani. Hinaptinmi chay achkiyqa riqmasiykunatawan kanchariykuwarqaku.

¹⁴Chaymi lliwchayku pampaman wichiykurqaniku, hinaptinmi uyarirqani hebreo rimayniykupi kayna niqta: “¡Saulo, Saulo! ¿Imanasqataq qatikachawanki? Puyata toro haytachkaq hinam kikillayki nanachikuchkanki”, nispa.

¹⁵Chaymi nirqani: “¿Pitaq kanki Señor?” nispay. Hinaptinmi Señorñataq niwarqa: “Ño-qaqa qatikachawasqayki Jesusmi kani.

¹⁶Chaynaqa, hatariyá, serviqniy kanay-kipaq akllakunaypaqmi rikurirqayki, kunan rikusqaykimantawan qepa pun-chawkunapi qawachisqaymanta willaku-naykipaq.

¹⁷Ñoqam judiokunamantapas chaynataq mana judiokunamantapas waqaychasqayki, paykunamanmi kunan kachayki,

¹⁸rispayki ñawinkuta kicha-muptiki tutayaymanta achkiyman tikra-kuspanku Satanaspa munasqanta amaña ruwaspa Diostaña kasukunankupaq, chaynapi ñoqaman iñiptinku huchankuta Dios pampachaptin, paykunapas Diospa akllasqankunawan kuska herenciata chaskinankupaq”, nispa.

¹⁹Chaynapim reynilláy Agripa, Diospa visionpi nimuwasqanta uyarispay kasukurqani,

²⁰chaymi Damasco llaqtapi puntata willakurqani, hinaspañataq Jerusalén llaqtapi, lliw Judea lawpi kaqkunamanpas chaynataq mana judío kaqkunamanpas. Paykunatam nirqani: “Huchaykichikmanta wanakuspaykichik Diosman kutirikuychik hinaspa imatapas allin kaqkunataña ruwaychik wanakusqaykichikta qawanankupaq”, nispay.

²¹Chaynata willakusqayraykum llapa judiokuna templopi hapiruwaspanku wañurachiwayta munarqaku.

²²Ichaqa Dios yanapawaptinmi kunankamapas hatunmanpas taksamanpas hina kaqllata willakuchkani. Manam ñoqaqa huktachu rimachkani aswanqa profetakunapa chaynataq Moisespa nisqallantam. Paykunam ñawpaqmantaraq nirqaku:

²³“Cristom ñakarispa wañunqa, wañuqkunamantam puntata kawsarimunqa hinaspam allin noticiata willakunqa judiokunaman hinaspa mana judiokunamanpas”, nispanku.

²⁴Chaynata Pablo rimarikuptinmi Festoñataq qaparirqa: ¡Pablo locoyarunkim, llumpay yachaynikim locoyarachisunki! nispa.

²⁵Pabloñataqmi nirqa: Allinpaq qawasqa Festo, manam locoyanichu, yachaywanmi cheqapllata rimachkani.

²⁶Rey Agripaqa yachanpunim tukuy kaykunataqa, chaymi paypa ñawpaqninpiqa cheqapta rimani. Sumaqtam yachan tukuy kaykunataqa, chaykunaqa manam pakasqallapichu pasakurqa.

²⁷Reynilláy Agripa, ¿creenkichum profetakunapa willakusqanta? Arí, qamqa creenkim, nispa.

²⁸Agripañataqmi nirqa: Asllamantam yaqalla Cristoman iñirachiwanki, nispa.

²⁹Hinaptinmi Pablo nirqa: Asllamanta otaq achkamanta kaspapas Diosyá munachun ama qamllachu, aswanqa kaypi lliw uyariqniykunapas Cristoman ñoqa hina iñikunaykichikta, ichaqa amayá ñoqa hina cadenasqachu, nispa.

³⁰Chayta Pablo rimaruptinmi rey Agripa sayarirurqa, sayarirqakutaqmi gobernador Festopas, Berenicepas hinaspa chaypi lliw tiyaqkunapas.

³¹Huklawman asurikuspankuñataqmi ninakurqaku: Kay runaqa manam imatapas ruwasqachu wañunanpaq hinaqa, manataqmi presopas kanmanchu, nispanku.

³²Hinaptinmi Festota Agripa nirqa: Emperador César juzgananpaq Pablo-puni mana mañakuptinqa kachaykuchwanmi karqa, nispa.