Read CHUYA QELLQA La Biblia en Quechua de Ayacucho 2012 Hechos 27 Bible Online

Hechos 27 - CHUYA QELLQA La Biblia en Quechua de Ayacucho 2012 bible

Hechos 27

¹Italia lawmanmi barcopi pusachiwanankupaq rimanakururqaku, hinaspam Pablotawan wakin presokunata Augusto sutiyuq tropakunapa capitannin Julioman entregaykuwarqaku.

²Adramitio llaqtamanta barco Asia lawpi llaqtakunaman pasananpaq kaptinmi chay barcopi rirqaniku. Ñoqaykuwantaqmi rirqa Macedonia lawpi Tesalónica llaqtayuq Aristarcopas.

³Paqarinnintin punchawñataqmi Sidón llaqtaman chayarqaniku. Hinaptinmi Capitán Julioqa Pablota kuyapayasqanrayku, Pablopa reqsinakusqankuna watukamuspanku imallapipas yanapaykunankuta mana harkakurqachu.

⁴Sidón llaqtamanta pasaspaykum, contraykupi wayramusqanrayku Chipre islapa alleq lawninta rirqaniku.

⁵Cilicia lawpa hinaspa Panfilia lawpa chimpanta rispaykum Licia lawpi Mira llaqtaman chayarurqaniku.

⁶Chaypim soldadokunapa capitannin tarirurqa Alejandría llaqtamanta hamuspa Italia lawman riq barcota. Chaymanmi pusaykuwarqaku Italiakama apawanankupaq.

⁷Achka punchawmi allillamanta rirqaniku, hinaspaykum Gnido islapa chimpanman ñakayta chayarurqaniku. Contraykupi hinalla wayramuptinmi Salmón llaqtapa chimpanta pasaruspayku Creta islata muyurqaniku.

⁸Sasallataña chay islapa waqtanta rispaykum, Lasea llaqtapa hichpanpi “Buenos Puertos” nisqankuman chayarurqaniku.

⁹Llumpaytaña unaruptiykum, ayuno fiesta pasaruptin lamar qochanta rinapaq llumpay sasaña kasqanrayku Pablo nirqa:

¹⁰Taytakuna, kay illasqanchikpiqa llumpay sasallañam kanqa, barcopas cargantinmi chinkakuykunqa, hinaptinmi ñoqanchikpas wañuypa patanpiña kasunchik, nispa.

¹¹Soldadokunapa capitanninñataqmi Pablopa nisqanta mana uyarispan barco manejaqpa hinaspa dueñonpa nisqanta kasukurqa.

¹²Para tiempo kasqanrayku barcopa samananpaq mana allin kaptinmi, yaqa lliwchanku tanteanakurqaku chay sitiomanta lloqsispa Fenice llaqtaman imanaypas chayaypi rinankupaq. Fenice llaqtaqa Africa lawtawan Grecia lawtam qawachkan, chaypim poqoy tiempota pasayta munarqaku.

¹³Sur lawmanta sumaqllataña wayrarimuptinmi, rinaykupaq allin hinaña kaptin lloqsispayku Creta islapa waqtallanta rirqaniku.

¹⁴Ichaqa manapas unaymantam, noreste lawmanta Euroclidón sutiyuq viento sinchita pukumuspan

¹⁵barcota kayman chayman apayta qallaykurqa, wayrapa contranpi mana riyta atispam hinataña apachikurqaniku.

¹⁶Clauda sutiyuq taksa islapa qepanta pasaruptiykuqa manañam llumpaytachu wayramurqa, hinaptinmi salvakunapaq boteta sasallataña churkurqaniku.

¹⁷Churkuruptiykum seguranankupaq barcota waskakunawan watarqaku. Ichaqa Sirte sutiyuq yakupa huñusqan aqoman mana chocarunaykupaqmi barcopa velankunata hurqorurqaniku llutanpiña rinaykupaq.

¹⁸Paqarinnintin punchawñataqmi aswan kallpawanraq wayra pukumuptin barcopi cargakunata yakuman wischurqaku.

¹⁹Kimsa punchawmantañataqmi kikiykuña barcopa llapa imankunata yakuman wischurqaniku.

²⁰Achka punchawña intitapas nitaq chaskakunatapas mana rikuspam hinaspa wayra-para hinalla apawaptinkum, manaña imaraykupas librakuytaqa piensarqanikuñachu.

²¹Barcopi kaqkuna achka punchawña mana mikusqa kaptiykum, chawpiykupi sayaykuspan Pablo nirqa: Riqmasillaykuna, nisqaypi hinapas Creta islamantaqa amapas lloqsimuchwanchu karqa, hinaptinqa manachá ñakarichwanchu nitaq imanchikunatapas yakuman wischuchkachwanchu karqa.

²²Ichaqa ama hukmanyaspa kallpanchakuychik, manam hukllapas wañunkichikchu, barcollam chinkaykunqaqa.

²³Chisi tutam rikuriykuwarqa servisqay Diospa angelnin.

²⁴Paymi niwarqa: “Pablo ama manchakuychu, rey Cesarpa ñawpaqninmanqa chayankipunim, qamraykum lliw qanwan riqkunata wañunankumanta Dios salvanqa”, nispa.

²⁵Chaynaqa, riqmasillaykuna, kallpanchakuychik, ñoqaqa Diospim hapipakuni, angelpa nisqanman hinam cheqaptapuni kawsasunchik.

²⁶Chaywanpas hukkaqnin islamanmi wischusqa kasunchik, nispa.

²⁷Iskay semanañam wayrapa apakachasqan kachkarqaniku Adriático sutiyuq lamar qochapi, hinaptinmi chawpi tutata barcopi llamkaqkuna musyarurqaku allpaman chayaykuchkasqaykutaña.

²⁸Yakupa hondo kayninta tupuptinkum iskay chunka metron kasqa, tumpa waklawpi tupuptinkuñataqmi chunka pichqayuqllaña kasqa.

²⁹Hinaptinmi raqchikunaman takakurunanmanta manchakuspanku barcopa qepa lawninman wataruspanku tawa anclakunata yakuman wischurqaku, hinaspankum achikyamunantaña munarqaku.

³⁰Barcopi llamkaqkunañataqmi rimanakururqaku chay barcomanta ayqekunankupaq, hinaspankum salvakunankupaq boteta uraykachiyta qallaykurqaku, chaytaqa ruwarqaku barcopa punta lawninta llasaq fierrokunata bajachiq tukuspallam.

³¹Ichaqa capitanmanwan soldadokunamanmi Pablo nirqa: Kay barcopi llamkaqkuna ayqekuptinqa manam salvakuyta atiwaqchikchu, nispa.

³²Chaynata willaykuptinmi chay botepa waskankunata soldadokuna kuchuruspa yakuman wischuykurqaku.

³³Achikyaramuptinmi Pabloqa lliwchankuta kallpanchaspan imallatapas mikuykunankupaq nirqa: Yaqa iskay semanañam mana puñusqa hinaspa mana mikusqa kachkankichik.

³⁴Ruegakuykichikmi imallatapas mikuykunaykichikpaq. Mikunaykichikpunim kawsanaykichikpaq, manam pipapas huk chukchallanpas chinkanqachu, nispa.

³⁵Chaynata niruspanmi tantata Pablo hapiykuspan lliwpa ñawpaqninpi Diosman graciasta qorqa, hinaspanmi partiykuspan mikuyta qallaykurqa.

³⁶Chaymi kallpanchakuspanku lliw-chanku mikurqaku.

³⁷Chay barcopiqa karqaniku iskay pachak qanchis chun-ka soqtayuq runakunam.

³⁸Saksa-nankukama mikuruspankum barcota sampayachinankupaq costalpi trigokunata yakuman wischuykurqaku.

³⁹Achikyaruptinñataqmi barcopi llamkaqkuna mana reqsirqakuchu maylaw allpapi kasqaykutapas, ichaqa rikururqakum qocha hina yaykuqpa patanpi aqollaña pampata, hinaspam rimanakurqaku atispankuqa barcota chayman chayachinankupaq.

⁴⁰Barco takyachiq llasaq fierropa waskankunata kuchuruspankum hina yaku ukupiña saqerurqaku. Paskar-qakutaqmi barcopa timonnin watasqanku waskakunatapas, barcopa ñawpaqninpi velata altoman hoqariykuptinkum barcoqa qochapa patan aqollaña pampaman riyta qallaykurqa.

⁴¹Aswanqa iskay lawmanta yakukunapa tupanakusqanman chayaruptiykum barcoqa aqopiña umanpa plantakururqa, chaynapim manaña kuyurirqachu. Barcopa qepa lawninta yaku nisyullataña laqyamuptinmi chitqakuytaña qallaykurqa.

⁴²Soldadokunañataqmi presokuna wañurachiyta munarqaku, chaynapi mayqanninkupas nadeaspa ama llupti-nankupaq.

⁴³Ichaqa soldadokunapa capitanninmi Pablota salvayta munaspan harkakurqa ama pitapas wañuchinankupaq, hinaspam kamachirqa nadeay yachaqkuna puntata yakuman pawaykuspanku patanman lloqsinankupaq,

⁴⁴chaynapi wakinñataq tablakunapi otaq barcopa imankunamanpas hapipakuspa lloqsinankupaq. Chaynapim patanman allinlla lliwchanku chayarurqaku.