Read CHUYA QELLQA La Biblia en Quechua de Ayacucho 2012 Hechos 4 Bible Online

Hechos 4 - CHUYA QELLQA La Biblia en Quechua de Ayacucho 2012 bible

Hechos 4

¹Runakunata Pedrowan Juan rima-payachkaptinkuraqmi sacerdotekunawan templo waqaychaq guardiakunapa kamachiqninkuna hinaspa saduceokuna hamururqaku.

²Paykunam llumpay piñasqallaña kachkarqaku Pedropawan Juanpa yachachisqankuwan. Paykunam yachachichkarqaku: Jesucristom kawsarimurqa, chaynam lliw wañuqkunapas kawsarimunqa, nispanku.

³Pedrotawan Juanta hapiruspankum tutaykuqña kaptin paqarinnintinkama carcelman wichqarurqaku.

⁴Chaywanpas achkaq uyariqkunam iñikurqaku, qarikunallam karqa yaqa pichqa waranqa.

⁵Paqarinnintinñataqmi Jerusalén llaq-tapi huñunakururqaku judiokunapa kamachiqninkuna, ancianokuna, Diospa leynin yachachiqkuna,

⁶sumo sacerdote Anás, Caifás, Juan, Alejandro chaynataq lliw sumo sacerdotekunapa ayllunkunapas.

⁷Hinaspam Pedrotawan Juanta chay kasqankuman pusarachimuspanku tapurqaku: ¿Pipa kamachikuyninwantaq hinaspa pipa sutinpitaq kaykunata ruwachkankichik? nispanku.

⁸Chaymi Pedroñataq Chuya Espiritupa huntaykusqan nirqa: Llaqtapi kamachikuqkuna hinaspa Israelpa ancianonkuna:

⁹Qamkunam tapuwachkankiku onqoq runata allin ruwasqaykumanta hinaspa imaynam sanoyarusqanmanta.

¹⁰Chaynaqa, ya-chaychikyá qamkunapas, yachachuntaqyá Israel llaqtapas, Nazaretmanta kaq Jesucristopa sutinpim kay runaqa allinyarun hinaspam sanoña qayllaykichikpi sayachkan. Chay Jesustam qamkuna chakatarurqankichik, ichaqa Diosmi wañusqanmanta kawsarirachimurqa.

¹¹Qamkunaqa wasi perqaqkuna hinam huk rumita wischupakurqankichik, chay rumiqa Jesusmi. Paymi kunanqa wasipa cimientonpi esquinan hapiq rumiña rikurirun.

¹²Jesusmanta hukpiqa manam salvación kanchu, kay pachapiqa manataqmi huk sutiqa kanchu salvakunapaqqa ichaqa Jesusllam, nispa.

¹³Pedrowan Juan mana manchakuspa rimaptinkum llapa kamachikuqkuna uyarispanku admirakurqaku, paykunaqa yacharqakum Pedrowan Juanqa mana estudioyuq kasqankuta, chayraqmi musyarurqaku paykunaqa Jesuspa puriqmasinkuna kasqankuta.

¹⁴Paykuna-wantaqmi sayachkarqa suchumanta sanoyaq runapas chaymi paykunapa contranpiqa mana ima niytapas atirqakuchu.

¹⁵Chaymi Pedrotawan Juanta cortemanta lloqsirachirqaku kikinkupurallapi rimanankupaq.

¹⁶Paykunam ninakurqaku: ¿Imatataq ruwasun kay runakunawanqa? Jerusalén llaqtapi llapallan runakunam yachanku kay suchu runa sanoyarachisqankutaqa. Manam kaytaqa pakayta atichwanchu.

¹⁷Wakin runakuna ama-ña yachanankupaqyá amenazaykusunchik kunanmantaqa amaña pimanpas Jesucristopa sutinpi rimanankupaq, nispanku.

¹⁸Hinaspam Pedrotawan Juanta huktawan qayaykuspanku kamachirqaku, Jesucristopa sutinpi amaña willaku-nankupaq hinaspa amaña yacha-chinankupaq.

¹⁹Ichaqa Pedrowan Juanmi nirqaku: Kikikichikpuni tanteaspa niwayku: ¿Diospaq allinchu kanman payta mana kasukuspa qamkunataña kasukuyniyku?

²⁰Ñoqaykuqa manam upallaymankuchu rikusqaykumantawan uyarisqaykumanta willakuytaqa, nispanku.

²¹Chaykuna pasakusqanmanta llapa runakuna Diosta yupaychasqankuraykum Juantawan Pedrota autoridadkuna mana imayna castigayta atispanku amenazaykuspalla kachaykurqaku.

²²Chay sanoyaq suchu runaqa karqa tawa chunka masnin watayuqñam.

²³Pedrotawan Juanta kachaykuptinkum wakin iñiqmasinkunaman rirqaku, hinaspam llapa sacerdotekunapa kamachiqninkunapa chaynataq ancianokunapa tukuy ima nisqanta willakurqaku.

²⁴Chayta uyariykuspam llapallanku huk sonqolla Diosta mañakuspa nirqaku: Señorniyku, qanmi unancharqanki hanaq pachata, kay pachata, lamar qochata chaynataq chaykunapi tukuy imakunatapas.

²⁵Qanmi Chuya Espirituykiwan serviqniki ñawpaq taytayku Davidta nirqanki: “¿Imanasqataq nacionkuna piñakuywan hatarinku? ¿Imanasqataq runakuna yanqakunata tanteanku?

²⁶Kay pachapi reykunam huklla hoqarikurunku, kamachikuqkunam Señorpa chaynataq sapaqchakusqan Cristopa contranpi rimanakurunku”, nispa.

²⁷ Cheqaptapunim rey Herodeswan Poncio Pilato kay llaqtapi huñunakururqaku huklaw nacionniyuq runakunawan hinaspa Israel llaqtawan qampa sapaqchakusqayki serviqniki Jesuspa contranpi.

²⁸Chaynataqa ruwarqaku ñawpaqmantaraq qampa munasqayki cumplikunanpaqmi.

²⁹Taytayku kunanqa qawayá imaynam amenazawasqankuta hinaspa serviqnikikunata kallpanchawayku mana manchakuspa qanmanta willakunaykupaq.

³⁰Qawachikuyá atiynikita llapa onqoqkunata sanoyachispayki hinaspa admirakuypaq milagrokunata sapaqchakusqayki serviqniki Jesuspa sutinpi ruwaspayki, nispanku.

³¹Dios mañakuyta tukuruptinkum chay huñunakusqanku wasi katkatatarurqa, hinaptinmi Chuya Espíritu lliwman huntaykurqa. Chaymi manaña manchakuspanku Diospa palabranta willakurqaku.

³²Lliw iñiqkunam huk sonqolla kaspanku huk runa hinalla karqaku, manam pipas ima kapuqninkutapas “ñoqallapam” niqkuchu, aswanqa tukuy imankupas lliwchankupaqmi karqa.

³³Apostolkunam aswan atiywanraq willakurqaku Jesucristopa kawsarimusqanmanta, chaymi llapallankuta llumpayta Dios yanaparqa.

³⁴Paykuna ukupiqa manam pipas pisichikuqchu. Kapuqniyuqkunam chakrankuta chaynataq wasinkuta rantikuspanku qollqeta apostolkunaman apamuqku, paykunañataqmi sapakamaman necesitasqankuman hina aypuqku.

³⁶Chaynatam Joseypas ruwarqa. Payqa Leviypa castanmanta Chipre lawpi nacekuqmi karqa. Paytataqmi apostolkuna suticharqaku Bernabeywan, chay sutiqa “sonqo tiyachiq” ninanmi.

³⁷Paymi chakranta rantikaramuspan qollqetañataq apostolkunaman qorqa.