Read CHUYA QELLQA La Biblia en Quechua de Ayacucho 2012 Hechos 7 Bible Online

Hechos 7 - CHUYA QELLQA La Biblia en Quechua de Ayacucho 2012 bible

Hechos 7

¹Estebantam Sumo sacerdote tapurqa: ¿Qanmanta runakunapa rimasqan cheqapchu? nispa.

²Chaymi Estebanñataq nirqa: Wawqellaykuna, taytallaykuna, uyariy-kuwaychik. Ñoqanchikpa kancharich-kaq Diosninchikmi ñawpaq taytanchik Abrahamman Mesopotamia lawpi rikuriykurqa, manaraq Harán llaqtaman ripukuchkaptin.

³Paytam nirqa: “Llaqtaykimanta hinaspa aylluykikunamanta lloqsiy qawachinay allpaman”, nispa.

⁴Chaymi Diospa nisqanman hina, Caldea lawmanta Abraham ripukuspan Harán llaqtapi yacharqa. Chaypi taytan wañukuptinmi payta Dios pusamurqa kay kasqanchik allpaman.

⁵Diosqa manam ima herenciatapas kay allpapiqa qorqachu ni chakillan churaykunanpaqpas; ichaqa mana churiyuq kachkaptinpas, Diosmi tukuy kay allpata paymanwan mirayninkunaman qonanpaq prometerqa.

⁶Paytam nirqa: “Miraynikikunam runapa llaqtanpi mana llaqtayuq hina yachanqaku, chaypim esclavo kaspa ñakarichisqa kanqaku tawa pachak watapuni”, nispa.

⁷Diosqa nirqataqmi: “Aswanqa servichikuqninku runakunatam castigasaq, hinaptinmi miraynikikuna chay nacionmanta lloqsimuspanku kaypi yupaychawanqaku”, nispa.

⁸Diosmi pactota Abrahamwan ruwaspan qari kayninkupi señalasqa kanankupaq kamachirqa. Chaymi churin Isaac naceruptin pusaq punchawninman señalarqa; hina chaynallatam Isaacpas churin Jacobta señalarqa, Jacobpas chaynallatataqmi chunka iskayniyuq churinkunawan ruwarqa.

⁹ Jacobpa churinkunam wawqenku Joseymanta envidiakuspanku rantikururqaku, chaymi Egipto nacionman aparurqaku. Ichaqa Diosmi Joseywan karqa,

¹⁰hinaspam llapa ñakariyninkunamanta librarqa. Dios yanapaptinmi Joseyqa allin yachayniyuq karqa, chaymi rey Faraonpas allinpaq qawaspan Joseyta akllarqa Egipto nacionpi hinaspa kikin reypa wasinpi kamachikuq kananpaq.

¹¹Egipto nacionpipas chaynataq Canaán lawpipas llumpay yarqay kaptinmi, ñawpaq taytanchikkuna mana imatapas mikunankupaq tarirqakuchu.

¹²Ichaqa Egipto nacionpi trigo kasqanta Jacob yacharuspanmi churinkunata punta riyninkupi kacharqa.

¹³Iskay kaq kutiyninkupiñam Joseyqa wawqenkunaman reqsiykachikurqa, chaymi Egipto nacionpa reyninpas yacharurqa pipa castanmi Joseyqa kasqanta.

¹⁴Chaynapim Joseyqa taytan Jacobta llapa aylluntinta Egipto nacionman qayachirqa, paykunaqa karqa qanchis chunka pichqayuq runakunam.

¹⁵Chaynapim Jacobqa Egipto nacionman ripukurqa, hinaspam chaypi wañukurqa, hina chaypitaqmi churinkunapas wañukurqaku.

¹⁶Chaymantañam paykunapa tullunkunata aparqaku Siquem llaqtaman chaypi pampanankupaq. Chay sepulturatam achka qollqewan Abraham rantirqa Hamorpa churinkunamanta.

¹⁷Abrahamman juraspa Diospa prometesqan tiempo hichpamusqanman hinam, Egipto nacionpi Israel runakuna llumpa-llumpayta mirarurqaku.

¹⁸Chaymantam Joseyta mana reqsiq reyña Egipto nacionpi munaychakuyta qallaykurqa.

¹⁹Paymi engañaspa ñawpaq taytanchikkunata llumpayta ñakarichirqa, hinaspam kamachikurqa chayllaraq naceq wawa-churinkutapas saqeptinku wañunanpaq, chaynapi mana miranankupaq.

²⁰Chay tiempopim Moisespas nacerqa. Paymi karqa Diospa kuyasqan suma-sumaq wawa, chaymi tayta-maman kimsa killa wasinkupi uywarqaku.

²¹Ichaqa wañunanpaq wischusqa kaptinmi, rey Faraonpa warmi churin tarikuspan wawanta hina uywakurqa.

²²Chaynapim Egiptopi tukuy yachaykunata yachachirqaku, chaymi Moisesqa karqa rimayninpipas chaynataq ruwayninpipas hatun yachayniyuq runa.

²³Moisesmi tawa chunka watayuqña kachkaspan, Israelmanta kaq llaqtamasinkunaman watukuq rirqa.

²⁴Chaypim Egipto runata rikururqa Israelpa mirayninmanta kaq runata maqachkaqta, chaymi nanachikuspan maqaqnin Egipto runata wañurachirqa.

²⁵Moisesmi nirqa: “Castaykunaqa yaqam entiendenqaku paykunataqa ñoqantakama Dios librananta”, nispa. Ichaqa manam paykunaqa kaqpaqpas hapirqakuchu.

²⁶Paqarinnintin punchawñataqmi Moisés tarirurqa Israelpa mirayninkunamanta iskay runakuna maqanakuchkaqta, rakinayta munaspanmi nirqa: “Qamkunaqa wawqentinmi kankichik, ¿imanasqataq maqanakuchkankichik?” nispa.

²⁷Hinaptinmi chay castamasin maqaq runa, Moisesta tanqarispan nirqa: “¿Pitaq qamta churasurqanki ñoqaykupa kamachiqniyku hinaspa juezniyku kanaykipaq?

²⁸¿Qayna punchaw wañuchisqayki Egipto runata hinachu ñoqatapas wañurachiwayta munanki?”, nispa.

²⁹Kayta uyariruspanmi Moisesqa ayqekuspa Madián lawman ripukurqa. Runapa llaqtanpi yachachkaptinmi iskay churinkuna nacerqa.

³⁰Tawa chunka wata pasaruptinñam, Sinaí orqopa hichpan chunniqpi huk angelta rikururqa rupachkaq tankar kichkapi.

³¹Moisesmi chayta rikuruspan admirakurqa, hinaspam sumaqta qawaykunanpaq asuykuspan uyarirqa Diospa kayna nisqanta:

³²“Ñoqam kani ñawpaq taytayki Abrahampa, Isaacpa hinaspa Jacobpa Diosnin” niqta. Hinaptinmi Moisesqa manchakuymanta katkatatayta qallaykuspan ni qawariytapas atirqachu.

³³Chaymi Diosñataq nirqa: “Usutaykita hurqokuy, sarusqayki allpaqa ñoqapaq sapaqchasqa allpam.

³⁴Cheqaptapunim Egipto nacionpi llaqtaypa ñakarisqanta qawachkani, uyarichkanitaqmi waqasqankutapas, chaymi uraykamuni paykunata libranaypaq. Chaynaqa, riy, ñoqam Egipto nacionman rinaykipaq kamachiki”, nispa.

³⁵Kay Moisestam paykuna qepanchaspanku kaynata nirqaku: “¿Pitaq qamtaqa ñoqaykupa kamachiqniyku hinaspa juezniyku kanaykipaq churasurqanki?” nispanku. Ichaqa Diosmi payta kacharqa kamachiqninku hinaspa libraqninku kananpaq tankar kichkapi rikuriqnin angelnintakama.

³⁶Paymi Israel runakunata hurqomurqa admirakuypaq milagrokunata Egipto nacionpi ruwaspa chaynataq Puka lamar qochapipas hinaspa tawa chunka watantin hamusqanku chunniqpipas.

³⁷Kay Moisestaqmi Israelpa mirayninkunata nirqa: “Diosmi castanchikmanta ñoqa hina profetata hatarichinqa, paytam uyarinkichik”, nispa.

³⁸Kay Moisesmi chunniqpi huñunakuypi ñawpaq taytanchikkunawanpas karqa, paymi Sinaí orqopi rimapayaqnin angelwanpas karqa. Paytaqmi kawsananchikpaq palabrakunatapas chaskipuwarqanchik.

³⁹Ichaqa ñawpaq taytanchikkunam payta mana kasurqakuchu, hinaspam qepanchakuruspanku Egipto nacionman kutikuyta munaspanku

⁴⁰Aaronta nirqaku: “Idolokunata ruwapuwayku Dios hina pusawananchikpaq. Egipto nacionmanta hurqomuwaqninchik Moisestaqa imachá pasarunpas, manam yachanchikchu”, nispanku.

⁴¹Chaymi torillota qorimanta ruwarurqaku, hinaspam animalkunata wañuchispa chay idoloman ofrecerqaku, makinkupa ruwarusqanwanmi kusikurqaku.

⁴²Chaynapim Diospas paykunata qepanchakuruspa chaskakunataña yupaychanankupaq saqerurqa, profetapa qellqasqan libropim kaynata nichkan: “Yaw, Israelpa mirayninkuna, ¿yaqachu chunniqpi tawa chunka wata purispaykichik animalkunatawan sacrificiokunata ofrecewarqankichik?

⁴³Aswanraqmi Moloc idolotawan chaskakunaman rikchakuq ruwasqaykichik Refán idoloykichikta apaykacharqankichik. Chay idolokunatam yupaychanaykichikpaq ruwarqankichik, chayraykum Babilonia llaqtapa waklawninkunaman qarqorqaykichik”, nispa.

⁴⁴Ñawpaq taytanchikkunam Dioswan huñunakunanku carpata chunniqpi hatarichirqaku. Chaytaqa ruwarqaku imaynam Diospa kamachisqanman hinaspa Moisesman qawachisqanman hinam.

⁴⁵Kay carpatam ñawpaq taytanchikkuna herenciata hina chaskirqaku, hinaspam Josueywan hamuspanku, huk casta runakunata allpanmanta qarqoruspanku, kay allpanchikman apamurqaku. Diosmi qayllanmanta chay runakunata qarqorqa, kay allpata ñawpaq taytanchikkunaman qonanpaq. Chaypim karqa rey Davidpa tiemponkama.

⁴⁶Davidmi Diospa kuyapayakuyninta haypaykuspan mañakurqa Jacobpa Diosninpaq templota ru-wananpaq.

⁴⁷Ichaqa Salomonñam Diospa tem-plontaqa ruwarqa,

⁴⁸hanaq pachapi Diosqa mana runakunapa ruwasqan templopi yachachkaptinpas. Diospa profetanmi kaynata nirqa:

⁴⁹“Hanaq pachaqa tiyanay tronom, kay pachañataqmi sarupakunay. ¿Imayna wasitataq ruwapuwankichikman? ¿Maypitaq samarinaypaq sitiota allichapuwankichikman? Señormi chaynata nin.

⁵⁰¿Manachum tukuy imapas ñoqapa ruwasqallay karqa?”, nispa.

⁵¹Qamkunaqa mana kasukuq runakunam kankichik. Rinrikichikpas chaynataq sonqoykichikpas wichqasqam kachkan. Qamkunaqa Chuya Espiritupa contranpim kachkankichik, ñawpa taytaykichikkuna hinapunim qamkunapas kankichik.

⁵²¿Mayqan profetatataq ñawpaq taytaykichikkuna mana qatikacharqakuchu? Diospa Churin hamunanmanta willakuqkunatapas wañuchirqakum. Paytam traicionaspaykichik qamkuna wañuchirqankichik.

⁵³Qamkunaqa kamachikuykunatapas angelninkunatakamam chaskirqankichik, ichaqa manam kasukurqankichikchu, nispa.

⁵⁴Chayta uyariykuspankum llumpayta piñakuspanku Estebanpa contranpi kirunkutapas kirichichirqakuraq.

⁵⁵Estebanñataqmi Chuya Espiritupa huntasqan, cielota qawarispa Diospa kanchayninta rikururqa, rikururqataqmi Jesucristotapas Diospa alleq lawninpi sayachkaqta.

⁵⁶Chaymi nirqa: Hanaq pachatam kicharayachkaqta rikuchkani, runapa Churintañataqmi Diospa alleq lawninpi kachkaqta, nispa.

⁵⁷Chaymi paykunañataq mana uyariyta munaspanku rinrinkutapas tapakuspa qaparispanku lliw waykarurqaku.

⁵⁸Hinaspam llaqtapa cantonman aysaruspanku rumiwan choqaparurqaku. Esteban wañuchiq runakunapa pachantam Saulo sutiyuq jovenwan waqaychachirqaku.

⁵⁹Rumiwan choqapachkaptinkum, Esteban kaynata mañakurqa: Señor Jesús espirituytayá chaskiykuy, nispa.

⁶⁰Hinaspanmi qonqorakuykuspan qaparirqa: Señorlláy, kay hucha ruwasqankutaqa amayá huchapaqpas hapiychu, nispa. Chaynata niruspanmi wañukurqa.