Read CHUYA QELLQA La Biblia en Quechua de Ayacucho 2012 Hechos 8 Bible Online

Hechos 8 - CHUYA QELLQA La Biblia en Quechua de Ayacucho 2012 bible

Hechos 8

¹Saulom allinpaq hapirqa Esteban wañuchisqankuta. Hina chay pun-chawllapim Jerusalenpi iñiqkunata ñakarichinankupaq qatikachayta qallay-kurqaku. Chaymi llapa iñiqkuna Judea lawman hinaspa Samaria lawman che-qerurqaku, apostolkunallañam qeparurqaku.

²Hinaptinmi allin sonqoyuq runakuna Estebanta pamparurqaku, hinaspam paymanta llumpayta waqarqaku.

³Sauloñataqmi iñiqkunata chinkachinanpaq wasin-wasin qatikachaspan qaritapas warmitapas carcelman aparqa.

⁴Ichaqa Jerusalenmanta cheqeqkunam, mayman rispankupas Jesucristomanta allin noticiata willakuqku.

⁵Chaynapim Feli-pepas Samaria llaqtaman rirqa, hinaspam Jesucristomanta willakurqa.

⁶Chaymi llapa runakuna huñunakuspanku Felipepa nisqanta huk sonqolla uyarirqaku, rikur-qakutaqmi milagrokuna ruwasqantapas.

⁷Demoniopa huntasqan runakunatapas achkaqtam sanoyachirqa, runakunamantam chay demoniokuna qaparistin lloqsiqku. Suchukunawan wistukunapas sanoyarqakum.

⁸Chayraykum chay llaqtapi runakunaqa llumpay kusisqa karqaku.

⁹Samaria llaqtapim karqa Simón sutiyuq layqa, paymi layqakuq runa karqa hinaspam chay llaqtapi runakunata engañaq: “Ñoqaqa ancha yachayniyuq runam kani”, nispa.

¹⁰Paytam taksapas hatunpas kasukuqku, hinaspam paymanta niqku: “Kay runapiqa Diospa hatun atiyninmi kachkan”, nispanku.

¹¹Paytam kasukuqku, layqakuyninwan unayña paykunata engañasqanrayku.

¹²Ichaqa Diospa munaychakuyninmanta hinaspa runakunata salvaq Jesucristopa sutinmanta Felipepa rimasqanta uyarispa iñikuspankum qaripas warmipas bautizachikurqaku.

¹³Chaymi Simonpas Jesucristoman iñikuspan bautizachikurqa, hinaspam Felipewanña purirqa. Diospa atiyninwan milagrokunata Felipe ruwasqanta qawaspanñataqmi admirakurqa.

¹⁴Samaria llaqtapi runakuna Diospa palabran chaskisqankuta yacharuspankum, Jerusalenpi apostolkuna Pedrotawan Juanta kacharqaku.

¹⁵Paykunam Samaria llaqtaman chayaruspanku, Samariapi iñiqkuna Chuya Espirituta chaskinankupaq Diosta mañakurqaku.

¹⁶Paykunaqa Jesuspa sutillanpiraq bautizasqa kasqankuraykum Chuya Espirituqa mana mayqanmanpas hamurqaraqchu.

¹⁷Chaymi iñiqkunaman Pedrowan Juan makinkuta churaykuptinku Chuya Espirituta chaskirqaku.

¹⁸Simonñataqmi iñiqkunaman apostolkuna makinkuta churaptin paykunaman Chuya Espíritu hamusqanta qawaykuspan, apostolkunaman qollqeta qawachispan

¹⁹nirqa: Ñoqamanpas chay atiyta qoykuwaychik, chaynapi pimanpas makiyta churaykuptiy Chuya Espirituta chaskinankupaq, nispa.

²⁰Pedroñataqmi nirqa: ¡Qollqekiwan kuskayá infiernoman ripuy, qamqa Diospa atiynintam qollqewan rantiyta piensarqanki!

²¹Kay chaskinaykipaqa manam partekipas nitaq suertekipas kanchu, sonqoykipas Diospa qayllanpiqa millakuypaqmi kachkan.

²²Mana allin ruwaynikikunamantayá wanakuy, hinaspayá Diosta mañakuy, icharaqpas sonqoykipi chay mana allin piensasqaykita pampachasunkiman.

²³Yachanim qamqa envidiosollaña kasqaykita hinaspa mana allin ruwaykunapa watasqan kasqaykita, nispa.

²⁴Hinaptinmi Simonñataq nirqa: Señortayá mañapullawaychik, chaynapi chay nisqaykichikkuna ama chayaramuwananpaq, nispa.

²⁵Pedrowan Juanñataqmi Diospa palabranta willakuruspanku Jerusalenman kutirqaku, Samaria law llaqtakunapi Cristomanta allin noticiata willakustin.

²⁶Chaymantam Felipeta Diospa angelnin kaynata kamachirqa: Sur lawman riy, Jerusalenmanta Gaza llaqtaman riq ñanninta, nispa. Chay ñanqa chunniqnintam pasachkan.

²⁷Felipeñataqmi rispan ñanpi tuparurqa Etiopía nacionniyuq eunucowan. Payqa karqa Etiopía nacionpi Candace sutiyuq reinapa qollqen waqaychaqmi. Paymi Diosta yupaychananpaq Jerusalenta rirqa.

²⁸Hinaspam caballopa aysasqan carretanpi llaqtanman kutikuchkarqa profeta Isaiaspa qellqasqan librota leestin.

²⁹Chaymi Felipeta Chuya Espíritu nirqa: Rispayki wak carretaman asuykuy, nispa.

³⁰Felipeñataqmi kallpaylla asuykuspan Isaiaspa qellqasqan libro leesqanta uyarirurqa, chaymi tapurqa: ¿Entiendechkankichu chay leesqaykipa imam nisqanta? nispa.

³¹Chay Etiopía runañataqmi nirqa: ¿Imaynataq entiendesaq mana pipas yachachiwachkaptinqa? nispan. Chaymi Felipeta ruegarqa seqaspan waqtanpi tiyananpaq.

³²Chay Qellqa leesqanqa kaynatam nirqa: “Nakanapaq carnerota hinam wañuchinankuman aparqaku, millwan rutuchikuq oveja hinam ñakarichiqninkunapa qayllanpi simillanta wichqaykurqa, manam imatapas rimarirqachu.

³³Yanqamanta cargochaspam sentenciarqaku, chaywanpas miraynintaqa, ¿pitaq yupayta atinman? kay pachamantam kawsayninta chinkarachirqaku”, nispa.

³⁴Hinaptinmi Felipeta chay eunuco tapurqa: Niykuway, ¿pimantataq profeta kaypi rimachkan, kikinmantachu icha hukmantachu? nispa.

³⁵Chaymi Felipeqa leesqankumanta qallaykuspan Jesusmanta allin noticiata willarqa.

³⁶Yakupa kasqanman chayaruptinkum chay eunuco nirqa: Kayqaya kaypi yaku kachkan, ¿imataq harkawanman bautizakurunayta? nispa.

³⁷[1][Chaymi Felipeñataq nirqa: Tukuy sonqoykiwan iñiptikiqa allinmi, nispa. Hinaptinmi chay eunucoñataq nirqa: Creenim Jesucristoqa Diospa Churin kasqanta], nispa.

³⁸Chaynata niruspanmi carretata sayachinanpaq kamachirqa. Chaymi yakuman iskayninku uraykurqaku, hinaptinmi Felipeñataq bautizarqa.

³⁹Yakumanta lloqsiramuptinkuñataqmi Felipeta Señorpa Espiritun huklawman aparurqa. Hinaptinmi chay eunucoqa manaña Felipeta rikurqachu, ichaqa kusisqallañam ripukurqa.

⁴⁰Felipeñataqmi Azoto sutiyuq llaqtapiña rikurirurqa, hinaspanmi Jesusmanta allin noticiata willakustin llaqtan-llaqtan rirqa, Cesarea llaqtaman chayanankama.