Read CHUYA QELLQA La Biblia en Quechua de Ayacucho 2012 Hechos 9 Bible Online

Hechos 9 - CHUYA QELLQA La Biblia en Quechua de Ayacucho 2012 bible

Hechos 9

¹Sauloñataqmi Jesucristoman iñiqkunata wañuchinanpaq amenazaspan sumo sacerdoteman rirqa,

²hinaspam cartakunata mañakurqa Damasco lawpi kaq sinagogakunapi kamachikuqkunapaq, chaynapi Jesucristopi iñiqkunata tarispanqa warmitapas qaritapas presota Jerusalenman apamunanpaq.

³Damasco llaqtaman hichpaykuchkaptinmi, cielomanta huk llipyay qonqayllamanta uraykamuspa payta kanchaykurqa.

⁴Chaymi Sauloñataq pampaman wichiy-kuspan kayna niq rimayta uyarirqa: ¡Saulo, Saulo! ¿Imanasqataq qatikachawanki? niqta.

⁵Chaymi Saulo tapurqa: ¿Pitaq kanki Señor? nispa. Hinaptinmi nimurqa: Ñoqaqa qatikachawasqayki Jesusmi kani.

⁶Hatarispayki Damasco llaqtaman yaykuy, chaypim imam ruwanaykitapas nisunki, nispa.

⁷Saulowan riqkunam chay rimariyta uyarirqaku, ichaqa manam pitapas rikurqakuchu. Chaymi mancharisqallaña rikurirurqaku.

⁸Sauloñataqmi pampamanta hatarispan ñawsayarusqanrayku manaña imatapas rikurqachu. Chaymi makinmanta aysaspanku Damascoman pusaykurqaku.

⁹Chaypim kimsa punchaw karqa mana rikukuq, manataqmi imatapas mikurqachu nitaq tomarqachu.

¹⁰Damasco llaqtapim Jesucristopi iñiq Ananías yacharqa. Paymanmi Señor rikuriykuspan nirqa: Ananías, nispa. Chaymi payñataq nirqa: ¿Imata Señor? nispa.

¹¹Señorñataqmi nirqa: Hatarispayki Derecha sutiyuq calleman riy, hinaspayki Judaspa wasinpi maskamuy Tarso llaqtayuq Saulota. Paymi Diosta mañakuchkan,

¹²hinaspam visionpi rikurqa Ananías sutiyuq runata, yaykuspan paypa hawanman makin churaykuqta, chaynapi musoqmanta qawarikunanpaq, nispa.

¹³Ananiasñataqmi nirqa: Señorlláy, achkaq runakunam willawarqaku chay runamantaqa, payqa Jerusalén llaqtapim qanman iñiqkunata ñakarichirqa.

¹⁴Kunanñataqmi sumo sacerdotemanta autorizacionta mañakaykamuspan hamurun qampa sutikipi iñiqkunata presochananpaq, nispa.

¹⁵Señorñataqmi nirqa: Riypuni, chay runaqa serviwananpaq akllakusqaymi, paymi ñoqamanta willakamunqa huklaw nacionkunapi runakunaman, reykunaman hinaspa Israelpa mirayninkunaman.

¹⁶Ñoqam payman qawachisaq ñoqarayku imaynam llumpay ñakarinanta.

¹⁷Chaymi Ananías pasarqa Saulopa kasqan wasiman, hinaspam yaykuruspan Saulopa hawanman makinta churaykuspan nirqa: Wawqey Saulo, chay hamusqayki ñanpi rikurisuqniki Señor Jesusmi kachamuwarqa qamta qawarichinaypaq, hinaspa Chuya Espiritupa huntasqan kanaykipaq, nispa.

¹⁸Hinaptinmi chaypunilla paypa ñawinmanta escama hina wichiruptin qawarikururqa. Chaymi Saulo hatarispan bautizachikurqa.

¹⁹Mikuruspanmi chaywan kallpanchakururqa, hinaspanmi Damasco llaqtapi iñiqkunawan chay punchawkuna qeparqa.

²⁰Chaykunapa qepantam Jesucris-tomanta sinagogakunapi willakus-pan nirqa: Jesucristoqa Diospa Churinmi, nispa.

²¹Lliw uyariqkunañataqmi admirakuspanku kaynata ninakurqaku: ¿Manachum kay runaqa Jerusalén llaqtapi purirqa Jesucristopa sutinpi iñiqkunata qatikachastin? ¿Manachum kaymanpas hamurqa iñiqkunata presocharuspan sacerdotekunapa kamachiqninkunaman apananpaq? nispanku.

²²Saulom ichaqa aswan-aswan kallpanchakuspan Jesusqa cheqaptapuni Cristo kasqanta willakurqa, chaynapim Damascopi yachaq judiokunatapas iskayrayarachirqa.

²³Achka punchawkuna pasaruptinmi Saulota wañuchinankupaq judiokuna rimanakururqaku.

²⁴Saulom ichaqa chayta yachakururqa. Chaymi wañurachinankupaq tuta punchaw chay llaqtapa punkunkunapi suyaqku.

²⁵Aswanqa iñiqkunam Saulota tutallan hatun canastapi uraykarachirqaku, chay llaqtapa perqantakama.

²⁶Sauloñataqmi Jerusalenman chayaruspan iñiqkunawan huñunakuyta munarqa, ichaqa paykunam manchakurqaku Jesucristoman iñisqanta mana creespanku.

²⁷Ichaqa Bernabeymi Saulota apostolkunaman pusarqa, hinaspam willarqa Jesucristota ñanpi Saulo rikurusqanmanta, hinaspa imaynam Señorpa rimapayasqanmanta, chaynataq Damasco llaqtapi mana manchakuspa Jesucristomanta willakusqanmantapas.

²⁸Chaymi Sauloqa Jerusalenpiña apostolkunawan puriq.

²⁹Mana manchakuspanmi Señorpa sutinpi rimaq, atipanakuqtaqmi griego rimaq judiokunawanpas, ichaqa paykunam wañurachiypi rirqaku.

³⁰Jesucristoman iñiqkunañataqmi chayta yacharuspanku, Saulota Cesareaman pusaruspanku Tarso llaqtaman aviarurqaku.

³¹Chaymi tukuy Judea lawpi, Galilea lawpi hinaspa Samaria lawpi iñiqkuna hawkaña karqaku. Iñiyninkupim wiñaqku hinaspam Señorta manchakuspanku kawsaqku, Chuya Espiritupa kallpanchasqan kaspankum aswan-aswan miraqku.

³²Apóstol Pedrom llapa iñiqkunata watukuspan Lida llaqtapi iñiqkunaman chayarurqa.

³³Chaypim tarirurqa Eneas sutiyuq runata, paymi suchuyaruspan pusaq wataña camapi kachkarqa.

³⁴Hinaptinmi Pedro nirqa: Eneas, Jesucristom sanoyarachisunki, hatarispayki camaykita hoqariy, nispa. Chaymi Eneasqa chaylla hatarirurqa.

³⁵Lida llaqtapi hinaspa Sarón llaqtapi lliw yachaqkunam payta rikururqaku, hinaspankum Señor Jesucristoman iñikurqaku.

³⁶Jope llaqtapim yacharqa Jesucristopi iñikuq Tabita sutiyuq warmi, paypa sutinmi griego rimaypi karqa Dorcas. Paymi allinkunata ruwaspan wakchakunata yanapaq.

³⁷Paymi chay punchawkunapi onqoruspan wañukurqa, chaymi cuerponta bañaruspanku wasipa altosninpi chutaykurqaku.

³⁸Lida llaqtaqa Jope llaqtamanta hichpallam karqa, chaymi iñiqkuna chaypi Pedro kasqanta yacharuspanku iskay runakunawan qayachimurqaku: Kunanpuni Jope llaqtaman hamuy, nispanku.

³⁹Chaynata Pedroman willaykuptinkum paykunawan pasarqa. Chayaruptinmi Pedrota wañuqpa kasqan cuartoman pusaykurqaku, chaymi llapa viudakuna Pedroman asuykuspanku waqastin Dorcaspa ruwasqan pachakunata qawa-chirqaku.

⁴⁰Pedroñataqmi chaypi kaqkunata lloqsirachispan, qonqorakuspan Diosta mañakurqa, hinaspam chay wañusqa warmita qawarispan nirqa: Tabita, hatariy, nispa. Chaymi Tabita qawarikururqa, hinas-panmi Pedrota rikuruspan tiyarirurqa.

⁴¹Pedroñataqmi makinmanta hapiykuspan sayarichirqa, hinaspam iñiqkunatawan viudakunata qayaykuspan kawsachkaqtaña paykunaman qawaykachirqa.

⁴²Chaytam Jope llaqtapi llapa runakuna yacharurqaku, hinaspam Señorman achkallaña iñikurqaku.

⁴³Pedroqa achka punchawmi chay llaqtapi, suela ruwaq Simonpa wasinpi qeparqa.