Read CHUYA QELLQA La Biblia en Quechua de Ayacucho 2012 Romanos 15 Bible Online

Romanos 15 - CHUYA QELLQA La Biblia en Quechua de Ayacucho 2012 bible

Romanos 15

¹Iñiyninchikpi kallpayuq kaqkunam pisi iñiyniyuqkunata yanapananchik, ama kikillanchikpaq imatapas munaspa.

²Sapakamayá runamasinchikpa allinninta ruwasun, chaynapi allinpaq hapispanku iñisqankupi wiñanankupaq.

³Cristopunipas manam kikillanpaq munaqchu karqa, Qellqapipas kaynatam nin: “Diosnilláy, kamiqnikikunapa kamikuyninmi ñoqaman wichiykuwarqa”, nispa.

⁴Ñawpaqta imapas qellqasqa kaqkunaqa yachachiwananchikpaqmi qellqasqa karqa, chaynapi pacienciakuspa chay qellqapa nisqanman hina kallpanchakuspa suyananchikpaq.

⁵Paciencia qokuq chaynataq sonqonchik tiyachiq Diosyá yanapasunkichik, imaynam Jesucristopa yachachisqanman hina huk sonqolla kanaykichikpaq,

⁶chaynapi Señorninchik Jesucristopa Taytan Diosninchikta llapallaykichik huk similla yupaychanaykichikpaq.

⁷Chaynaqa, Diosninchik yupay-chasqa kananpaqyá huknikichikmanta huknikichikkama allinllata chaskinakuychik, imaynam Cristopas ñoqanchikta chaskiwasqanchikta hina.

⁸Kaywanqa nichkaykichik Cristoqa judiokunata servinanpaqmi hamurqa hinaspa Diosqa cheqap kasqanta qawachinanpaqmi. Payqa hamurqa ñawpaq taytanchikkunaman Diospa promesan qosqanta cumplinanpaqmi.

⁹Chaynataqmi Cristoqa hamurqa Diosninchikpa kuyapayakuyninmanta mana judío kaqkunapas yupaychanankupaq. Chuya Qellqapim kaynata nin: “Chayraykum llapa nacionkuna ukupi yupaychasqayki, sutikimantapas takisaqmi”, nispa.

¹⁰Qellqapiqa nichkantaqmi: “Llapallan nacionkuna kusikuychik, Diospa llaqtanwan kuska kusikuychik”, nispapas.

¹¹Huklawpipas nichkantaqmi: “Llapa nacionkuna Diosman yupaychaychik, llapa llaqtakuna Diosman takiychik”, nispapas.

¹²Isaiaspas kaynatam nirqa: “Sachapa sapin ikllirimuq hinam Isaipa miraynin rikurimunqa. Nacionkunata munaychakunanpaqmi payqa hamunqa, paypi confiakuspam llapallanku suyanqaku”, nispa.

¹³Confianzawan suyasqanchik Dios-ninchikyá haykam paypi iñiqkunata kusikuywan hinaspa hawkayaywan huntaykusunkichik, chaynapi Chuya Espiritupa atiyninwan aswan-aswan confiakuspa suyanaykichikpaq.

¹⁴Wawqe-panillaykuna, ñoqaqa yachanim qamkunaqa allin runakuna kasqaykichikta hinaspa allin yachaypa huntasqan kasqaykichikta, chaywan allin consejokunata qonakunaykichikpaq.

¹⁵Kay cartataqa mana imatapas pakaykuspam qellqamuchkaykichik, tukuy kaykunata mana qonqarunaykichikpaq. Kaytaqa ruwachkani Diospa kuyakuyninman hinam.

¹⁶Jesucristotaqa, servichkani mana judío kaqkunaman Diosmanta allin noticiakunata willakuspaymi, chaynapi paykunata Chuya Espíritu chuyanchaptin allin ofrendata hina Dios chaskinanpaq.

¹⁷Dios serviyniypiqa, Jesucristoraykullam ñoqaqa hatunchakuyman.

¹⁸Aswanqa Cristopa imam ñoqantakama ruwasqallanmantam rimayta munani. Paymi atiyninta qowarqa willakuptiy hinaspa ruwaptiy mana judío kaqkunapas payta kasukunankupaq.

¹⁹Paypunim señalkunata hinaspa milagrokunata Chuya Espiritupa atiyninwan ruwachiwarqa. Chaymi Cristomanta allin noticiakunata tukuy hinastinpi willakurqani, Jerusalenmanta qallaykuspay Ilírico lawkama.

²⁰Chaynatam kallpanchakurqani Cristomanta manaraq yachasqanku llaqtakunapi allin noticiakuna willakuyta. Chaynataqa ruwarqani hukpa hatarichisqanman mana chapukunaypaqmi.

²¹Chaynataqa ruwachkani imaynam Qellqapa nisqanman hinam. Qellqam kaynata nin: “Paymanta mana yachaqkunam rikunqaku, haykapipas mana uyariqkunam entiendenqaku”, nispa.

²²Chayraykum qamkuna watukuykuyta achka kutipi munachkaspaypas mana atimurqanichu.

²³Kunanmi ichaqa kay-lawkunapi llamkayniyta tukuruniña, chaymi ñawpaq watakunamantaraq qamkunawan tupaykuy munasqayman hina

²⁴Españaman rispay pasadallapas watukuykuyta munachkani, chaynapi pisi tiempollapas qamkunawan kusirikuptiy illasqaypi yanapaykuwanaykichikpaq.

²⁵Kunanqa Jerusalentaraqmi richka-ni wakpi iñiqmasinchikkunaman yana-pakuyta apaspay.

²⁶Kay yanapakuytam Macedoniapi hinaspa Greciapi yachaq wawqe-paninchikkuna kusikuyllawanña huñuykunku, Jerusalenpi wakcha iñiqmasinchikkunaman apachiwanankupaq.

²⁷Chaytaqa kikillankumantam ruwarqaku, hinaspapas ruwanankupunim karqa, paykunaqa debekuq hinam kachkanku judiokunapa yanapakuyninwan Diosta chaskikusqankumanta. Chaymi paykunapas iñiqmasinchik judiokunata wakchayayninkupi imapas kapuqninkuwan yanapananku.

²⁸Chaynaqa, kay yanapakuyta paykunaman aparuspayñam Españaman ristin pasadallapas watukaykamusqaykichik.

²⁹Cheqaptapuni qamkunaman watuka-muspayqa, Jesucristopa hatun bendicionninta aparikuspaymi hamusaq.

³⁰Chaynaqa, wawqe-panillaykuna, Señorninchik Jesucristoman iñisqanchikraykum hinaspa Chuya Espiritupa kuyakuy qowasqanchikraykum ruegakamuykichik tukuy sonqowan Diosta mañapuwanaykichikpaq.

³¹Diosta mañapuwaychik Judea lawpi kaq mana iñiqkunapa makinmanta libraykuwananpaq hinaspa Jerusalenpi kaq iñiqmasinchikkunapas kay yanapakuyta allinlla chaskiykunankupaq,

³²chaynapi Dios munaptinqa kusisqallaña chayaykamuspa qamkuna ukupi samarinaypaq.

³³Hawkayay qokuq Diosyá llapallaykichikwan kachun. Amén.