Read CHUYA QELLQA La Biblia en Quechua de Ayacucho 2012 Romanos 6 Bible Online

Romanos 6 - CHUYA QELLQA La Biblia en Quechua de Ayacucho 2012 bible

Romanos 6

¹Chaynaqa, ¿imanisuntaq? ¿Aswan-raqchu huchallikusun Diospa kuyakuynin aswan ñoqanchikpi ka-nanpaq?

²¡Manapunim! Huchapaq wañu-ruchkaspañaqa, ¿imaynataq huchapiraqqa kawsasun?

³¿Manachum yachankichik Cristo Jesuswan bautizasqa kaqkunaqa wañukuyninpi bautizasqa kasqanchikta?

⁴Chay bautismontakamam Cristowan kuska pampasqa kanchik, chaywanmi wañunchik wiñay kawsakuypaqña kawsarimunanchikpaq, imaynam Dios Tayta hatu-hatun atiyninwan Cristota kawsarichimusqanta hina.

⁵Sichum wañukuyninpi Cristoman hukllawakuspanchikqa, kawsarimuyninpipas paymantaqmi hukllawakusun.

⁶Kaytapas yachanchikmi: Ñawpaq vidanchikqa Cristowan kuskam chakatasqa karqa, huchallikuq sonqonchik tuñichisqa kananpaq, chaynapi hucha manaña munaychakuwananchikpaq.

⁷Pipas huchapaq wañuruspaqa huchamantam libreña rikurirun.

⁸Cristowan kuska wañukuspaqa paywan kuskataqmi kawsakusun.

⁹Yachanchiktaqmi kaytapas: Cristo kawsariramuspanqa manañam huktawanqa wañunmanñachu, wañuyqa manañam paypiqa munaychakunmanñachu.

¹⁰Cristoqa huk kutillatam huchanchikkunamanta wañurqa, kaw-sariramuspanñataqmi Diosllapaqña kawsachkan.

¹¹Chaynaqa, qamkunapas huchapaq wañusqaña kasqaykichiktayá hapikuychik, ichaqa Señorninchik Cristo Jesuswan hukllaña kasqaykichikraykum Diosllapaqña kawsankichik.

¹²Chaynaqa, amayá wañuruqlla cuerpoykichikpi hucha munaychakunantaqa saqeychikchu, nitaq mana allin munayninkunatapas kasuychikchu.

¹³Amataqyá mana allinta ruwananpaqqa cuerpoykichiktapas huchamanqa qoychikchu, aswanyá qamkunaqa wañusqamanta kawsarimuq hinaña cuerpoykichikta Diosman qoychik, chaynapi paypa munasqantaña ruwananpaq.

¹⁴¡Amayá huchaqa qamkunapiqa munaychakuchunchu! Qamkunaqa manañam leyman hinañachu kawsachkankichik, aswanqa Diospa kuyakuyninman hinañam.

¹⁵¿Hinaptinqa imatataq ruwasun? ¿Leyman hina manaña kawsaspa Diospa kuyakuyninman hinaña kawsasqanchikraykuchu, aswanraq huchallikusun? ¡Manapunim!

¹⁶Qamkunaqa yachankichikmi, sichum pipas huk patronta kasunanpaq hinaspa esclavon kananpaq entregakun, hinaspaqa chay kasukusqan patronpa esclavonmi rikurirun. Chayqa kaynam: Pipas huchata kasuspaqa wañuymanmi rinqa, Diosta kasukuspam ichaqa allin ñanpi kawsakunqa.

¹⁷¡Ichaqa Diosmanyá gracias kachun! Ñawpaqtaqa huchapa esclavonmi karqankichik, kunanmi ichaqa yachachikuykuna chaskisqaykichikta tukuy sonqomanta kasukuchkankichik.

¹⁸Chaynapim huchapa munaychakuyninmanta librasqaña kaspaykichik, imatapas allinta ruwaspa Diospa serviqninkunaña rikurirunkichik.

¹⁹Runa hinallam rimani, pisi iñiyniyuqllaraq kasqaykichikrayku. Imaynam ñawpaqta qanrakuspa mana allinllapi purinaykichikpaq cuerpoykichikta qorqankichik, chaynayá kunanpas cuerpoykichikta qoychik allintaña ruwaspa Diosllapaqña kawsanaykichikpaq.

²⁰Qamkunapi hucha munaychakuptinqa, allinkuna ruwaymantapas librem karqankichik.

²¹¿Huchapa munaychakusqanpi kawsaspaqa ima allintataq hurqokurqankichik? Aswanqa wañuyman apakuq kaqkunallatam. Chaykunamantam kunanqa penqakunkichik.

²²Huchamanta librakuruspam ichaqa Diospa sirvientenña rikurirunkichik, chayqa allinnikichikpaqmi hinaspa chuya kawsakuymi tukupayninñataqmi wiñay kawsayman apakun.

²³Huchapa pagonqa wañuymi, Diospa qowasqanchikmi ichaqa Señor-ninchik Jesucristowan kuska wiñaypaq kawsakuy.