Read CHUYA QELLQA La Biblia en Quechua de Ayacucho 2012 Romanos 8 Bible Online

Romanos 8 - CHUYA QELLQA La Biblia en Quechua de Ayacucho 2012 bible

Romanos 8

¹Chaynaqa, haykam Cristo Jesuswan hukllaña kaqkunapaqqa manañam ima condenacionpas kanñachu. Paykunaqa manañam aychaman hinañachu kawsanku, aswanqa Espirituman hinañam.

²Jesucristontakama kawsay qokuq Espiritupa leyninmi, wañuymantawan huchapa kamachikuyninmanta libraykuwan.

³Runa débil kasqanraykum leypa mana ruway atisqanta Dios ruwarun: Diosmi sapallan churinta huchasapa runaman rikchakuqta kachamurqa huchapa rantinpi wañunanpaq, chaynapi huchata paypa aychanpi puchukachinanpaq.

⁴Chaynataqa ruwarqa leypa nisqanta cumplinanchikpaqmi, chaynapi manaña aychanchikman hinañachu, aswanqa Espirituman hinaña kawsanapaq.

⁵Aychaman hina kawsaqkunaqa aychaman hinallam imatapas yuyaymananku, Espirituman hina kawsaqkunam ichaqa Espiritupa kaqkunapiña yuyaymananku.

⁶Aychapa munasqanman hina kawsayqa wañuymi, Espiritupa munasqanman hina kawsaymi ichaqa kawsaytawan hawkayayta qowanchik.

⁷Aychaman hina kawsaqkunaqa Diospa enemigonkunam, paykunaqa manam Diospa leynin kasukuyta munankuchu, nitaqmi ruwaytapas atinkuchu.

⁸Aychaman hina kawsaqkunaqa manam Diospaq hinachu.

⁹Qamkunam ichaqa mana aychaman hinañachu kawsankichik, aswanqa Espirituman hinañam, qamkunapi Diospa Espiritun kasqanrayku. Sichum runapi Cristopa Espiritun mana kaptinqa manam Cristopachu.

¹⁰Sichum Cristo qamkunapiña kaptinqa, aychaykichikqa hucharaykum wañusqaña kachkan, espirituykichikmi ichaqa kawsachkan, Diospuni mana huchayuqtaña ruwasusqaykichikrayku.

¹¹Sichum Jesucristota wañusqanmanta kawsarichimuqpa Espiritun qamkunapi kaptinqa, Jesucristota wañusqanmanta kawsarichimuqmi wañuq cuerpoykichiktapas qamkunapi kaq Espirituntakama kawsarichimunqa.

¹²Chaynaqa, wawqe-panillaykuna, manam aychatachu debekunchik aychaman hina kawsanapaqqa.

¹³Aychaman hinalla kawsaspaykichikqa wañunkichikmi; Chuya Espirituman hina aychapa ruwayninkunata wañuchispam ichaqa kawsankichik.

¹⁴Diospa Espiritunpa pusasqankunaqa llapallankum Diospa churinkuna.

¹⁵Qam-kunaqa manam esclavo kanaykichikpaq espiritutachu chaskirqankichik huktawan manchakuypi kanaykichikpaqqa, aswanqa Diospa churinña kanaykichikpaq Espiritutam chaskirqankichik, chayraykum Diostapas: [2]“Abba Padre” nispa ninchik.

¹⁶Kikin Espiritum willan espiritunchik-man Diospa churinña kasqanchikta.

¹⁷Churinña kaptinchikqa paypa tukuy iman kaqkunapas ñoqanchikpañam, chaynapim Jesucristowan kuska herenciata chaskisun. Cristo hina ñakarispaqa paywan kuskataqmi hatunchasqa kasunchik.

¹⁸Yachasqayman hinaqa, kunan tiempo ñakarisqanchikqa, manam imallapipas rikchakunchu hamuq punchawkunapi kancharichkaq kawsayta kikin Diospa qowananchikwanqa.

¹⁹Tukuy ima unan-chasqa kaqkunam sinchi munakuywan suyachkanku churinkunaña kasqanchikta Dios reqsichinanta.

²⁰Lliw unanchasqakunapas mana valeqñam rikurirurqa, chaynaqa karqa manam kikillanmantachu, Diosmi chaynapaq munarqa confianzawan suyanankupaq.

²¹Lliw imapas unanchasqakunaqa tukuruqllam, ichaqa suyachkanmi Dios librananta. Churinkunata Dios hatunchaspan libraptinmi tukuy imapas paykunawan kuska librakunqa.

²²Yachasqanchikpi hinam Diospa tukuy ima unanchasqankunaqa kunankama ñakarichkan, yaqa wachakuywan ñakarichkaq warmi hina.

²³Ichaqa manam payllachu, ñoqanchikpas Chuya Espirituta chaskichkaspapas chaynatam ñakarichkanchik. Sonqonchikpi waqaspam suyachkanchik Diospa churichakuykuwananchik punchawta, chay punchawpim cuerponchikta libraykunqa.

²⁴Chay suyasqanchikwanmi salvasqa kanchik. Confiakuspaqa suyachkanchik mana rikusqanchik kaqta chaskinanchikpaqmi. Chaynaqa, ¿imapaqmá suyachwan makinchikpiña suyasqanchik kachkaptinqa?

²⁵Suyasqanchikta manaraq qawachkaspaqa pacienciakuspam confianzawan suyananchik.

²⁶Pisi kallpayuq kaptinchikmi Chuya Espíritu yanapawanchik. Manam imayna mañakuytapas yachanchikchu, ichaqa Chuya Espiritum Diosta mañapuwanchik runapa mana rimay atisqan rimaykunawan.

²⁷Llapa runakunapa sonqon reqsiq Diosmi yachan Chuya Espiritupa imam nisqanta. Payqa Diospa munasqanman hinam llapallan iñiqkunapaq mañapun.

²⁸Ñoqanchikqa yachanchikmi, Dios kuyaqkunataqa tukuy imapas allinninpaqmi yanapan, chaykunaqa yanapan haykam munasqanman hina qayasqankunatam.

²⁹Diosqa ñawpaqmantaraq reqsisqankunatam Churinman rikchakuqña kanankupaq akllaykurqa, chaynapi Churin Cristoqa llapallanchikpa piwi wawqenchik kananpaq.

³⁰Ñawpaqmantaraq akllasqankunatam qayaykun, qayasqankunatañataqmi mana huchayuqtaña ruwaykun; mana huchayuqtaña ruwasqankunatañataqmi hatunchaykun.

³¹Chaynaqa, ¿imatawanraqtaq nichwanchik? Sichum Dios ñoqanchikwan kaptinqa, ¿pitaq ñoqanchikpa contranchikpi kanman?

³²Sichum Diosqa kikinpa Churintapunipas rantinchikpi wañunanpaq qowachkaspanchikqa, ¿manachum Churintawan kuskata tukuy imatapas mana imallapaq qowasunchik?

³³Diosmi mana huchayuqtaña ruwawaqninchikqa, hinaptinqa, ¿pitaq Diospa akllasqankunata acusanman?

³⁴¿Pitaq condenawachwanchik? Cristom wañuspan kawsarimurqa, hinaspam Diospa alleq lawninpi kaspan ñoqanchikpaq mañakuchkan.

³⁵¿Pitaq Cristopa kuyakuyninmanta rakiwachwan? ¿Sasachakuychu, llakikuychu, qatikachasqa kaychu, yarqaychu, wakchayaychu, wañuypa patanpiña kaychu, icha wañuychu?

³⁶Chuya Qellqapim kaynata nin: “Qamraykum sapa punchaw wañuypa patanpi kachkaniku, nakanapaq ovejakunata hinam qawawanku”, nispa.

³⁷Astawanqa tukuy kaykunatam vencenchik kuyawaqninchik Señorninchik Jesucristontakama.

³⁸Chayraykum yachakuni, wañuypas, kawsaypas, angel-kunapas, mayna atiyniyuqkunapas, maynaña munaychakuqkunapas, kunan kaqpas, hamuq kaqpas,

³⁹altopi kaqpas, uku-ukupi kaqpas, nitaq ima unan-chasqa kaqkunapas, Señorninchik Jesucristontakama Diospa kuyakuynin qowasqanchikmantaqa manam imapas rakiwasunchu.