Read CHUYA QELLQA La Biblia en Quechua de Ayacucho 2012 1~Corintios 3 Bible Online

1~Corintios 3 - CHUYA QELLQA La Biblia en Quechua de Ayacucho 2012 bible

1~Corintios 3

¹Chaywanpas wawqe-panillaykuna, qamkunamanqa rimarimuykichik manam Chuya Espirituwan kawsaq runakunaman hinachu, aswanqa aychapa munasqallanpi kaqkunaman hinam, otaq Cristoman chayraq iñiqkunaman hinam.

²Ñuñuq wawaman leche tomachichkaq hinam fácil kaqkunallata yachachirqaykichik, qamkunaqa manaraqmi mikuytaqa atirqankichikchu, kunanpas manaraqmi llasaq mikuytaqa atiwaqchikraqchu.

³Qamkunaqa aychaman hinallaraq kawsasqaykichikraykum envidianakunkichik, liryanakunkichik hinaspa cheqninakunkichik. Chaykunata ruwaspaqa, ¿manachum aychaman hinallaraq hinaspa runakunapa ruwasqanman hinallaraq kawsachkankichik?

⁴Qamkunam ninkichik: Ñoqaqa Pablopam kani, nispa. Wakinñataqmi ninku: Ñoqaqa Apolospam kani, nispa. Chaynakunata rimaspaqa, ¿manachu aychaman hinallaraq kawsachkankichik?

⁵Aswanqa, ¿pitaq Apolosqa? ¿Pitaq ñoqaqa kani? Ñoqaykuqa Diospa serviqnillanmi kaniku, ñoqaykutakamam iñikurqankichikpas, ñoqaykuqa sapakamam Señorpa qowasqankuta ruwarqaniku.

⁶ Ñoqam tarpurqani, Apolosñataqmi parqorqa, ichaqa Diosmi wiñachirqa.

⁷Chaynapiqa tarpuqpas, parqoqpas manam imachu, aswanqa Diosllam plantakunataqa wiñachin.

⁸Tarpuqwan parqoqqa chay hinallam kanku, ichaqa llamkasqankuman hinam sapakamaman Dios pagapunqa.

⁹Ñoqaykuqa Diospa llamkapakuqninmi kaniku, qamkunañataqmi kankichik Diospa llamkasqan chakra hinaspa Diospa ruwasqan wasi.

¹⁰Ñoqaqa Diospa qowasqan kuyakuywanmi maestro albañil hina kani, hinaptinmi ñoqa cimientota churarqani hukñataqmi chaypa hawanman perqan, chay perqaqkunaqa sapakamam imam perqasqankuta cuidadowan ruwananku.

¹¹Manam pipas sapaq cimiento churaytaqa atinmanchu cimiento churasqaña kachkaptinqa, chay cimientoqa kikin Jesucristom.

¹²Sichum pipas kay cimientopa hawanpi perqanman qoriwan, qollqewan, alhaja rumiwan, tablawan, pajawan chaynataq soqoswanpas,

¹³hinaptinqa sapakamapa llamkasqanmi juicio punchawpi qawasqa kanqa, chay punchawmi sapakamapa ruwasqanta nina pruebanqa allin kaptin otaq mana allin kaptinpas.

¹⁴Pipapas perqasqan ninawan pruebasqa kachkaspan mana ruparuptinqa pagontam chaskinqa.

¹⁵Sichum perqasqan ruparuptinqa lliwtam pierderunqa, ichaqa ninamanta ayqechkaq hinam kikinpas salvakunqa.

¹⁶¿Manachum yachakunkichik Diospa templon kasqaykichikta chaynataq Diospa Espiritunpas qamkunapi yachasqanta?

¹⁷Sichum pipas Diospa templonta tuñichiqtaqa Diosmi paytapas tuñirachinqa, Diospa templonqa chuyam, chay temploqa qamkunam kankichik.

¹⁸Amayá kikillaykichikqa engañakuychikchu, pipas kay pachapi yachaykunawan yachaq tukuqqa, mana yachayniyuq hinallam kanan, chaynapi cheqap yachayniyuq kananpaq.

¹⁹Kay pachapi yachaykunaqa Diospa qayllanpiqa mana valeqmi. Imaynam Qellqapa kayna nisqanman hina: “Diosmi trampawan hapichkaq hina yachaysapakunataqa kikinpa sakri kaynillanpi hapirun”, nispa.

²⁰Huklawpipas nichkanmi: “Señorqa yachaysapakunapa piensasqantaqa yachanmi, chaykunaqa mana valeqlla kasqantapas yachanmi”, nispa.

²¹Chaynaqa, amayá runakunamantaqa alabakuychikchu, llapallan ima kaqkunapas qamkunapam.

²²Pablopas, Apolospas, Pedropas, kay pachapas, kawsakuypas, wañuypas, kunan kaqpas, hamuq kaqpas, llapallanmi qamkunapa.

²³Qamkunaqa Cristopam kankichik, Cristoñataqmi Diospa.