Read CHUYA QELLQA La Biblia en Quechua de Ayacucho 2012 2~Corintios 5 Bible Online

2~Corintios 5 - CHUYA QELLQA La Biblia en Quechua de Ayacucho 2012 bible

2~Corintios 5

¹Yachankichikmi, sichum purmaruq wasi hinalla kay cuerponchik chinkaruptinqa Diosmi hanaq pachapi wiña-wiñaypaq wasita ruwapuwachkanchik, chayqa manam runapa makinwan ruwasqachu.

²Kay pachapiraq kaspaqa maynatam munanchik hanaq pachapi kaq wasinchikmanta otaq musoq pachawan hina churakunanchikmanta.

³Chaypi kaspaqa pachayuqmi kasunchik, manam qalallañachu.

⁴Kay wasillanchik-piraq otaq cuerpollanchikpiraq kawsas-paqa ancha llakisqam kachkanchik, ichaqa pachanchik llatanarachikuytaqa manachá munachwanchu, aswanqa pachapasqa kaytam munachwanqa, chaynapi wañuyta kawsay vencerunanpaq.

⁵Kayna kanapaq ruwawaqninchikqa Diosmi, paymi garantiata hina Chuya Espirituta qowarqanchik.

⁶Chaynapim confiakuspa kawsachkanchik, yachanchikmi aycha cuerpopi kawsananchikkamaqa, manaraqmi Señorwan kuskachu kachkanchik.

⁷Iñiyllawanmi kawsachkanchik, manam ñawinchikpa qawasqanwanchu.

⁸Ichaqa confiakuspam kachkanchik, maynatachá munachwan cuerponchikta saqeruspa Señorwanña kawsakuyta.

⁹Chayraykum wañuspapas kawsaspapas Señorpa munasqan ruwayta munanchik.

¹⁰Ichaqa llapallanchikmi Cristopa qayllanman rikurinanchik, chaynapi kay pachapi kawsaspa allinpas otaq mana allinpas ruwasqanchikman hina tocaqninchikta sapakama chaskinanchikpaq.

¹¹Chaymi Señorqa kasukuna kasqanta yachasqaykurayku runakunata iñichiypi riniku. Ichaqa Diosmi yachan imaynam kasqaykutapas, chaymi qam-kunapas reqsiwanaykikuta munach-kaniku.

¹²Manam huktawanchu kiki-llaykumanta alabakuchkaniku, kaykunataqa rimapayachkaykiku huktawan ñoqaykumanta kusikunaykichikpaqmi hinaspa hawallanta qawaspa alabakuqkunata kutipakunaykichikpaqmi. Paykunaqa manam sonqonkupi kaqwanchu alabakunku.

¹³Loco hinapas kaniku Diospaqmi, yuyayniyuqpas kaniku qamkunapaqtaqmi.

¹⁴Cristopa kuyakuyninmi ñoqanchikpi munaychakun, llapallanchikpa rantinchikpi Cristopa wañusqanta yachaspaqa, yachanchiktaqmi wañusqa hinaña kasqanchikta.

¹⁵Cristoqa llapallanchikpaqmi wañurqa, chaynapi kawsaqkunapas manaña kikillanchikpaq kawsaspa Cristopaqña kawsananchikpaq, payqa wañukuspanmi kawsarimurqa.

¹⁶Kunanmantaqa manam pimantapas aychaman hinañachu piensaniku, ñawpaqtam ichaqa Cristomantapas aychaman hinalla piensarqaniku, kunanqa manañam chaynatachu piensaniku.

¹⁷Chaynaqa, pipas Cristopi kaqqa musoq runañam, ñawpaq kaqkunaqa pasarunñam, kunanqa lliwmi musoqña.

¹⁸Tukuy kaykunaqa Diosmantam hamun. Paymi Jesucristopa ruwasqallanwan kikinwan allinyanachiwanchik hinaspam kamachiwanchik runakunata paywan allinyanachinanchikpaq.

¹⁹Diosmi Cristopi kachkarqa kay pachapi runakunata mana huchayuqpaqña hapispa kikinwan allinyanachinanpaq. Paymi kamachiwarqanchik allinyanakuymanta willakunanchikpaq.

²⁰Chaynaqa, Cristopa rantinpi willakunaykupaq churasqam kaniku, Diosmi ñoqaykutakama qamkunaman rimapayasunkichik. Cristopa sutinpim ruegakuykiku Dioswan allinyanakunaykichikpaq.

²¹Cristoqa manam huchallikurqachu, ichaqa ñoqanchikraykum huchanchikkunata Dios qepiykachirqa, chaynapi Cristowan huklla kaspanchik Diospa munasqanman hinaña kawsananchikpaq.