Read CHUYA QELLQA La Biblia en Quechua de Ayacucho 2012 Gálatas 2 Bible Online

Gálatas 2 - CHUYA QELLQA La Biblia en Quechua de Ayacucho 2012 bible

Gálatas 2

¹Chunka tawayuq watamantañam Bernabeywan kuska huktawan rirqani Jerusalén llaqtaman, pusarqanitaqmi Titotapas.

²Rirqaniqa revelacionpi Diospuni Jerusalenman riy niwaptinmi. Chaypim lliw iñiqkunaman willarqani, mana judío kaqkunaman allin noticia imayna willakamusqaymanta, kamachiqninkuwanpas sapaqpi huñunakuspaymi willarqani, chaynapi Jesucristomanta willakamusqay mana yanqa kananpaq.

³Chaynapim ñoqawan riq Titotapas mana judío kachkaptinpas mana kamachirqakuchu judío hina señalachikunanpaq.

⁴Chaywanpas wakin runakunam iñiqmasinchik tukuspanku yaykuramurqaku, tukuy ima ruwasqaykuta wateqawanankupaq, hinaspam Jesucristo librawasqanchikta mana munaspa llumpay sasa kamachikuykuna kasukunaykuta munarqaku.

⁵Chaywanpas ñoqaykuqa manam imaraykupas kasukurqanikuchu, chaynataqa ruwarqaniku cheqap allin noticia qamkunapi sapinchakunanta munaspam.

⁶Ichaqa allin reqsisqapaq hapisqanku kamachikuqkunapas manam ima musoq yachachikuytapas niwarqakuchu. Llumpay reqsisqa kasqankupas ñoqapaqqa manam imananchu. Diosqa manam pimanpas sayapakunchu.

⁷Ichaqa, imaynam Pedrota Dios akllarqa judiokunaman willakunanpaq, chaynam ñoqatapas Dios akllawarqa mana judío kaqkunaman allin noticia willakamunaypaq.

⁸Kikin Diosmi, Pedrotaqa judiokunapa apostolnin kananpaq kamachirqa, chaynam ñoqatapas mana judío kaqkunapa apostolnin kanaypaq kamachiwarqa.

⁹Jacobowan, Pedro hinaspa Juanmi iñiqkunapa kamachiqninkuna karqaku, paykunam Diospa kuyakuynin qowasqanta yachaykuspanku ñoqatawan Bernabeyta alleq makinkuwan hapiykuwarqaku llamkaqmasinkuña kanaykupaq, hinaspam kamachiwarqaku mana judío kaqkunaman willakunaykupaq, paykunañataq Judío kaqkunaman willakunankupaq, nispa.

¹⁰Kunawarqakutaqmi wakchakunata mana qonqarunaykupaqpas, chaytaqa tukuy sonqoywanmi ruwachkani.

¹¹Antioquía llaqtaman Pedro hamuruptinmi pantaypi kasqanmanta uyanpipuni qaqcharqani.

¹²Paymi puntata mana judío kaq iñiqkunawan kuska mikuq, aswanqa Jacobo partidomanta kaqkuna chayaramuptinkum, Pedroqa mana judío kaqkunawanqa manaña mikuyta munarqañachu, qari kayninkupi señalachikuyman hapipakuqkunata manchakusqanrayku.

¹³Wakin judiokunamanta iñiqkunapas iskay uyakuykuspankum Pedropa ruwasqanta qatipakurqaku. Bernabeypunipas chaykunawanmi aysachikurqa.

¹⁴Cheqap allin noticiaman hina mana kawsasqankuta qawaspaymi llapa iñiqkunapa qayllanpi Pedrota nirqani: ¿Qamqa judío kachkaspaykichu huklaw runakuna hinaraq kawsachkanki? hinaspaykiqa, ¿imanasqamá huklaw runakunataqa judío hina kawsanankupaqqa hikutachkanki? nispa.

¹⁵Ñoqanchikqa nacesqanchikmantapunim judío kanchik, manam huklaw llaqtayuq huchasapa runakuna hinachu.

¹⁶Ichaqa yachanchikmi runaqa manam leyta kasukusqanraykuchu pampachasqaqa kanman, aswanqa Jesucristoman iñikusqanraykullam, chaynataqmi ñoqanchikpas Jesucristopi iñirqanchik mana huchayuqpaqña Diospa chaskisqan kananchikpaq, manam leyta kasukusqanchikraykuchu, aswanqa Diospi iñisqanchikraykullam. Manam pipas leyta kasukusqanraykuchu mana huchayuqpaqqa hapisqa kanku.

¹⁷Mana huchayuqpaqña Dios chaskiwanankupaq Jesucristoman iñikuspaykuqa huchasapa kasqaykutam reqsikuchkaniku. ¿Ima ninantaq kayqa? ¿Cristochu huchallirachiwanku? ¡Manapunim!

¹⁸Sichum imatapas tuñirachispay kaqllamanta hatarirachispayqa, kikiymi huchayuq kani.

¹⁹Ñoqaqa kikin leynintakamam leypaqa wañuruniña, chaynapi Diosllapaqña kawsanaypaq.

²⁰Jesucristowan kuskam chakatasqa kachkani, manam ñoqañachu kawsani, aswanqa Cristoñam ñoqapi kawsachkan, kay pachapi kawsaspayqa Diospa Churinman iñikuspallam kawsachkani, paymi kuyawaspan ñoqapa rantiypi wañupuwarqa.

²¹Chaynaqa, manam wischupakuymanchu Diospa kuyawasqantaqa, sichum kamachikuykunallata kasukuspa mana huchayuqpaqña chaskisqa kachwan, hinaptinqa yanqapaqchiki Jesucristopas wañurqa.