Read CHUYA QELLQA La Biblia en Quechua de Ayacucho 2012 Gálatas 4 Bible Online

Gálatas 4 - CHUYA QELLQA La Biblia en Quechua de Ayacucho 2012 bible

Gálatas 4

¹Kaytapas niymantaqmi: Pipas warmallaraq kaspanqa manaraqmi herenciataqa chaskinmanchu warmallaraq kasqanrayku. Payqa wasinpi esclavo hinallaraqmi kachkan dueñopuni kachkaspapas.

²Payqa uywaqnin runakunapa nanachikusqallaraqmi kachkan, taytanpa nisqan punchaw chayamunankama.

³Chaynataqmi ñoqanchikpas warmallaraq kaspaqa kay pachapi mana allin costumbrekunapa esclavon karqanchik.

⁴Aswanqa chay punchaw chayaramuptinmi Dios Tayta kuyasqan Churinta kachamurqa, paymi warmimanta nacespa lliw judiokuna hina leyta kasukurqa.

⁵Payqa hamurqa leyman hina castigasqa kananchikmanta librawananchikpaqmi, chaynapi Diospa churinña kasqanchikta chaskinanchikpaq.

⁶Churinkunaña kaptinchikmi, Diosqa Churinpa Espiritunta sonqonchikman kachamurqa, chay Espiritum rimachiwanchik [1]“Abba Padre”, nispa.

⁷Chaynaqa, manam esclavo hinañachu kanchik, aswanqa Diospa churinñam. Churinña kasqanchikraykum herenciatapas Diosmanta chaskisunchik.

⁸Ñawpaq tiempopiqa Diosninchikta mana reqsisqaykichikraykum, kay pachapi dioskunata servirqankichik.

⁹Kunanmi ichaqa cheqap Diostaña reqsirunkichik otaqmi payña reqsirusunkichik, hinaptinqa, ¿imaynampimá kay pachapi ñawpaq yachachikuykuna kasukuqqa kutiriwaqchik? ¿Huktawanchu esclavo kayta munankichik?

¹⁰Qamkunaqa hina-llaraqmi waqaychachkankichik punchaw-kunata, killakunata, tiempokunata hinaspa watakunata.

¹¹Llumpaytam manchakuchkani yanqapaqchusmi qamkuna ukupi llamkasqayqa karunqa, nispay.

¹²Wawqe-panillaykuna, ruegakuyki-chikmi ñoqa hinaña kanaykichikpaq, ñoqaqa qamkuna hinañam kachkani, ichaqa manam qamkunaqa imanawarqankichikchu.

¹³Yachasqaykichikpi hinapas puntataqa onqorusqayraykuñam allin noticiataqa willarqaykichik.

¹⁴Chay onqoyniyqa qamkunapaqmi prueba hina karqa, ichaqa manam despreciawarqankichikchu nitaqmi qarqoruwarqankichikchu, aswanqa Diospa angelninta hinaraqmi otaq Jesucristotapas hinaraqmi chaskiwarqankichik.

¹⁵¿Maytaq chay llumpay kusikuynikichikqa? Ñoqaqa allintam reqsikichik, qamkunawan kaptiyqa ñawikichiktapas hurqokuruwaqchikmi karqa ñoqaman qoykuwanaykichikpaq.

¹⁶Chaynaqa, ¿qamkunaman cheqap nisqaymantachu enemigoykichikpaq hapiwankichik?

¹⁷Chay runakunaqa yanqallam qamkunamanta nanachikuq tukunku. Paykunaqa munachkanku ñoqamanta rakikuruspaykichik paykunataña qatinaykichiktam.

¹⁸Allinmi kanman huk runamanta nanachikuyqa, sichum allinnikichikta ruwayta munaptinqa. Chaynataqa tukuy tiempoyá ruwaychik, amayá chaypi qamkunawan kaptillaychu.

¹⁹Churillaykuna, huktawanmi qamkunamanta wachakuq warmi hina ñakarichkani. Chaynachiki ñakarisaq Cristoman rikchakuq kanaykichikkama.

²⁰Ima allinraq kanman kunanpuni qamkunawan chaypi rikuriruyman, chaynapi aswan sumaqtaraq qamkunata rimapayanaypaq. Qamkunamantam mana imayna ruwaytapas atinichu.

²¹Leyman hapipakuy munaqkuna niykuwaychik: ¿Entiendenkichikchu leypa imam nisqanta?

²²Chuya Qellqapim kaynata nichkan: “Abrahampam iskay churinkuna karqa, hukninmi karqa esclavan warmipi, hukninñataq libre kaq warminpi”.

²³Chay esclava warmipa wawanqa runapa munasqanman hinallam nacerqa, libre kaq warminpa wawanñataqmi Diospa promesanman hina nacerqa.

²⁴Kay iskay warmikunam rikchakun iskaynin pactoman, huknin pactom Sinaí orqomanta hamun, chaytam esclava Agarwan rikchanachinchik, paymi wawakunata wachakun esclavo kanankupaq.

²⁵Agartaqa rikchanachichwantaqmi Arabia lawpi Sinaí orqowanpas. Chay orqotañataqmi rikchanachichwan Jerusalén llaqtawan, chaypi yachaqkunaqa leypa esclavan kasqankuraykum mana librechu kachkanku.

²⁶Aswanqa hanaq pachamanta kaq Jerusalenqa librem, chaymi ñoqanchikpa mamanchik.

²⁷Chuya Qellqapim kaynata nin: “¡Yaw, mana wachakuq qolluq warmi, kusikuymanta qapariy! ¡Yaw, mana wachakuy reqsiq warmi, kusikuymanta qapariy! Qosanpa saqesqan warmiraqmi wawasapapas kanqa, qosanwan kuska kaq warmimantaqa”, nispa.

²⁸Wawqe-panillaykuna, ñoqanchikqa qolluqpa wawan Isaac hinam Diospa prometekusqan churinkuna kanchik.

²⁹Imaynam chay tiempopi runapa munasqanman hinalla naceq warma, Espiritupa munayninman hina naceq warmata ñakarichirqa, chaynam kunanpas ñoqanchikta runakuna ñakarichiwanchik.

³⁰Ichaqa, ¿imanintaq Qellqaqa? Kaynatam nin: Kay esclavata wawantinta qarqoy, kay esclavapa wawanqa manam herenciataqa chaskinmanchu libre warmipa wawan hinaqa, nispa.

³¹Wawqe-panillaykuna, ñoqanchikqa manam esclavapa wawanchu kanchik, aswanqa libre warmipa wawanmi.