Read CHUYA QELLQA La Biblia en Quechua de Ayacucho 2012 Gálatas 5 Bible Online

Gálatas 5 - CHUYA QELLQA La Biblia en Quechua de Ayacucho 2012 bible

Gálatas 5

¹Cristom judiokunapa kamachikuyninkunamanta librawarqanchik. Chaynaqa, qaqa hina sayaspayá amaña yugoman watasqa esclavo hina kawsaymanqa kutiriychikchu.

²Ñoqa Pablopa nisqaytayá uyariychik: Judiokuna hina señalachikuptikichikqa Cristoman hapipakuynikichikpas yanqapaqmi kanqa.

³Huktawanmi nimuykichik: Pipas judío hina señalachikuqqa munay mana munaymi llapallan leykunata kasukunan.

⁴Wakiqnikichikmi ninkichik: Leyta kasukuptillanchikmi mana huchayuqpaqña Dios chaskiwasun, nispaykichik. Chaynata nispaykichikmi Jesucris-tomantawan Diospa kuyakuyninmanta karunchakurunkichik.

⁵Ñoqanchikmi ichaqa Chuya Espiritupa yanapakuy-ninwan, mana huchayuqpaqña chaskisqa kananchikpaq iñiyllanchikwan suyachkanchik.

⁶Jesucristowan huklla kaptinchikqa manam imananchu qari kayninchikpi señalasqa otaq mana señalasqa kayninchikpas. Iñiyllam valenqa, chay iñiyqa kuyakuywan ruwaypim qawachikun.

⁷Qamkunaqa allintam kallpachkar-qankichik, hinaptinqa, ¿pitaq harka-rusurqankichik cheqap kaqta manaña kasukunaykichikpaqqa?

⁸Chay yachachikuykunaqa manam qayasuqnikichik Diosmantachu hamun.

⁹Ninkum: “Aslla levaduraqa achka masatam poqochin”, nispanku.

¹⁰Ñoqaqa Señorpim hapipakuchkani, yachachisqaypa contranpi mana hukmanyanaykichikpaq. Haykam pantachiy munasuqnikichikkunataqa pi mayña kaptinpas Diosmi castiganqa.

¹¹Wawqe-panillaykuna, sichum “Seña-lachikuychik” nispayraq yachachiptiyqa, ¿imanasqamá qatikachawachkankuqa? Chayna kaptinqa Jesucristopa cruzpi wañusqanmanta willakuptiyqa manachiki paykunataqa piñachinmanchu.

¹²Aswanqa “qari-kaynikichikpi señalakuychik” nispa yachachiqkunaqa ojalataqya hukllatañapas lliwta kuchurachikunmanku.

¹³Wawqe-panillaykuna, Diosqa libre kanaykichikpaqmi qayasurqankichik. Ichaqa libre kaynikichiktaqa amayá aychapa munasqanpaq hinachu hapiychik, aswanqa kuyakuywanyá huknikichikmanta huknikichikkama yanapanakuychik.

¹⁴Diosmi kamachiwarqanchik: “Kuyankim runamasikita kikikita hina”, nispa. Lliw leykunam kay huk kamachikuyllapi huñunakun.

¹⁵Sichum kikikichikpura kachunakuspa mikunakuspaykichikqa, cuidakuychikyá yanqañataq tuñichinakuspa tukunakuruwaqchik.

¹⁶Chaynaqa, nimuykichikmi: Chuya Espiritupa munasqanman hina kawsaspaqa, aychapa munasqantaqa amaña ruwaychikchu.

¹⁷Aychapa munasqanqa Chuya Espiritupa contranpim kachkan, Chuya Espiritupa munasqanñataqmi aychapa munasqankunapa contranpi kachkan. Iskayninku contranakuptinmi munasqaykichik ruwaytaqa mana atinkichikchu.

¹⁸Chuya Espíritu pusasuptikichikmi ichaqa manaña leypa munaychakusqanchu kachkankichik.

¹⁹Suti reqsiyllam aychapa munayninkunaqa, chayqa kaykunam: Waqllikuykuna, uywanakuykuna, millakuypaq ruwaykuna, manaña penqarikuspa qanrakuykuna,

²⁰ídolo yupaychaykuna, layqanakuykuna, cheqninakuykuna, liryanakuykuna, envidiakuykuna, piñakuykuna, kikillanpaq imapas munaykuna, rakinakuy hatarichiykuna, pantaywan apachikuykuna,

²¹hukpa kaqnin munapayaykuna, [2](wañuchinakuykuna), upyakuykuna, mikuysapa kaykuna hinaspa chaykunaman rikchakuq tukuy rikchaq huchakuna. Ñawpaq nisqaytam huktawan nimuykichik: Chayna huchakuna ruwaqkunaqa manam Diospa munaychakusqanmanqa yaykunqakuchu.

²²Chuya Espiritupa ruruyninñataqmi kaykuna: Kuyakuy, kusikuy, hawkayay, pacienciakuy, sumaq sonqoyuq kay, kuyapayakuy, iñiyniyuq kay,

²³llampu sonqolla kay hinaspa genionchik controlakuy. Kay allin ruwaykunapa contranpiqa manam ima leypas kanchu.

²⁴Haykam Jesucristopiña kaqkunaqa aychapa munasqantaqa, munapayayninkunatawan kuskatam chakatarunchikña.

²⁵Sichum Chuya Espirituman hina kawsaspaqa, Chuya Espirituman hinataqyá purisunpas.

²⁶Amayá hatun tukuqqa kasunchu, hukninchikmanta hukninchikwanqa ama piñanakusunchu nitaq envidianakusunchu.