Read CHUYA QELLQA La Biblia en Quechua de Ayacucho 2012 Efesios 1 Bible Online

Efesios 1 - CHUYA QELLQA La Biblia en Quechua de Ayacucho 2012 bible

Efesios 1

¹Diospa munasqanman hina Cristo Jesuspa apostolnin ñoqa Pablom, Éfeso llaqtapi Jesucristoman iñispa payllapaqña sapaqchakuspa kawsaqkunaman qellqamuykichik.

²Dios Taytanchikwan Señorninchik Jesucristoyá kuyapayakuynintawan hawkayayninta qamkunaman chaq-churimuchun.

³Señorninchik Jesucristopa Dios Taytanyá qapaqchasqa kachun, paymi Cristowan huklla kasqanchikrayku hanaq pachamanta kaq espiritual bendicionkunata qoykuwanchik, hanaq pachapiñapas kachkachwanchik hina.

⁴Manaraqpas kay pacha unanchasqa kachkaptinmi Diosqa Cristorayku akllawarqanchikña, chaynapi paypa qayllanpi mana chikanpas huchayuq kaspa payllapaqña kawsananchikpaq.

⁵Kuyakuqllaña kaspanmi ancha munasqanman hina ñawpaqmantaraq akllawarqanchikña Jesucristorayku churinkuna kananchikpaq.

⁶Kaytaqa ruwarqa hatu-hatun kuya-payakuyninwan Churinrayku bendeciwasqanchikmanta Diosta sapa kuti yupaychananchikpaqmi.

⁷Diosmi kuyawaspanchik Churin Jesu-cristopa yawarninwan huchanchikkunata pampachaykuwaspanchik libra-warqanchik.

⁸Diosmi kuyakuyninta ñoqanchikman llimpariqta qowarqanchik, chaynapi yachayniyuq hinaspa allin yuyayniyuq kananchikpaq.

⁹Paymi munasqanman hina ñawpaqmantaraq pakasqa kaqkunata Cristontakama imam ruway munasqanta reqsichiwarqanchik.

¹⁰Chaykunapi ruwananpaq tiempo chayaramuptinmi kay pachapi kaqkunatapas chaynataq hanaq pachapi kaqkunatapas llapallanta Dios hukllawanqa, chaykunata munaychakunanpaqmi Cristota churanqa.

¹¹Tanteasqanman hina ruwaq Diosmi, Señorninchik Jesucristontakama munasqanman hina ñawpaqmantaraq akllawarqanchik, akllawarqanchikqa Cristowan huklla kaptinchik herenciata chaskinanchikpaqmi.

¹²Ñawpaqmantaraqmi Cristopi suyarqanchik, chaynapi ñoqanchiktakama hatun atiyniyuq Dios yupaychasqa kananpaq.

¹³Cheqap allin noticiata uyarispam Cristoman iñikurqankichik salvo kanaykichikpaq, chayraykum Diosllapaqña kanaykichikpaq prometekusqan Chuya Espirituwan sellasqa kachkankichik.

¹⁴Chuya Espirituqa herencia chaskinanchiktam garantizan llapallan rantisqankunata Dios libranankama, chaynapi hatun sumaq kancharichkaq kayninmanta yupay-chananchikpaq.

¹⁵Chayraykum qamkunamanta uyarirqani Señorninchik Jesucristopi iñiyniyuq kasqaykichikta hinaspa llapallan iñiqmasinchikkuna kuyasqaykichikta.

¹⁶Chaymi mañakuyniykunapi tukuy tiempo qamkunamanta Diosman graciasta qoni.

¹⁷Señorninchik Jesucristopa Atiyniyuq Dios Taytantam mañakuch-kani Espiritunwan yachayniyuq kay atiyta qosunaykichikpaq, chaynapi qamkunaman reqsichikuptin cheqapta reqsinaykichikpaq.

¹⁸Mañakuchkanitaqmi yuyayma-naynikichikta Diospuni kanchaykunanpaq, chaynapi qayasusqaykichikrayku confianzawan suyasqaykichikta yachanaykichikpaq hinaspa Diosllapaqña kawsaqkunawan chay kancharichkaq qosusqaykichik herenciamanta yachanaykichikpaq.

¹⁹Mañakuchkanitaqmi Diospa mana imawanpas tupachiy atina atiyninmanta yachanaykichikpaqpas, chay atiyninwanmi Diosqa iñiqkunata kallpanchawanchik, chay atiynintam Diosqa sinchi kallpanwan qawachikurqa.

²⁰Kay atiymi Cristota kawsarichispan alleqninpi hanaq pachapi tiyaykachirqa.

²¹Hinaspam hatuncharun gobiernaqkunapa, kamachikuqkunapa, atiyniyuqkunapa, munaychakuqkunapa, chaynataq kunan tiempopi, hamuq tiempopi imaymana sutiyuqkunapa hawanpim hatuncharun.

²² Tukuy imatapas Cristowanmi saruchirqa. Hina Cristotam llapallan iglesiakunapa uman kananpaqpas churaykun.

²³Llapallan iglesiakunaqa Cristopa cuerponmi, cuerpowan umaqa hukllam, chaynam iñiqkunapas Cristowanqa huklla kachkanku, payllam lliwpi llimparichkan.