Read CHUYA QELLQA La Biblia en Quechua de Ayacucho 2012 Efesios 5 Bible Online

Efesios 5 - CHUYA QELLQA La Biblia en Quechua de Ayacucho 2012 bible

Efesios 5

¹Diospa kuyasqan churinkunam kankichik, chaynaqa payman rikchakuqyá kaychik.

²Cristopa kuyawasqanchikman hinayá kuyanakuspa kawsaychik. Paymi ofrecekurqa Diosman, miski asnaq ofrenda hina ñoqanchikrayku wañuspan.

³Qamkunaqa Diospa sapaqchakusqanmi kankichik, chaynaqa amañayá rimayllapas rimariychikchu huchapakuymantaqa chaynataq millakuypaq kaqkunamanta nitaq qollqella kuyay huchakunamantapas.

⁴Amataqyá rimaychikchu penqaypaq kaqkunatapas, mana pasaq kaqkunamantapas, tupa-tupaykachispa rimaykunatapas, chay rimaykunaqa manam imapaqpas allinchu, aswanqa Diosllatañayá yupaychaychik.

⁵Kaytayá yachaychik: Pipas huchapakuqkunaqa, millakuypaq hucha ruwaqkunaqa hinaspa idolokuna yupaychaq hina qollqella kuyaqkunapas, Cristopa hinaspa Diospa munaychakusqanmanqa manam yaykunqachu.

⁶Amayá yanqakuna rimaqwanqa engañachikuychikchu, kaynakuna kasqanraykum Diospa piñakuyninqa mana kasukuqkunaman hamun.

⁷Amayá paykunapa mana allin ruwaqmasinqa kaychikchu.

⁸Ñawpaqtaqa tutayaypim purirqankichik, kunanmi ichaqa Señorwan hukllaña kasqaykichikrayku achkiypiña kawsachkankichik, chaynaqa achkiypa churinkuna hinayá kawsaychik.

⁹Achkiypi kawsayqa sumaq sonqoyuq kaymi, allin kaqkuna ruwaymi, cheqapman hina kawsakuymi.

¹⁰Señorpa munasqantayá ruwaychik.

¹¹Tutayaypi kawsaqkunapa mana allinkuna ruwasqankutaqa amayá ruwaychikchu, aswanqa mana allin ruwasqankumantayá qaqchaychik.

¹²Paykunapa imapas pakakuspalla ruwasqankumanta rimayqa penqakuypaqmi.

¹³Imapas pakasqa kaqkunaqa achkiwanmi sutilla rikurirun, achkiwantaqmi ima kasqantapas reqsinchik.

¹⁴Chayraykum ninku: “¡Yaw puñuq, puñusqaykimanta rikchariy! Wañusqakunamanta kawsarimuy, hinaptinqa Cristom achkiykusunki”, nispanku.

¹⁵Chaynaqa, imaynam kawsasqaykichiktayá allinta qawakuychik, amayá mana yachayniyuqkuna hinachu, aswanqa yachayniyuqkuna hinayá kawsaychik.

¹⁶Tiempoykichiktapas amayá usuchiychikchu, kay punchawkunaqa mana allinllañam.

¹⁷Chaynaqa, amayá mana yuyayniyuqkuna hinaqa kaychikchu, aswanqa imam Señorpa munaynin kasqantayá allinta yachaychik.

¹⁸Amayá vinowanqa sinkakuychikchu, chayqa viciokunamanmi apakun, aswanqa Chuya Espiritupa huntasqanyá kaychik.

¹⁹Huknikichikmanta huknikichikkamayá kallpanchanakuychik: Salmokunawan, himnokunawan, sonqomanta lloqsimuq takikunawanyá, Señorninchikman tukuy sonqowan takispa yupaychaychik.

²⁰Tu-kuy imamantayá Señorninchik Jesu-cristopa sutinpi Dios Taytaman graciasta qoychik.

²¹Diosta manchakuspaqa kasuna-kuychikyá.

²²Imaynam Señorninchikta kasukunchik, chaynatayá casada warmikunaqa qosaykichikta kasukuychik.

²³Qosaqa warmipa umanmi, chaynataqmi Cristopas llapallan iñiqkunapa uman, iñiqkunaqa Cristopa cuerponmi, payñataqmi salvaqninku.

²⁴Imaynam iñiqkuna Cristota kasukunku, chaynam casada warmikunapas tukuy imapi qosankuta kasukunanku.

²⁵Qosakuna, warmikichikta kuyaychik, imaynam Cristopas iñiqkunata kuyaspan paykunarayku vidanta qoykusqanta hina.

²⁶Kaytaqa ruwarqa haykam iñiqkunata chuyanchananpaqmi hinaspa yakuwan mayllachkaq hina palabranwan mayllananpaqmi.

²⁷Chaynataqa ruwarqa iñiqkunata kancharichkaqta hina kikinman pusaykunanpaqmi, paykunaqa kanan manam qachachasqachu, qapichusqachu nitaq chayman rikchakuqchu, paykunaqa kanan payllapaqña kawsaspa mana imaniraqpas huchayuqmi.

²⁸Chaynallataqyá qosakunapas warmikichikta kuyaychik imaynam kikikichikpa cuerpoykichik kuyasqaykichikta hina, warminta kuyaqqa kikintam kuyakun.

²⁹Manam pipas kikinpa cuerpontaqa cheqninmanchu, aswanqa mikuchispanmi allinta nanachikun, imaynam Cristopas iñiqninkunawan ruwasqanta hina,

³⁰paypa cuerponpa partenmi kanchik, aychanwan tullunmi kanchik.

³¹Chayraykum: Qariqa tayta-mamanta saqespan warminmanña hukllawakunqa, chaymi iskayninku huk runa hinallaña kanqaku.

³²Kayqa mayna sasa entiendenam, kaytaqa nichkani Cristomantawan llapa iñiqkunamantam.

³³Chaynaqa, kikikichikta hinayá warmikichiktapas sapakama kuyaychik, warmiñataqyá qosanta kasukuchun.