Read CHUYA QELLQA La Biblia en Quechua de Ayacucho 2012 Efesios 6 Bible Online

Efesios 6 - CHUYA QELLQA La Biblia en Quechua de Ayacucho 2012 bible

Efesios 6

¹Churikuna, tayta-mamaykichikta kasukuychik, chaytam Señorpas munan, kay ruwayqa allinpunim.

²Kaymi promesayuq punta kaq kamachikuy: “Tayta-mamaykita respetay”,

³chaynapi allin kanaykipaq hinaspa kay pachapi unay wata kawsanaykipaq.

⁴Tayta-mamakuna, qamkunapas wawa-churikichiktaqa amayá piñachiychikchu, aswanqa kasukuqtayá uywaychik Señorninchikpa yachachikuyninman hina.

⁵Esclavokuna, qamkunapas kay pachapi patronnikichiktayá respetowan hinaspa manchakuywan kasukuychik, imaynam Cristota servichkaq hinayá tukuy sonqowan kasukuychik.

⁶Amayá qawasunallaykichikpaqchu serviychikqa, nitaq paykuna allinpaq hapisunallaykichikpaqchu, aswanqa Cristopa sirvientenkuna hinayá sonqomanta Diospa munasqanta ruwaychik.

⁷Señorta servichkaq hinayá tukuy imatapas ruwaychik, manam runatachu servichkankichikqa, aswanqa Señorninchiktam.

⁸Yachananchikmi, sapakamam esclavo otaq libre kaspapas allin ruwasqanman hina Señormanta chaskinqa.

⁹ Patronkuna, qamkunapas chaynallatayá esclavoykichikkunawan allinta kawsaychik, ama amenazaychikchu. Yachasqaykichikpi hinapas qamkunapas chaynataq paykunapas hanaq pachapi kaq Señorman hapipasqam kachkankichik, manataqmi payqa pimanpas sayapakunchu.

¹⁰Chaynaqa, wawqe-panillaykuna, Señorninchikpa tukuy atiyninpi kallpanchakuychik.

¹¹Harkachikunaykichikpaq Diospa qosusqaykichik llapallan armakunawan pachallikuychik, chaynapi allinta takyaptikichik, wateqasuqnikichik diablo mana urmachisunaykichikpaq.

¹²Peleachkankichikqa manam aychayuq tulluyuq runakunawanchu, aswanqa tutayaypi kamachikuqkunapa, gobernaqkunapa, munayniyuqkunapa hinaspa altokunapi mana allin espiritukunapa contranpim.

¹³Chaynaqa, Diospa qosusqaykichik llapallan armankunawanyá pachallikuychik, chaynapi urmachiy munasusqaykichik punchawpi allinta takyanaykichikpaq hinaspa lliwta venceruspaykichik qaqa hina sayanaykichikpaq.

¹⁴ Allintayá sayaychik, chumpiwan hinayá cheqap kaqwan watakuychik, qasqo harkachikunawan hinayá allin ruwaywan pachallikuychik.

¹⁵Zapa-tokuchkaq hinayá hawkayay qokuq allin noticia apanaykichikpaq chaylla kaychik.

¹⁶Llapallanmantapas aswanqa iñiynikichikyá escudoykichik hina kachun, chaynapi diablopa rupachkaq flechankunamanta amachakunaykichikpaq.

¹⁷Salvasqa kasqaykichikyá kachun umaykichik harkaq casco hina, hapiychiktaqyá Diospa palabrantapas, chayqa Chuya Espiritupa espadanmi.

¹⁸Chuya Espiritupa yanapakuyninwanyá Diosta mañakuychik tukuy tiempo hinaspa rikchan-rikchanlla kaychik, ama hukmanyaspa llapallan iñiqkunapaqpas Diosta mañapuychik,

¹⁹ñoqapaqpas mañakuychiktaqyá palabranta Tayta Dios qomuwanapaq, chaynapi simiyta kicharispay mana manchakuywan pakasqa allin noticiata willakunaypaq.

²⁰Cristopa rantinpi hamusqayraykum cadenakunawan presochasqa kachkani. Chaynaqa, mañapuwaychikyá mana manchakuspay willakunaypaq.

²¹ Kuyasqanchik Tiquicom ñoqamantawan imaynam kasqaymanta willa-sunkichik, payqa Señorpa obranpi cheqap yanapakuqmi.

²²Paytaqa ka-chamuchkani imaynam kasqaykumanta willasuspaykichik sonqoykichikta tiyaykachinanpaqmi.

²³Dios Taytanchikyá hinaspa Señor-ninchik Jesucristoyá hawkayaytawan, kuyakuyta hinaspa iñiyta llapallan waw-qe-panikunaman qosunkichik.

²⁴Haykam mana iskayrayaspa Señorninchik Jesucristota kuyaqkunamanyá, kuyakuyninta Diosninchik qochun.