Read CHUYA QELLQA La Biblia en Quechua de Ayacucho 2012 Filipenses 1 Bible Online

Filipenses 1 - CHUYA QELLQA La Biblia en Quechua de Ayacucho 2012 bible

Filipenses 1

¹Jesucristo serviq ñoqa Pablom Timoteopiwan qellqamuykiku Filipos llaqtapi kaq llapallan iñiqkunaman, michiqkunaman hinaspa diaconokunaman, qamkunaqa Jesucristollapaqña sapaqchasqam kachkankichik.

²Dios Taytanchikwan Señorninchik Jesucristoyá kuyakuynintawan hawkayayninta qamkunaman chaqchurimusunkichik.

³Sapa kuti yuyarispaymi qamkunamanta Diosninchikman graciasta qoni.

⁴Orakuspaymi kusikuywan tukuy tiempo llapallaykichikpaq Diosta mañakuchkani,

⁵mañakuchkaniqa qallariyninmanta kunankama Cristomanta allin noticiata willakuptiy yanapawasqaykichikmantam.

⁶Yachanipunim, qamkunapi allinkuna qallariq Diosninchikqa Jesucristo kutimunankama chay qallarisqanta tukunanta.

⁷Qamkunamanta kayna piensayniyqa allinmi, qamkunatam sonqoypi apay-kichik. Carcelpi kaptiypas, autoridadkunapa qayllanpi kaspay, allin noticiata willakusqay cheqap kasqanmanta valechiptiypas, ñoqawan kaspam yanapawarqankichik, chaywanmi Diospa kuyakuyninta qawaykachiwarqankichik.

⁸Jesucristopa kuyakuyninwan qamkunata imayna kuyasqaytapas Diosninchikmi yachan.

⁹Kaytam mañakuchkani, Diospa kuyakuynin qamkunapi aswan-aswan wiñananpaq chaynataq yachaytawan yuyayta qosunaykichikpaq,

¹⁰chaynapi allin kaqkunata reqsinaykichikpaq, chaymi Jesucristopa kutimunan punchawpaq mana huchayuq hinaspa mana pitapas urmachiq kankichik.

¹¹Jesu-cristom yanapasuchkankichik allin ruruchkaq sacha hina allinkunata rurunaykichikpaq, chaynapi Diosta yupaychaspa hatunchanaykichikpaq.

¹²Wawqe-panillaykuna, yachanaykichiktam munani, tukuy ima pasawasqanqa, Cristomanta allin noticia willakusqay wiñananpaqmi karqa.

¹³Chayraykum palaciopi kaq lliw soldadokunapas chaynataq wakin runakunapas Jesucristorayku preso kasqayta yacharunku.

¹⁴Achkaq wawqe-panikunam preso kasqayta qawaspanku kallpanchakurqaku, mana manchakuspa Señorpi hapipakuspanku aswanraq Diospa palabranta willakunankupaq.

¹⁵Cheqaptapunipas wakinkunaqa envidiakuspa hinaspa cheqnikuspam Cristomanta willakunku, wakiqkunam ichaqa allin sonqowan willakunku.

¹⁶Wakiqkunam Cristomanta willakunku hatun kuyakuywan, paykunaqa yachan-kum allin noticia willakuyta defiendenaypaq preso kasqayta.

¹⁷Wakiqkunam ichaqa envidiakuspanku imapas chaskinankuraykulla willakunku, chaynapi preso kasqaypi astawanraq llakichiwayta munaspanku.

¹⁸Ichaqa manam imananchu, hinayá Cristomanta willakuchunku, allin sonqowanpas otaq mana allin sonqowanpas, kayqa llumpaytam kusichiwan, astawanraqmi kusikusaqpas.

¹⁹Ñoqaqa yachakunim Diosta mañapuwasqaykichikwan hinaspa Jesucristopa Espiritunpa yanapakuyninwan carcelmanta allinlla lloqsimunayta.

²⁰Tukuy sonqoywanmi Diosman hapi-pakuchkani imamantapas mana pen-qachiwanankupaq hinaspa mana manchakuspa rimanaypaq, chaynapim ñawpaq tiempopi hina kunan tiempopipas, wañuptiypas otaq kawsaptiypas Jesucristoqa cuerpoypi hatunchasqa kanqa.

²¹Ñoqapa kawsakuyniyqa Cristom, wañukuyñataqmi aswan allinraq.

²²Ichaqa kay pachapiraq kawsaspayqa Señorpaqmi imatapas allinta ruwayman, chaymi mayqan akllaytapas mana atinichu.

²³Iskayninmanta mayqanpas akllayqa sasam, ichaqa munaymanmi wañukuspay Cristowanña kuska kayta, chay kaqmi ñoqapaqqa aswan allin kanman.

²⁴Ichaqa qamkunaraykum kay pachapiraq kawsanay.

²⁵Chayraykum kawsanaymantaqa seguro kachkani, llapallaykichikta yanapanaypaqmi kawsasaqraq chaynapi iñisqaykichikpi wiñanaykichikpaq hinaspa kusikunaykichikpaq.

²⁶Chaynaqa, huktawan qamkunaman kutimuptiymi Jesucristota kusikuywan hatunchankichik.

²⁷Jesucristomanta allin noticia uyarisqaykichikman hinayá vidaykichik kachun. Watukamuspay otaq maypiña kaspaypas qamkunaman-tam uyariyta munani huk sonqolla qaqa hina sayaspa vencesqaykichikmanta, iñisqaykichik allin noticiata willaku-naykichikpaq kallpanchakusqaykichik-manta hinaspa

²⁸contraykichikpi kaqku-natapas mana manchakusqaykichikmanta. Contraykichikpi kasqankuraykum yachanchik paykunapa puchukananta, qamkunañataq salvasqa kanaykichikta. Chayqa Diosmantam hamun.

²⁹Diosmi qamkunaman qosurqankichik Cristopi hapipakuyta chaynataq payrayku ñakariytapas.

³⁰Chaynaqa, imaynam sasachakuypi karqani chaynam qamkunapas kankichik, ñawpaqta imayna ñakarisqaytawan kunan ñakarisqaytapas yachankichikmi.