Read CHUYA QELLQA La Biblia en Quechua de Ayacucho 2012 Colosenses 1 Bible Online

Colosenses 1 - CHUYA QELLQA La Biblia en Quechua de Ayacucho 2012 bible

Colosenses 1

¹Ñoqa Pablom Dios Taytapa munayninman hina Señorninchik Jesucristopa apostolnin kani. Wawqenchik Timoteopiwanmi

²Colosas llaqtapi Jesucristopi iñiq wawqe-panikunaman qellqamuykiku. Dios Taytanchikpawan Señorninchik Jesucristopa kuyakuyninwan hawkayayninyá qamkunapi kachun.

³Qamkunapaq Diosta mañakuspaykum Señorninchik Jesucristopa Taytan Diosninchikman graciasta qoniku.

⁴Jesucristopi iñiyniyuq kasqaykichikmantawan iñiqkuna kuyasqaykichikmantam uyarirqaniku,

⁵chaytaqa ruwachkankichik hanaq pachapi churasqa premioykichikraykum, chaymantaqa cheqap allin noticia palabrantakamam uyarirqankichikña.

⁶Chay palabraqa qamkunamanwan hinaspa lliw kay pachapi runakunamanmi chayamurqa, hinaspam allinta ruruspan tukuy hinastinpi mirachkan, chaynaqa kachkan uyarisqaykichik hinaspa Diospa kuyakuynin chaskisqaykichik punchawmantaraqmi.

⁷Chaykunataqa kuyasqanchik wawqenchik Epafrasmi yachachisurqankichik. Payqa qamkuna ukupi mana hukmanyaspa Jesucristo serviqmi.

⁸Paymi willawarqaku Espirituman hina llumpay kuyawasqaykikumantapas.

⁹Chaymi yachaykusqayku punchaw-mantapacha ñoqaykupas Dios Tay-tanchikta mana pisipaspa mañapuch-kaykiku, chaynapi imam paypa munas-qanta entiendenaykichikpaq, yachay-niyuq kanaykichikpaq hinaspa Espi-ritumanta kaqkunata lliw reqsinaykichikpaq.

¹⁰Mañakuchkanikuqa Señor-pa qatiqninkuna hina kawsaspa, paypa munasqanta ruwaspa allinta rurunaykichikpaqmi chaynataq aswan mastaraq Diosninchikmanta yachanaykichikpaqmi.

¹¹Mañakuchkanikutaqmi hatu-hatun atiyninwan kallpanchasunaykichikpaqpas, chaynapi ima mana allintapas pacienciakuspa kusikuywanraq aguantanaykichikpaq,

¹²hinaspa kusikuywan Dios Taytanchikman graciasta qonaykichikpaq. Paymi sapakamaman achkirichkaq tupasuqnikichikta qosunkichik.

¹³Diosmi tutayaypa atiyninmanta libraykuwarqanchik, hinaspam kuyasqan Churinpa munaychakusqanmanña churaykuwanchik.

¹⁴Paypa wañusqallanwanmi huchanchikkunamanta pampachaykuspa libraykuwarqanchik.

¹⁵Mana rikuy atina Diospa rikchayninqa Cristom, llapa imakunapas manaraq unanchasqa kachkaptinqa payqa karqañam.

¹⁶Paynintakamam Dios unancharqa cielopi kaqkunata, kay pachapi kaqkunata, rikusqanchik kaqkunata, mana rikuy atisqanchikkunata, munaychakuqkunata, kamachikuqkunata, autoridadkunata hinaspa llapallan atiyniyuqkunatapas. Paynintakamam hinaspa paypaqtaqmi tukuy imapas unanchasqa karqa.

¹⁷Tukuy imapas manaraq unanchasqa kachkaptinqa Cristoqa karqañam, tukuy imapas paypa atiyninwanmi takyachkan.

¹⁸Payqa llapallan iñiqkunapa umanmi, iñiqkunañataqmi cuerpon, paymi llapanmanta puntata kawsarimurqa imapipas punta kaq kananpaq.

¹⁹Dios Taytam munarqa paypi tukuy ima tarikuq Cristopi kananta.

²⁰Diosmi allinyanakuyta munarqa kay pachapi kaqkunawan chaynataq hanaq pachapi kaqkunawanpas, chaytaqa ruwarqa Cristopa cruzpi yawar chaqchusqanwan hawkayayman yaykuspanmi.

²¹Ñawpaqtaqa Diosmanta karun-chasqam karqankichik, mana allinkunata ruwaspam Diosta cheqnirqanchik, kunanmi ichaqa kikinpuni qamkunawan allinyanakuykun.

²²Chaynaqa, karun Cristopa runa kayninpi wañus-qallanwanmi. Payqa wañurqa chuyanchasqata, mana qachayuqta hinaspa pasaypaq mana huchayuqtaña Diospa qayllanman pusaykusunaykichikpaqmi

²³Ichaqa chayna kanaykichikpaqqa qaqa hinayá iñiynikichikpi sayaychik ama iskayrayaspa, salvakunaykichikpaq allin noticia uyarisqaykichikman hapipakuspa. Kay allin noticiaqa willakusqa kachkan kay pachapi llapallan runakunamanmi, chayta willakunaypaqmi ñoqa Pablopas churasqa karqani.

²⁴Kunanqa llumpaytam kusikuni qamkunarayku ñakarisqaywan, chaynapim llapa iñiqkunarayku Cristopa ñakarisqanta kikiypa cuerpoypiña tukupachkani, llapa iñiqkunaqa Cristopa cuerponmi.

²⁵Diosqa akllawasqanman hinam iñiqkunata servinaypaq churaruwan, chaynapi qamkunapa allinnikichikpaq paypa palabranta lliwta willakunaypaq.

²⁶Chay pakasqa hina palabrankunataqa ñawpaq-ñawpaqmantaraqmi mana pipas yacharqachu, kunanmi ichaqa chay ñawpaq pakasqa kaqta payllapaqña kawsaqkunaman reqsiykachinña.

²⁷Chay pakasqa kaqtaqa Diosmi mana judío kaqkunamanpas reqsichiyta munarqa, chay pakasqa kaqqa qamkunapi Cristopa kawsasqanmi, chayraykum wiñaypaq kawsakuyta suyachkankichik.

²⁸Chaymi ñoqaykuqa llapa runakunata anyaspa hinaspa tukuy yachaywan yachachispa Cristomanta willakuniku, chaynapi llapa runakuna Cristo hina kanankupaq

²⁹Chayraykum Cristopa qowasqan hatun atiywan sinchita kallpanchakuspay llamkachkani.