Read CHUYA QELLQA La Biblia en Quechua de Ayacucho 2012 Colosenses 2 Bible Online

Colosenses 2 - CHUYA QELLQA La Biblia en Quechua de Ayacucho 2012 bible

Colosenses 2

¹Munanim sasallawanña tukuy ima ruwasqay yachanaykichikta, chaytaqa ruwachkani qamkunaraykum, Laodicea llaqtapi kaq iñiqmasinchikraykum chaynataq mana reqsiwaqniykunaraykum.

²Chaytam ruwani sonqoykichikpi kallpan-chakunaykichikpaq hinaspa kuyakuypi huklla kaspa tukuy yachaypa huntasqan kanaykichikpaq chaynataq Dios Taytapa hinaspa Cristopa tukuy pakasqa kaqkunata reqsinaykichikpaq.

³Payllapim pakasqa kachkan qori-qollqe hina tukuy yachayniyuq hinaspa yuyayniyuq kaypas.

⁴Kaykunataqa nimuchkaykichik sumaqllataña rimasqankuwan ama pipas engañasunaykichikpaqmi.

⁵Kikiypuni qamkunawan mana kaspaypas sonqoy-piqa qamkunawanmi kachkani, kusiku-nitaqmi allin kawsakusqaykichikmantawan Cristoman hapipakuspa qaqa hina sayasqaykichikmantapas.

⁶Chaynaqa, Señorninchik Cristo Jesusta chaskisqaykichikman hinayá payman hapipakuspa allinta kawsaychik.

⁷Paypi sapinchasqayá allinta takyaychik, yachachisqa kasqaykichikman hinayá iñiypi kallpachakuychik, Diosman graciasta qospa.

⁸Chaynaqa, cuidakuychikyá, amayá engañachikuychikchu yachayninkumanta rimaqkunawanqa hinaspa yanqakunalla rimaqkunawanqa, paykunaqa runakunapa costumbrenman chaynataq kay pachapi atiyniyuqkunallaman hapipasqam kachkanku, manam Cristomanchu.

⁹Diospa pim kayninqa Cristopa runa kayninpim kachkan.

¹⁰Cristoman hukllawasqa kasqaykichikraykum Diosmanpas hukllawasqaña kachkankichik. Cristopa munayllanpim llapa kamachikuqkunapas chaynataq atiyniyuqkunapas kachkan.

¹¹Paypi kasqaykichikraykum qarikaynikichikpi señalasqaña rikurirunkichik, ichaqa manam makiwanchu, aswanqa Diospunim Cristopi señalarusunkichik, chaywanmi huchallikuqllaña kaynikichikta wischurun.

¹²Bautizakuspaykichikmi Cristowan kuska pampakuchkaq hina ñawpa vidaykichikta pamparurqankichik, paywan kuskataqmi musoqmanta kawsarimurqankichik, kawsarimurqankichikqa Diospa llumpay atiyninwan Cristopa kawsarimusqanpi iñispallaykichikmi.

¹³Ñawpa vidaykichikpim huchaykichikwan hinaspa mana señalasqa kasqaykichikwan wañusqa hina karqankichik. Kunanmi ichaqa tukuy huchaykichikta pampachaykusunkichikña, hinaspam Diosqa kawsarirachisunkichikña Cristotawan kuskata.

¹⁴Diosmi leyman hina huchanchikrayku castigasqa kananchikmanta lliwta pagaykun, hinaspam Cristopa cruzpi wañusqanwan libraykuwanchik.

¹⁵Diosmi llapallanpa qayllanpi Jesucristontakama cruzpi vencespan, mana allin espiritupi atiyniyuqkunatawan, munayniyuqkunata penqayman churarun.

¹⁶Chaynaqa, amayá pipas rimaku-sunkichikchu: Imam mikusqaykichikmanta, tomasqaykichikmanta, fiestakuna ruwaymanta, watanpi otaq killanpi fiestakuna ruwaymanta, samana punchawpi samanamanta.

¹⁷Chaykunaqa hamuq kaqpa llantuynin hinallam karqa, cheqap kaqmi ichaqa Cristo.

¹⁸Premioykichiktaqa amayá qechurachikuychikchu uchuychakuq tukuspa angelkuna yupaychaqkunawanqa, paykunaqa revelacionta chaskiq tukuspankum aychaman hina piensasqallankuwan yanqapaq hatun tukurunku.

¹⁹Paykunaqa manam Cristoman hukllawasqachu kachkanku, ñoqanchikmi ichaqa cuerpon kanchik payñataqmi umanchik, cuerponchikqa moqokunawan hinaspa ankukunawan hukllaman huñusqam kachkan, chaynatam ñoqanchiktapas Cristo hukllawaruwanchik hinaspam wiñachiwanchik Diospa munasqanman hina.

²⁰Cristowan wañuspaykichikqa runakunapa costumbrenkuna ruwaytaqa saqerunkichikñam, hinaspaqa, ¿imanasqa-má kay pachapi mana allin ruwaykunaman hinallaraq kawsaspaykichikqa,

²¹nichkankichik: “Ama kayta llapchaychu, ama wakta mikuychu, ama kayta hapiychu” nispaykichikqa?

²²Chaykunaqa runakunapa yachachisqallanmi hinaspa kamachisqallanmi, kaykunaqa tiempopa pasasqanman hinam chinkarunqa.

²³Chaykuna ruwaq runaqa, uchuychakuq tukuspa Dios serviqmanraqmi rikcha-kunkupas cuerponkuta ñakarichis-qankurayku, yanqapaqmi chaykunataqa ruwanku, aychankupa munasqan venceytam ichaqa mana atinkuchu.