Read CHUYA QELLQA La Biblia en Quechua de Ayacucho 2012 1~Tesalonicenses 2 Bible Online

1~Tesalonicenses 2 - CHUYA QELLQA La Biblia en Quechua de Ayacucho 2012 bible

1~Tesalonicenses 2

¹Wawqe-panillaykuna, yachasqaykichikpi hinapas watukamusqaykuqa manam yanqapaqchu karqa.

²Yachan-kichiktaqmi Filipos llaqtapi kamisqa, ñakarichisqa kachkaptiykupas Dios-ninchik kallpanchawasqankutapas, chay-mi mana manchakuspayku Diosmanta allin noticiata willarqaykiku, willarqaykikum achkallaña runakuna contraykupi sayarichkaptinkupas.

³Ñoqaykuqa cheqap kaqtam willarqaykiku manam pantachinaykupaqchu aswanqa qamkunapa allinnikichikpaqmi.

⁴Chaynapim Diosqa allinpaq chaskiwaspanku allin noticiata willakunaykupaq churawarqaku, chaymi willakuchkaniku. Manam runakunapa munasqan ruwaytachu munachkaniku, aswanqa Diospa munasqantam, paymi sonqoyku pruebaqqa.

⁵Yachasqaykichikpi hinapas qamkunataqa manam sumaqllataña rimaspachu alabarqaykiku, nitaqmi qollqeta kuyaspaykuchu rimapayarqaykikupas, Diospas chaytaqa yachanmi.

⁶Manataqmi maskarqanikupas runakunapa alabasqan kaytachu nitaq qamkunapa otaq wakin runakunapa alabasqan kaytachu.

⁷Munaspaykuqa kamachikikumanmi karqa Cristopa apostolnin kasqaykurayku. Ichaqa qamkunawanmi llampu sonqolla karqaniku. Ñoqaykuqa wawankuna uywachkaq mama hinam karqaniku.

⁸Qamkunataqa llumpaytam kuyarqaykiku, manam ñoqaykuqa Diosmanta allin noticia willayllatachu munarqaniku, aswanqa kikiykupa vidayku qoytapas munarqanikum. Chaynataqa munarqaniku llumpayta kuyasqaykuraykum.

⁹Wawqe-paniykuna, qamkunaqa yuyach-kankichikmi mantienekunaykupaq tuta punchaw mana pisipaspa llamkasqaykutapas, chaynapi allin noticia willakuyniykupi mana qamkunata gastachinaykupaq.

¹⁰Qamkunapas chaynataq Diospas yachanmi, iñiqkunapa qayllanpiqa allin kaqkunata ruwaspa, Diosllapaqña pipapas mana ima nisqan kawsas-qaykuta.

¹¹Yachankichiktaqmi sapakamata rimapayaspa kallpanchasqaykutapas, imaynam huk tayta churinkunawan ruwas-qanta hina,

¹²kunarqaykikutaqmi Dios-pa churinkuna hina allinta kawsanay-kichikpaqpas. Diosmi munaychakuyninpi hatunchasqa kanaykichikpaq qayasur-qankichik.

¹³Chayraykum ñoqaykupas Diosman tukuy tiempo graciasta qoniku. Ñoqayku willaptiykum Diospa palabranta chaskirqankichik, ichaqa manam runapa rimasqanta hinallachu aswanqa Diospa cheqap palabranta hinam, chay palabraqa qamkuna ukupim allinta ruruchkan.

¹⁴Wawqe-paniykuna, qamkunaqa Cristo Jesuspi iñiq Judeapi kaq Diospa iglesianpa ejemplontam qatichkankichik, paykunatam judiokuna ñakarichirqaku, chaynam qamkunatapas llaqtamasikichikkuna ñakarichisurqankichik.

¹⁵Chay judiokunam Señor Jesusta hinaspa profetakunata wañurachirqaku, ñoqaykutapas qarqoruwarqakum, paykunaqa manam Diospa munasqanman hinachu kawsanku, lliw runakunapa contranpim kachkanku,

¹⁶paykunaqa mana judío kaqkuna salvakunankupaq allin noticia willanaykutam harkakuwanku. Chaynata ruwaspankum aswan mastaraq huchankuta llimparichichkanku, ichaqa ñam paykunapaq wiñay castigo chayaramunña.

¹⁷Wawqe-panillaykuna, ñoqaykuqa pisi tiempollapaqmi qamkunamanta karunchasqa kachkaniku, sonqoykupim ichaqa tukuy tiempo kachkankichik. Llumpaytam munachkaniku huktawan qamkuna qawaykuyta.

¹⁸Chayraykum qamkuna watukuyta munarqaniku. Ñoqa Pablom achka kutita qamkunaman hamuyta munarqani, ichaqa Satanasmi harkakuwarqaku.

¹⁹Señorninchik Jesucristo kutimuptinqa, ¿imapitaq hapipakusaqku, kusikusaqku hinaspa alabakusaqku? aswanqa qamkunallam kusikuyniykuqa kankichik, manam hukkunachu.

²⁰Arí, qamkunam kusikunaykupas hinaspa hatunchakunaykupas kankichik.