Read CHUYA QELLQA La Biblia en Quechua de Ayacucho 2012 1~Tesalonicenses 3 Bible Online

1~Tesalonicenses 3 - CHUYA QELLQA La Biblia en Quechua de Ayacucho 2012 bible

1~Tesalonicenses 3

¹Chayraykum, manaña aguantayta atispayku Atenas llaqtapi sapallaykuña qepanaykupaq tanteanakururqaniku.

²Hinaspam wawqenchik Timoteota kachamurqaykiku. Paymi Diosta servispa Jesucristomanta allin noticia willakuypi yanapawanku. Paymi iñiynikichikpi qaqa hina sayanaykichikpaq kallpanchasunkichik,

³chaynapi mayqannikichikpas ñakarispa ama hukmanyarunaykichikpaq. Qamkunaqa yachankichikmi chaynata ñakarinanchiktaqa.

⁴Qamkunawan kachkasparaqmi ñakarinaykichikmantaqa nirqaykikuña, yachasqaykichikpi hinam chaykunaqa pasakurqa.

⁵Chayraykum Timoteota kachamurqani qamkunamanta manaña llakikunaypaq hinaspa iñiynikichikpi imaynam kasqaykichikta willawananpaq, yanqañataq supay tentarusuptikichik llamkasqaykupas yanqapaq karunman.

⁶Timoteo kutiramuspanñataqmi iñiynikichikmantawan kuyakuynikichikmanta, allinllata willawarqaku. Qamkunas tukuy tiempo yuyawaspaykiku rikuykuyta munawankiku imaynam ñoqaykupas qamkuna rikuykuy munasqaykuta hina.

⁷Wawqe-panillaykuna, sinchi llakisqa hinaspa waqasqa kachkaspaykupas qamkuna allinlla iñiynikichikpi takyasqaykichikta yachaykuspaykum anchata kusikurqaniku.

⁸Señorpi qaqa hina sayasqaykichikwanmi kusisqa kawsachkaniku.

⁹Qamkunaraykum llumpayta Diosman graciasta qoniku, paypa qayllanpi llumpay kusichiwasqaykikumanta.

¹⁰Tuta-punchawmi Diosta llumpayta mañakuchkaniku qamkunata rikuykunaykupaq, chaynapi iñiynikichikpa pisisqanta huntaykachinaykupaq.

¹¹Kikin Dios Taytanchikyá Señorninchik Jesucristopiwan ñanniykuta kicharichun qamkunaman hamunaykupaq.

¹²Señoryá huknikichikmanta huknikichikkama kuyanakuynikichikta llimparichichun, chaynallataq llapallan runakuna kuyanaykichikpaqpas, imaynam qamkunapaq kuyakuyniykuta hina.

¹³Señoryá iñiynikichikpi takyachisunkichik Dios Taytanchikpa qayllanpi chuya kanaykichikpaq hinaspa payllapaqña kawsanaykichikpaq, chaynaqa kankichik Señorninchik Jesucristo llapallan sapaqchasqankunawan kutimunan punchawpaqmi.