Read CHUYA QELLQA La Biblia en Quechua de Ayacucho 2012 Josué 10 Bible Online

Josué 10 - CHUYA QELLQA La Biblia en Quechua de Ayacucho 2012 bible

Josué 10

¹Jerusalén llaqtapa reynin Ado-nisedecmi uyarirurqa Israelpa mirayninkuna Jericó llaqtata chaynataq reynintapas ruwasqanta hina Hai llaqtatapas chaynataq reynintapas ruwarusqanta. Yacharurqataqmi Gabaón llaqtayuqkunapas Israelpa mirayninkunawan hawkalla kanankupaq contratota ruwaruspa kuskaña yachasqankutapas.

²Gabaón llaqtaqa Hai llaqtamantapas aswan hatunmi karqa, runankunapas allinnin qari-qarikunam karqaku. Chayraykum rey Adonisedecpas chaynataq runankunapas llumpay mancharisqallaña karqaku.

³Chaynapim Jerusalenpa reynin Adonisedecqa, Hebrón llaqtapa reynin Hohamman, Jarmut llaqtapa reynin Pireamman, Laquis llaqtapa reynin Jafiaman hinaspa Eglón llaqtapa reynin Debirman kaynata nichimurqa:

⁴Hamuychik hinaspa yanapawaychik Gabaón llaqtapa contranpi peleanan-chikpaq. Paykunam Josueywan chaynataq Israelpa mirayninkunawan haw-kalla kanankupaq contratota ruwarunku, nispanku.

⁵Chaymi amorreokunapa pichqa reyninkuna huñunakuruspanku Gabaón llaqtata atacanankupaq muyuriqninpi churakururqaku. Paykunaqa karqaku Jerusalenpa, Hebronpa, Jarmutpa, La-quispa chaynataq Eglonpa reyninkunam.

⁶Gabaonpi yachaqkunañataqmi, Gilgalpi kachkaptin Josueyman kaynata willachimurqaku: Ama saqeruwaykuchu, chaylla hamuspa kay serviqnikikunata yanapaykuwayku hinaspa salvaykuwayku. Orqo lawkunapi yachaq amorreokunapa llapa reyninkunam atacawanankupaq huñunakurunku, nispanku.

⁷Chaymi Josueyqa, llapallan allinnin qari-qari soldadonkunawan Gilgal lawmanta lloqsirqaku.

⁸Hinaptinmi Josueyta Tayta Dios nirqa: Ama manchakuychu, paykunataqa ñoqam makikiman churasaq. Manam mayqanninpas qanwan peleaytaqa atinqakuchu, nispa.

⁹Chaymi Josueyqa Gilgal lawmanta tukuy tuta rispan amorreokunata qonqayllamanta atacarurqa.

¹⁰Tayta Diosmi Israelpa mirayninkunapa ñawpaqninpi amorreokunata musparachirqa. Chaymi Israelpa mirayninkunaqa Gabaón llaqtapa hichpanpi anchallataña wañurachirqaku. Bet-horonman riq ñanninta qatispankuñataqmi Azeca llaqtakama chaynataq Maceda llaqtakama wañuparachirqaku.

¹¹Israelpa mirayninkunamanta amorreokuna Bet-horonpa uraynin waqtata ayqechkaptinkum Tayta Diosñataq cielomanta runtu parata hatun rumikunata hina chayachimurqa Azeca llaqtakama. Chay runtu parawan wañuchisqakunam aswan achka karqaku Israelpa mirayninkunapa espadanwan wañuqkunamantaqa.

¹²Amorreokunata Israelpa mirayninkunaman Tayta Diospa qosqan punchawmi, Israelpa mirayninkunapa qayllanpi Tayta Diosta qayakuspan Josué nirqa: Inti, Gabaón llaqtapa altonpi sayay, killa, Ajalón qechwapa altonpi sayay, nispa.

¹³Hinaptinmi intipas killapas sayarurqa llapa enemigonkuta Israelpa mirayninkuna vengakunankukama. Chaykunaqa Jaserpa libronpi qellqasqam kachkan. Intim chawpi punchawpi sayaruspan huk punchawpuni mana seqaykurqachu.

¹⁴Manam chayna punchawqa karqachu ñawpaqtapas nitaq qepatapas. Chay punchawllapim Tayta Dios kasurqa runapa chayna mañakusqanta. Chaynatam Tayta Dios ruwarqa Israelpa mirayninkupa favorninpi peleaspan.

¹⁵Josueymi lliw runankunawan Gilgal lawpi campamentonkuman kutikurqaku.

¹⁶Pichqan reykunañataqmi lluptikuspanku Maceda law machaypi pakakururqaku.

¹⁷Josueymanmi willaykurqaku chay pichqan reykuna Maceda law machaypi pakakusqankuta.

¹⁸Chaymi Josué kaynata kamachirqa: Hatun rumikunata tanqaspa machaypa punkuta taparamuychik hinaspa machay cuidaqkunata churamuychik.

¹⁹Qamkunaqa ama samaykuspa enemigoykichikta utqayman qatiychik, ama llaqtankuman kutinankuta saqeychikchu. Paykunataqa Tayta Diosmi makikichikman churaykun, nispa.

²⁰Josueymi Israelpa mirayninkuna-wan llapa amorreokunata wañuparachirqaku, puchuqkunallañam murallasqa llaqtakunaman ayqerurqaku.

²¹Israelpa mirayninkunañataqmi Josueypa kasqan Maceda lawpi campamentoman hawkalla kutimurqaku. Chaymantapunim Israelpa mirayninkunapa contranpiqa manaña pipas rimarqakuñachu.

²²Chaymantam Josué kamachirqa: Machaypa punkunta kichamuspa chay pichqa reykunata hurqomuychik, nispa.

²³Chaynata ruwaspankum machaymanta hurqomurqaku: Jerusalenpa, Hebronpa, Jarmutpa, Laquispa chaynataq Eglonpa reyninkunata.

²⁴Chay reykunata Josueypa qayllanman pusaramuptinkum, Israelpa mirayninkunata qayaykuspan soldadokunapa kamachiqninkunata nirqa: Asuykamuspaykichik kay reykunata matankapi saruychik, nispa. Hinaptinmi asuykuspanku chay reykunata matankapi sarurqaku.

²⁵Josueyñataqmi nirqa: Ama manchakuychikchu nitaq hukmanyaychikchu. Kallpanchakuspa qarinchakuychik. Kaynatam Tayta Dios ruwanqa contraykichikpi peleaq llapallan enemigoykichikta, nispa.

²⁶Chaynata niruspanmi chay reykunata Josué wañurachirqa, hinaspam tardeykuqkama pichqa sachakunapi warkurachirqa.

²⁷Inti seqaykuytañam Josué kamachirqa warkusqankumanta hurqospanku pakakusqanku machayman wischumunankupaq. Chaynata ruwaspankum hatun rumikunawan machaypa punkunta wichqarurqaku. Chaynam kachkan kunankamapas.

²⁸Josueyqa Maceda llaqtamanpas hina chay punchawllapim yaykuruspan lliw runankunata wañuparachirqa. Reynintapas Jericó llaqtapa reyninta hinam ruwarurqa.

²⁹Chaymantam Josueyqa Israelpa mirayninkunawan Libna llaqtaman rispanku atacarurqaku.

³⁰Chay llaqtatapas reynintintam Israelpa mirayninkunaman Tayta Dios qoykurqa. Chaymi espadawan lliwta wañurachirqaku. Reynintapas Jericó llaqtapa reyninta hinam ruwarurqaku.

³¹Josueymi llapa tropankunawan Libna llaqtamanta Laquis llaqtaman rispan, chay llaqtapa hichpanpi campamentonta sayachirqa, hinaspam atacarurqa.

³²Laquis llaqtatapas Tayta Diosmi paykunaman qoykurqa. Chaymi paqarinnintin punchaw lliwta wañurachirqaku, Libna llaqtapa runankunata hina.

³³Gezer llaqtapa reynin Horammi Laquis llaqtata yanapananpaq rirqa. Aswanqa Josueymi paytawan tropankunata, mana chullallapas puchunankama lliwta wañurachirqa.

³⁴Laquismantam Josueyqa llapa tropankunawan Eglón llaqtaman rispa, chay llaqtapa muyuriqninpi churakuruspa atacarurqaku.

³⁵Hina chay punchawllapim llapallan chaypi yachaqkunata espadawan wañurachirqaku, Laquis llaqtapa runankunata hina.

³⁶Eglonmantam Josueyqa tropankunawan rispanku Hebrón llaqtata atacarurqaku.

³⁷Yaykuruspankum Hebrón llaqtapa runankunata reynintawan kuskata lliwta espadawan wañurachispanku llaqtatapas pasaypaqta purmarachirqaku, Eglón llaqtata ruwasqankuta hina.

³⁸Chaymantam Josueyqa llapa tropankunawan kutimuspanku Debir llaqtata atacarurqaku.

³⁹Yaykuruspankum Debir llaqtapa runankunata reynintawan kuskata lliwta espadawan wañurachirqaku, imaynam Hebronpa, Libnapa, Debirpa runankunata chaynataq reyninkunatapas wañuchisqanta hina.

⁴⁰Josueymi puchukarachirqa orqokuna lawpi, Neguev lawkunapi, qechwa lawkunapi chaynataq waqtakunapi llaqtakunatapas. Runankutapas reyninkutapas mana puchuykuspam lliwta wañuchirqa. Chaynataqa ruwarqa Israelpa yupaychasqan Tayta Diospa kamachisqanman hinam.

⁴¹Chaynatam Josueyqa enemigonkunata chinkarachirqa Cades-barnea lawmanta qallaykuspa Gaza lawkama chaynataq Gosén lawmanta Gabaón llaqtakama.

⁴²Josueymi chay llaqtakunata patanmanta qallaykuspa lliwta chinkarachirqa. Chaynataqa ruwarqa Israelpa yupaychasqa Tayta Dios yanapasqanraykum.

⁴³Chaymantam Josueyqa llapallan tropankunawan Gilgal lawpi campamentoman kutirqa.