Read CHUYA QELLQA La Biblia en Quechua de Ayacucho 2012 Josué 5 Bible Online

Josué 5 - CHUYA QELLQA La Biblia en Quechua de Ayacucho 2012 bible

Josué 5

¹Jordán mayupa intipa seqaykunan lawninpi yachaq amorreokuna reyninkunawan Mediterráneo lamar qochapa hichpanpi yachaq cananeokunapa reyninkunam yacharurqaku, imaynam Israelpa mirayninkuna chimpay tukunankukama Jordán mayuta Tayta Dios chakirachisqanta. Chayraykum pasaypaqta hukmanyaruspanku manaña Israelpa contranpi peleayta munarqakuñachu.

²Chay tiempopim Josueyta Tayta Dios nirqa: Rumimanta cuchillokunata ruwaspayki Israelpa mirayninkunata musoqmanta señalay, nispa.

³Chaymi Josueyqa rumimanta ñaw-chiyachisqa cuchillokunata ruwaruspan Israelpa mirayninkunata [2]Aralot moqopi qari kayninkuta señalarqa.

⁴Señalarqaqa Egiptomanta lloqsimuq guerrapi peleaq qarikuna chunniqninta hamusqankupi llapallan wañurusqankuraykum.

⁵Egiptomanta lloqsimuq qarikunaqa llapallankum qari kayninkupi señalasqa karqaku. Chunniqta hamusqanku ñanpi nacemuqkunam ichaqa mana señalasqachu karqaku.

⁶Israelpa mirayninkunaqa, tawa chunka watam chunniqpi purirqaku guerraman lloqsiq qarikuna tukunankama. Mana kasukusqankuraykum Tayta Dios jurarqa ñawpaq taytankuman prometesqan tukuy imapa kanan chaynataq tukuy imapa qespinan allpata mana qawachinanpaq.

⁷Chayraykum Josueyqa chay runakunapa miraynintaña, paykunapa rantinpi señalarqa. Paykunaqa chunniqpi purisqankuraykum mana señalasqaraqchu karqaku.

⁸Llapallan qarikunam señalachikuyta tukuruspanku sanoyanankukama hina campamentollapi samarqaku.

⁹Chaymi Josueyta Tayta Dios nirqa: “Kunanmi qechuykichik Egipto nacionpi sirviente kaspa penqay qepikichikta”, nispa. Chayraykum chay sitiota [3]Gilgalwan suticharqaku. Kunankamapas hina chaynam sutin.

¹⁰Israelpa mirayninkunam Gilgalpi samaruspanku Pascua fiestata ruwarqaku, punta kaq killapa chunka tawayuq punchawnin tardeykuyta, Jericó llaqtapa chimpan pampapi.

¹¹Pascua fiestapa paqarinnintin punchawtam, Canaán allpapa rurunkunataña mikuyta qallaykurqaku. Mikurqakutaqmi mana levadurayuq tantatawan trigo hamkakunatapas.

¹²Chay allpapi kawsaykuna mikusqanku punchawpa paqarinnillantam mikunanku “maná” taniramurqa, chayraykum Israelpa mirayninkunaqa, Canaán allpapa rurunkunataña chay wata mikurqaku.

¹³Jericó llaqtapa hichpanpi Josué kachkaspanmi qonqaymanta huk runata espada makiyuq sayachkaqta ñawpaqninpi rikururqa. Chaymi asuykuspan tapurqa: ¿Ñoqayku partechu kanki icha enemigoykumantachu? nispa.

¹⁴Chay runañataqmi nirqa: Ñoqaqa Tayta Diospa tropankuna kamachiqmi kani, nispa. Hinaptinmi qonqoranpa kumukuykuspan Josué nirqa: Señorlláy, ¿imatataq kay serviqnikiman kamachiwanki? nispa.

¹⁵Chaymi Tayta Diospa tropankunapa kamachiqnin nirqa: Usutaykita hurqokuy, kay sayasqayki allpaqa chuyam, Tayta Diospaq sapaqchasqa sitiom, nispa. Hinaptinmi Josué chaynata ruwarqa.