Read CHUYA QELLQA La Biblia en Quechua de Ayacucho 2012 Josué 8 Bible Online

Josué 8 - CHUYA QELLQA La Biblia en Quechua de Ayacucho 2012 bible

Josué 8

¹Josueytam Tayta Dios nirqa: Ama manchakuychu nitaq hukmanyaychu. Guerrapaq llapallan solda-dokunata pusaspayki Hai llaqtaman qespiy. Ñoqam Hai llaqtata, reyninta, runankunata chaynataq allpantapas qanman qosqayki.

²Imaynam Jericó llaqtawan reyninta ruwasqaykita hinam Hai llaqtatapas chaynataq reynintapas ruwanki. Kunanmi ichaqa tukuy imankunatapas chaynataq animalninkutapas apakamunkichik. Chaynaqa, yaykunaykichikpaqyá, llaqtapa qepa lawninpi runakunata pakasqallapi churay, nispa.

³Chaymi Josueywan guerrapaq soldadokuna alistakurqaku Hai llaqtapa contranpi rinankupaq. Paykunamantam kimsa chunka waranqa allinnin qari-qari soldadokunata Josué akllarqa, hinaspam tutallan kachaspan,

⁴kaynata nirqa: Llaqtapa qepa lawninpim pakakurunkichik, amam llaqtamanta llumpay karupiqa churakunkichikchu, hinaspam atacanaykichikpaq chaylla kankichik.

⁵Ñoqañataqmi wakin soldadokunapiwan llaqtaman asuykamusaqku. Contraykupi lloqsiramuptinkum, ñawpaqta hina paykunamanta lluptisaqku.

⁶Ayqeptiykum llaqtamanta karunchakurunaykukama qatimuwanqaku. Paykunam ninqaku: “Ñawpaqta hinam ñoqanchikmanta lluptichkanku”, nispanku.

⁷Qamkunañataqmi pakakusqaykichikmanta lloqsiramuspa llaqtaman yaykurunkichik, Diosninchik-mi makikichikman churamunqa.

⁸Yayku-ruspaykichikmi, Tayta Diospa nisqanman hina kañaykunkichik. Chaynatam ñoqa kamachikichik, nispa.

⁹Chaynata Josué kachaykuptinmi, paykunañataq pakakuq rirqaku, hinaspam Hai llaqtapa inti seqaykunan lawninpi churakururqaku, Bet-elmanta Haiman rinapi. Josueyñataqmi chay tuta hina campamentopi qeparurqa.

¹⁰Paqarinnintin tutapayta hatariruspanmi tropankunata Josué alistaykuspan, Israelpa ancianonkunawan kuska, Hai llaqtapa contranpi tropankunapa ñawpaqninta rirqa.

¹¹Paywan riq soldadokunam, llaqtapa ñawpaqninman chayaruspanku, Hai llaqtapa norte lawninpi campamentonkuta sayachirqaku. Qechwallam Hai llaqtamanta paykunata rakirqa.

¹²Josueymi yaqa pichqa waranqa soldadokunata akllaruspan, Hai llaqtapa intipa seqaykunan lawninpi pakarurqa, Bet-elmanta Hai llaqtaman rinapi.

¹³Chaynatam tropankunata iskayman rakinarurqa. Campamentopi kaq soldadokunam llaqtapa norte lawninpi samarurqaku, wakinñataqmi llaqtapa intipa seqaykunan lawninpi pakakurqaku. Josueymi chay tuta, chawpi qechwakama asuykurqa.

¹⁴Chayta yachaykuspanmi Hai llaqtapa reyninñataq llapa tropankunawan tutapayta hatarispa lloqsirqaku Israelpa tropankunawan Arabá qechwapi peleanankupaq. Manam musyarqakuchu llaqtapa qepanpi tropakuna pakakusqantaqa.

¹⁵Josueyñataqmi tropankunawan vencerachikuq tukuspanku paykunamanta chunniq lawman lluptirqaku.

¹⁶Chaymi Hai llaqtapi llapallan runakuna qatinankupaq huñunakururqaku, hinaspam Josueyta qatispanku llaqtamanta karunchakururqaku.

¹⁷Hai llaqtapipas chaynataq Bet-el llaqtapipas Israelpa mirayninkunata qatisqankuraykum mana chulla runapas qeparqachu, chaynapim llaqtapa punkunta kichasqata saqerurqaku.

¹⁸Hinaptinmi Josueyta Tayta Dios nirqa: Lanzaykita Hai lawman hoqariy, kunanmi llaqtata qosqayki, nispa. Chaymi Josué makinpi lanzata chay llaqta lawman hoqarirqa.

¹⁹Chayta qawarispankum, pakakuq soldadokunapas utqayman lloqsispanku kallpaylla llaqtaman yaykuruspanku ninawan kañaykurqaku.

²⁰Hai llaqtayuq runakunañataqmi qepankuta qawarispa rikururqaku llaqtankumanta cielokamaraq qosni hoqarikuchkaqta. Chaymi Israelpa tropankuna chunniqman lluptiq tukusqankumanta paykunaman kutiriykamusqanrayku manaña maylawmanpas lluptiyta atirqakuñachu.

²¹Josueymi Israelpa mirayninkunapiwan, pakakuq tropakuna llaqtaman yaykuruspa kañaykusqankuta rikuruspanku, Hai llaqtayuqkunata atacanankupaq kutiriykamurqaku.

²²Llaqtaman yaykuq tropakunapas lloqsispam atacarqaku, chaynapim Israelpa tropankunaqa Haipa tropankunata chawpicharuspanku llapallankuta wañurachirqaku, manam chulla runatapas puchurqakuchu.

²³Hai llaqtapa reyllantañam kawsachkaqta Josueyman pusarqaku.

²⁴Israelpa tropankunaqa, campopipas chunniqpipas Hai llaqtapa tropankunata wañuchiyta tukuruspankum, llaqtaman kaqlla kutirispa, chaypi qepaqkunatapas espadawan wañurachirqaku.

²⁵Chay punchawmi Hai llaqtayuqkuna, qaripas warmipas chunka iskayniyuq waran-qa wañurqaku.

²⁶Josueymi atacanankupaq kamachispan lanzan haywarisqanta mana suchuchirqachu Hai llaqtayuqkuna llapallanku wañuchisqa kanankukama.

²⁷Israelpa mirayninkunaqa, Josueynintakama Tayta Diospa kamachisqanman hinam, Hai llaqtapa animalninkunatapas chaynataq tukuy ima kapuqninkunatapas apakurqaku.

²⁸Josueymi Hai llaqtata kañaruspa pasaypaqta tuñirachirqa. Chay llaqtaqa kunankamapas hinam purmachkan.

²⁹Hai llaqtapa reynintañataqmi, chay punchaw tardeykunankama sachapi Josué warkururqa. Inti seqaykuytañam kamachirqa ayanta sachamanta hurqospa llaqtapa punkunman wischumunankupaq. Wischuykuspam rumita montorurqaku. Chay rumikunaqa hinallam kunankamapas montorayachkan.

³⁰Chaymantam Josueqa, Israelpa Diosnin Tayta Diospaq huk altarta Ebal orqopi ruwachirqa.

³¹Israelpa mirayninkunaman Tayta Diospa serviqnin Moisespa kamachisqanman hinam chaynataq Moisespa kamachikuykuna qosqanmanta qellqasqa libroman hinam, chay altartaqa mana labrasqa rumikunamanta ruwarqa. Chay altarpim Israelpa mirayninkuna lliw kañana sacrificiokunata chaynataq Dioswan allinlla kasqankumanta ofrendata Tayta Diosman ofrecerqaku.

³²Chay rumikunapa hawanpim, Moisespa kamachikuykuna qosqanta Israelpa mirayninkunapa qayllanpi Josué qellqarqa.

³³Israelpa mirayninkunañataqmi, paykunawan yachaq huklaw llaqtayuqkunawan, ancianokunawan, juezkunawan, kamachikuqkunawan kuska, Tayta Diospa Arcanpa kaylawninpi waklawninpi sayarqaku, Diospa Arcan apaq sacerdotekunapa ñawpaqninpi. Wakinmi Gerizim orqo lawman sayarqaku, wakinñataqmi Ebal orqo lawman. Chaykunatam ruwarqaku Tayta Diospa serviqnin Moisespa kamachisqanman hina. Chaypim sacer-dotekuna Israelpa mirayninkunata chayllaraq bendecirqaku.

³⁴Chaypa qepantam Josué leerqa Diospa kamachikuyninkunata chaynataq bendicionkunatawan ñakaykunatapas; imaynam kamachikuy libropi qellqasqa kasqanman hina.

³⁵Moisespa kamachisqan kaqkunataqa lliwtam Josué leerqa. Chaykunataqa leerqa llapallan Israel castakunapa qayllanpim, qarikunapa, warmikunapa, warmakunapa hinaspa paykunawan yachaq huklaw llaqtayuqkunapa qayllanpim.