Read CHUYA QELLQA La Biblia en Quechua de Ayacucho 2012 1~Timoteo 1 Bible Online

1~Timoteo 1 - CHUYA QELLQA La Biblia en Quechua de Ayacucho 2012 bible

1~Timoteo 1

¹Ñoqa Pablom Cristo Jesuspa apostolnin kani, salvaqninchik Dioswan hinaspa suyasqanchik Cristo Jesuspa kamachisqanman hina.

²Kuyasqay Timoteo rimaykamuykim, qamqa iñiypi cheqap churiymi kanki. Dios Taytanchikwan Señorninchik Jesucristoyá kuyakuynintawan hawkayayninta qampa hawaykiman chaqchurimuchun.

³Macedonia lawman rispay ruegakusqayman hinayá Éfeso llaqtapi qepaykuy wakinkunata kamachinaykipaq, chaynapi amaña sapaq yachachikuykunata yachachinankupaq.

⁴Amataqyá kasuchunkuchu cuentokunatapas nitaq ñawpaq taytakunapa sutinmanta manaña tukuy atina listatapas, chaykunaqa atipanakuykunallatam hatarichin, Diospa ruwayninkunapiqa manataqmi imapipas yanapakunchu, chay munayninkunataqa iñiyllawanmi reqsinchik.

⁵Kay kamachikuykunaqa cheqaptapuni kuyanakunanchikpaqmi, chay kuyanakuyqa hamun, chuya sonqomanta, allin concienciayuqmanta hinaspa cheqap iñiyniyuqkunamantam.

⁶Wakinkunam chayna kawsakuymanta karunchakuruspa yanqa atipanakuykunapi pantarunku.

⁷Paykunaqa allin yachachikuq tukusparaqmi leymanta yachachikuyta munanku, rimasqankutawan yachachisqankutam ichaqa mana entiendeyta atinkuchu.

⁸Yachanchikmi kamachikuykunaqa allin kasqanta, sichum chay kamachikuyman hina ruwaptinkuqa.

⁹Yachasqanchikpi hinapas leyqa qosqa karqa manam allin ruwaq runakunapaqchu, aswanqa leyta qepanchaqkunapaqmi, mana kasukuqkunapaqmi, millay ruwaqkunapaqmi, huchasapakunapaqmi, Diosta mana manchakuqkunapaqmi, tayta-maman wañuchiqkunapaqmi, runa wañuchiqkunapaqmi,

¹⁰waqllikuqkunapaqmi, qaripura kakuqkunapaqmi, runamasin suwaqkunapaqmi, llullakuqkunapaqmi, yanqapas-yanqa Diospa sutin rimaqkunapaqmi hinaspa allin yachachikuykunapa contranpi kaqkunapaqmi.

¹¹Chay allin yachachikuyqa yupaychasqanchik Diospa kunawasqan ancha allin noticiam.

¹²Señorninchik Jesucristom allinpaq hapiwaspan serviqnin kanaypaq akllaykuwarqa hinaspam kallpanchaykuwarqa, chaymi llumpayta agradecekuni.

¹³Ñawpaqtaqa ñoqaqa Diospa contranpim karqani, paypi iñiqkunatam qatikacharqani, chaynata ruwaspaymi payta piñachirqani. Ichaqa Diosmi llakipayariykuwarqa manaraq iñisqayrayku mana yachaywan chayta ruwasqaymanta.

¹⁴Señorninchikmi kuyakuyninta ñoqaman achkanpi chaqchurimuwarqa hinaspam Jesucristopi kaq iñiytawan kuyakuyta qoykuwarqa.

¹⁵Kay palabraqa cheqapmi, lliwmi chaskispa iñinanchik, Jesucristom kay pachaman hamurqa huchasapakuna salvananpaq, paykunamantaqa aswan huchallikuqmi kani.

¹⁶Chaywanpas Diosmi ñoqata llakipayariykuwarqa, chaynapi Jesucristo pacienciakuyninta ñoqantakama qawachikunanpaq chaynataq haykam iñikuspanku wiñay kawsay haypaqkunapaq ejemplo kanaypaq.

¹⁷Chayraykuyá Diosta yupaychaspa hatunchasun wiña-wiñaypaq. Payqa mana wañuq kaspam wiña-wiñaypaq munaychakuchkan, payqa mana rikuy atina chullalla Diosmi. Amén.

¹⁸Kuyasqay churiy Timoteo kaytam kamachimuyki: Ñawpaqmantaraq qanmanta profetizasqankuta yuyarispayá allin peleaq soldado hina mayna sasaña kaptinpas sunita sayay.

¹⁹Iñiynikitawan sonqoykitayá allinta takyachiy, wakinqa concienciankuta mana kasuspam yakupi heqepachkaq hina iñiyninkuta chinkarachinku.

²⁰Chaynatam Himeneowan Alejandropas pantarurqaku. Chaymi Diospa contranpi manaña rimanankupaq Satanasman qoykuni.