Read CHUYA QELLQA La Biblia en Quechua de Ayacucho 2012 Tito 1 Bible Online

Tito 1 - CHUYA QELLQA La Biblia en Quechua de Ayacucho 2012 bible

Tito 1

¹Ñoqa Pablom Diospa serviqnin hinaspa Jesucristopa apostolnin kani. Paymi kamachiwarqa Diospa akllasqankunata iñichinaypaq hinaspa kay allin noticiaman hina Diospa cheqap kaqninkunata reqsichinaypaq,

²chaynapi wiñay kawsayta confianzawanña suyanankupaq. Chaytaqa manaraq kay pacha unanchasqa kachkaptinraqmi mana llullakuq Dios prometekurqaña,

³hinaspa imam tiemponpi, allin noticia willakuynintakama palabran willakusqa kananpaq, chayta willakunaypaqmi salvaqninchik Dios ñoqata kamachiwarqa.

⁴Tito qamqa iñiypi churiymi kanki, Dios Taytanchikwan salvaqninchik Jesucristoyá kuyakuynintawan hawkayayninta qanman chaqchurimuchun.

⁵Creta islapim qamtaqa saqemurqayki, mana ruway tukusqa kaqkunata tukunaykipaq hinaspa sapa llaqtapi kaq iglesiapi ancianokunata churanaykipaq.

⁶Ancianoqa mana pipapas anyananmi kanan, chullalla warmiyuq, churinkunapas Jesucristopi iñiqkuna, kasukuqkuna hinaspa mana pipapas acusananmi kananku.

⁷Iglesiapi nanachikuq ancianoqa Diospa mayordomon kasqanraykum kanan: Mana pipapas anyanan, mana hatun tukuq, mana piñakuq, upyaypi mana purikuq, mana piwanpas peleakuq, mana qollqella kuyaq.

⁸Payqa kanan: Wasinpi samaykachikuqmi, allin kaqkunata kuyaqmi, allin piensaqmi, allin arreglo ruwaqmi, Diosllapaqña sapaqchakuqmi hinaspa genionta controlakuqmi.

⁹Payqa cheqap yachachikuykuna chaskisqaman hapipakuqmi kanan, chaynapi wakinkunatapas cheqap kaqkunata yachachispa kallpanchananpaq hinaspa chay yachachikuypa contranpi rimaqkunatapas upalla-chinanpaq.

¹⁰Achkam kachkanku mana kasukuqkuna, llutan rimaqkuna, pantachikuqkuna; aswanqa judiokunamanta kaqkunaraqmi chayna rimaqkunaqa kachkankupas.

¹¹Chayna runakunataqa upallachinapunim, paykunaqa yanqamanta qollqella ganayta munaspankum pantaykunata yachachispanku achka ayllukunataña chaqwarunku.

¹²Paykunamanta hukkaqnin profetanmi kaynata nirqa: “Cretamanta runakunaqa llullallañam kanku, purun animal hina hinaspa mikuysapa qellakunam”, nispa.

¹³Chaykuna nisqanqa cheqappunim. Chaynaqa, as allinta qaqchay iñiyninkupi allinta sayanankupaq,

¹⁴hinaspa judiokunapa cuentolla rimasqankuta amaña uyarinankupaq, cheqap kaqmanta karunchakuqkunapa kamachikuyninkunatapas ama kasukunankupaq.

¹⁵Chuya sonqokunapaqqa tukuy ima kaqkunapas chuyam, qacha sonqoyuq hinaspa mana iñiqkunapaqmi ichaqa mana imapas chuyaqa kanchu, pay-kunapaqqa yuyaymanayninkupas, concienciankupas qanrachasqam kachkan.

¹⁶Paykunam ninku: “Diostam reqsiniku” nispanku, ruwasqankuwanmi ichaqa Diosta neganku. Paykunaqa chiqnikuqmi, mana kasukuqmi hinaspa allin kaqkuna mana ruway munaqmi kachkanku.