Read CHUYA QELLQA La Biblia en Quechua de Ayacucho 2012 Hebreos 10 Bible Online

Hebreos 10 - CHUYA QELLQA La Biblia en Quechua de Ayacucho 2012 bible

Hebreos 10

¹Moisespa leyninqa karqa ha-muq kaqkunapa llantuynin hinallam, manam kikin allin kaqkunachu. Chayraykum leyman hinaqa animalkunata kañaspa watan-watan ofreceqkunapas mana chuyanchakuyta atiqkuchu.

²Leyman hina ofrenda qosqanku huchankuta chuyanchaptinqa manaña huchayuqpaq hapikuptinkuqa, manañachiki sapa kutilla ofrendata qonmankuchu karqa.

³Aswanqa kay sacrificio ofrecesqankuqa servikun huchankumanta sapa wata yuyarinankupaqmi.

⁴Torokunapa chaynataq chivatokunapa yawarninqa huchakuna chuyanchaytaqa manam atirqachu.

⁵Chayraykum kay pachaman Cristo hamuspan Diosta nirqa: “Sacrificiotawan ofrendataqa manam munarqankichu, aswanqa huk cuerpotam qoykuwarqanki.

⁶Lliw kañana sacrificiotapas manam munarqankichu, hucharayku ofrendatapas manam munarqankichu.

⁷Chaymi nirqani: Kaypim kachkani, Chuya Qellqapim ñoqamanta kaynata nichkan, Diosnilláy, hamurqaniqa munasqayki ruwanaypaqmi”, nispa.

⁸Nisqanpi hinam “sacrificiokunatawan, ofrendakunata, lliw kañana sacrificiokunata hinaspa hucharayku ofrendakunataqa mana munarqankichu nitaqmi chaskirqankichu”. Chaykunataqa ofrecenku leypa kamachisqanman hinallam.

⁹Chaymi nirqa: Hamurqaniqa munasqaykita ruwanaypaqmi, nispa. Chaynata nispanmi ñawpaq pactota yanqacharuspan musoq pactotaña churarqa.

¹⁰Jesucristom wiñaypaq huk kutillata cuerponta sacrificiopi ofrecespan Diospa munasqanta ruwarurqa, chaynapim sapaqchasqaña kachkanchik.

¹¹Llapa sacerdotekunam, mana huchakuna chuyanchaq ofrendata hina chayna sacrificiollata Diosman sapa punchaw ofrecenku.

¹²Cristom ichaqa wiñaypaq huk kutillata hucharayku ofrecekuspa wañurqa, hinaspam Diospa alleqninpi tiyaykurqa.

¹³Chaypim suyachkan enemigonkunata kikin Dios saruchinankama.

¹⁴Chaynatam Cristoqa huk kutillata wañusqanwan wiñaypaq haykam Diospaq sapaqchasqa kaqkunata chuyancharun.

¹⁵Chuya Espiritum kaynata willawanchik:

¹⁶Chay punchawkuna pasaruptinmi paykunawan pacto ruwasqayqa kayna kanqa: Yachachikuyniytam sonqonkupi churasaq, qellqasaqtaqmi yuyayninkupipas. Señormi chaynata nin.

¹⁷Nintaqmi: Huchankutawan mana allinkuna ruwasqankuta pampachaspayqa manañam haykapipas yuyarisaqñachu, nispapas.

¹⁸Chaynaqa, huchakuna pampachasqaña kaptinqa hucharayku ofrendakunaqa manañam kanmanñachu.

¹⁹Chaynaqa, wawqe-panillaykuna Jesucristopa yawarnin chaqchusqanraykuyá confianzawan “Chuyay-chuyay” lugarman yaykusunchik.

²⁰Payqa velota llikichkaq hinam kikinpa cuerponwan, kawsachkaq musoq ñanta kichaykapuwarqanchik.

²¹Diospa wasinpiqa pusawaqninchik Sumo sacerdotem kapuwachkanchik.

²²Chaynaqa, cheqap sonqowanyá ama iskayrayaspa, cheqap iñiywan, huchakunamanta sonqonchikpas chuyanchasqa chaynataq cuerponchikpas chuya yakuwan mayllasqayá Diosninchikman asuykusunchik.

²³Ama maylawmanpas muyuspayá imam iñisqanchikpi takyasunchik, Diosqa imam prometewasqanchiktaqa cumplinqapunim.

²⁴Hukninchikmanta hukninchikkama yanapanakuytayá maskasunchik, tukuymanta llalliqtaqa kuyanakuspa allinkuna ruwayta.

²⁵Wakinkunapa costumbrenman hinaqa amayá huñunakuyman riytaqa saqesunchu, aswanqa Señorpa chaylla kutimunanta yachachkaspaqa kallpanchanakusunyá.

²⁶Sichum cheqap kaqta chaskiruchkaspa hinallaraq huchallikusun, hinaptinqa manañam hucharayku sacrificioqa kanñachu,

²⁷aswanqa mancharikuypaq juicio suyayllañam, chaypim rupachkaq rawraq ninapi enemigonkunata Dios kañanqa.

²⁸Moisespa leynin mana kasukuqkunaqa, iskay otaq kimsa testigo declaraptinmi mana llakipayaspa wañuchisqa kanqaku.

²⁹Chaynaqa, ¡mayna castigasqaraqmi kanqa! Diospa Churinta sarutyaq runaqa, Diosllapaqña sapaqchaqnin musoq pacto yawartapas despreciaq runaqa hinaspa Diospa kuyapayakuynin qokuq Chuya Espiritutapas kamiq runaqa.

³⁰ Señorpa kayna nisqantaqa yachan-chikmi, paymi nirqa: “Mana allin ruwaqkunatam vengakusaq, mana allin ruwasqanman hinam pagapusaq”, nispa. Huklawpipas kaynatam nichkan: “Señormi llaqtanta juzganqa”, nispa.

³¹¡Mayna mancharikuypaqmi kawsaq Diospa makinman wichiykuyqa!

³²Achkiy chaskisqaykichik punchawkunatayá yuyariychik, chay punchawkunapiqa llumpayta ñakarichkaspapas kallpancha-kuspam allinta sayarqankichik.

³³Huk kutipim runakuna qawakunankupaq tukuy imaymana kamisqa hinaspa maqapasqa karqankichik. Huk kutipiñataqmi ñakariqkunapa ñakariqmasin karqankichik.

³⁴Carcelpi kaqkunamantapas llakipayarikurqankichikmi, imaykichikta qechusuptikichikpas kusisqallam karqankichik, chaynataqa ruwarqankichik hanaq pachapi aswan allin wiñaypaq kapuqniyuq kasqaykichikta yachaspam.

³⁵Chaynaqa, Diospi hapipakuynikichiktaqa amayá saqeruychikchu, hatun premioykichikqa kachkanmi.

³⁶Diospa munasqan ruwanapaqa pacienciakunaykichikmi, chaynapim paypa prometekusqankunata chaskinkichik.

³⁷Chuya Qellqam kaynata nin: “Payqa chayllam kutimunqa, chay hamunanpaq kaqqa, manam unamunqachu.

³⁸Allin ruwaq runaqa iñisqanraykum kawsanqa, qepanchakuruwaptinmi ichaqa mana kusisqachu kasaq”, nispa.

³⁹Ñoqanchikqa manam wiñaypaq castigasqa kanankupaq qepaman kutiqkunapa castanchu kanchik, aswanqa iñispa salvación haypaqkunapa castanmi kanchik.