Read CHUYA QELLQA La Biblia en Quechua de Ayacucho 2012 Hebreos 3 Bible Online

Hebreos 3 - CHUYA QELLQA La Biblia en Quechua de Ayacucho 2012 bible

Hebreos 3

¹Wawqe-panillaykuna, qamkunaqa kachkankichik Diospaq sapaq-chasqam chaynataq hanaq pachapi huñunasqa kanaykichikpaq qayasqam, chaynaqa Diospa kachamusqan sacerdotekunapa kamachiqnin chaskisqanchik Jesucristopiyá yuyaymanaychik.

²Jesusqa tukuy imapim Diospi hapipakurqa, chaypaq qayasqam karqa, imaynam Moisespas Diospa wasinpi servikusqanta hina.

³Wasimantaqa ruwaqninmi aswan reqsisqa, chaynam Jesuspas Moisesmantaqa aswan reqsisqa.

⁴Lliw wasiqa runapa ruwasqallanmi, Diosmi ichaqa tukuy imata unancharqa.

⁵Moisesqa Diospa wasinpi allin servikuq hinaspa lliwpi kasukuqmi karqa, imapas Diospa nisqankunamanta willakunanpaq.

⁶Cristom ichaqa Churin kasqanrayku Diospa wasinpi munayniyuq karqa, chay wasi hinam ñoqanchikpas paypi hatun confianzawan kallpanchakuspaqa kanchik.

⁷Chaynaqa, imaynam chuya Espiritupa nisqanman hina: Sichum kunan, Diospa nisqanta uyarispaqa,

⁸amayá sonqoykichikta rumiyarachiychikchu piñachiwasqanku punchawpi hinaqa, chunniqpi tentawaspanku ruwasqankuta hinaqa.

⁹Chaypim ñawpaq taytaykichikkuna tentawarqaku, tukuy ruwasqaykunata tawa chunka wata rikuchkaspankupas tentawarqakum.

¹⁰Chayraykum chay runakunawan piñasqa kaspay, kaynata nirqani: “Tukuy tiempo pantaq sonqoyuqmi karqankichik” manam “ñanniykunatapas reqsiyta munarqankichikchu”, nispa.

¹¹Chayraykum piñakuyniypi jurarqani: “Samanankupaq qosqaymanqa manam yaykunqakuchu”, nispay.

¹²Wawqe-panillaykuna, qamkuna ukupiqa amayá kachunchu rumi sonqo hinaspa mana iñiyniyuq runakunaqa, chaynapi kawsaq Diosmanta ama rakikunaykichikpaq.

¹³Aswanqa huknikichikmanta-huknichikkamayá sapa punchaw kallpanchanakuychik, chaynapi manaraq Qellqapa “kunan” nisqan tukuruchkaptin, mayqannikichiktapas hucha engañaptin sonqoykichik ama rumiyarunanpaq.

¹⁴Ñoqanchikqa Cristowan hukllawasqañam kachkan-kichik, ichaqa imaynam qallariyninmanta hapipakuspa takyasqanchikpi hinayá tukupaykama allinta takyasun.

¹⁵Chuya Qellqam kaynata nin: Sichum kunan Diospa nisqanta uyarichkaspaykichikqa, amayá sonqoykichikta rumiyarachiychikchu, imaynam piñachiwasqanku punchawpi hinaqa.

¹⁶Diospa rimasqanta uyarichkaspankuqa, ¿pikunataq payta piñachirqaku? Moisespa pusamusqan llapallan runakunam.

¹⁷¿Pikunapaqtaq Diosqa tawa chunka watapuni piñakururqa? Payqa piñakururqa contranpi huchallikuqkunapaqmi, paykunam chunniqpi wañururqaku.

¹⁸¿Pikunamantaq Diosqa jurarqa samanankupaq qosqanman mana yaykunankupaqqa? Payqa jurarqa mana kasukuqkunapaqmi.

¹⁹Chaynaqa, Diospi mana creesqankuraykum mana yaykuyta atirqakuchu.