Read CHUYA QELLQA La Biblia en Quechua de Ayacucho 2012 Hebreos 4 Bible Online

Hebreos 4 - CHUYA QELLQA La Biblia en Quechua de Ayacucho 2012 bible

Hebreos 4

¹Diospa qosqan samakuyman yay-kunanchikpaq promesan kachkaptinqa cuidakusunyá, yanqañataq huk-kaqnikichik mana yaykuwaqchikchu.

²Judiokunaman hinam ñoqanchikmanpas allin noticiata willawarqanchik. Paykunam ichaqa mana iñiywanchu uyarirqaku, chaynapim paykunapaqqa mana valeq hina karqa, chaynaqa karqa iñiqkunaman mana hukllawakusqankuraykum.

³Iñiqkunam ichaqa Diospa samay qosqanman yaykurunchikña, paymi nirqa: Piñakuyniypim jurarqani: “Samanankupaq qosqaymanqa manam haykapipas yaykunqakuchu”, nispa. Chaywanpas kay pacha unanchas-qanmantapunim Diosqa tukuy ima ruwasqankunataqa tukurqa.

⁴Qellqapa hukkaqnin partenpim qanchis punchawmanta kaynata nichkan: “Qanchis kaq punchawpim tukuy ruwasqanmanta Dios samarqa”, nispa.

⁵Huklawpipas nichkantaqmi: “Samanankupaq qosqaymanqa manam haykapipas yaykunqakuchu”, nispa.

⁶Chaywanpas Diospa samay qos-qanman yaykuqkunaqa kachkanraqmi. Salvakunankupaq allin noticiata puntata uyarichkaspankupas mana kasukusqankuraykum mana yaykurqakuchu.

⁷Chayraykum Diosqa huktawan huk punchawta churan “Kunan punchaw” niqta, chaytam payqa ñawpaqmantaraq Davidnintakama willachiwarqanchikña: “Kunan tiempopi Diospa nisqanta uyarichkaspaqa amayá sonqoykichikta rumiyachiychikchu”, nispa.

⁸Israel miraykunaman samayta Josué qoykuptinqa, manañachiki huk punchawmantaqa Diosqa rimanmanñachu karqa.

⁹Chaywanpas Diospa llaqtanpaqqa kachkanraqmi samana punchawqa.

¹⁰Haykam Diospa samay qosqanman yaykuqkunaqa llamkayninkumantam samankuña, imaynam Diospas unanchasqankunata tukuruspan samasqanta hina.

¹¹Chaynaqa, Diospa qosqan samayman yaykuypiyá kallpanchakusunchik, chaynapi ñawpaq tiempopi mana kasukuqkunapa ruwasqanta qatipakuspa ama wichinapaq.

¹²Diospa palabranqa kawsay qokuqmi hinaspa atiyniyuqmi. Iskay lawnin filoyuq espadamantapas aswan kuchukuqraqmi. Runamanqa yaykun almankamaraqmi, espiritunkamaraqmi, tullunpa piezankunakamaraqmi, chilinankamaraqmi, hinaspam piensasqankunatawan sonqonpa munapayasqankunata reqsichin.

¹³Diospa tukuy ima unanchasqankunaqa manam pakasqachu kachkan. Tukuy chaykunaqa Diospa qayllanpim sutilla kachkan, paymanmi cuentata qosunchik.

¹⁴Diospa Churin Jesusqa Sumo sacerdotenchikmi, paymi hanaq pa-chaman yaykurqa. Chaynaqa, iñisqanchikpiyá takyasunchik.

¹⁵Sumo sacerdotenchik Jesusqa huchaman urmaqlla kayninchikmanta llakipayawaqninchikmi. Paypas ñoqanchik hinam tukuypi tentasqa karqa, ichaqa manam huchallikurqachu.

¹⁶Chaynaqa, confianzawanyá kuyapayawaqninchik Diosman asuykusunchik chaynapi sasachakuyninchik tiempokunapi llakipayawaspanchik yanapaykuwananchikpaq.