Read CHUYA QELLQA La Biblia en Quechua de Ayacucho 2012 Santiago 3 Bible Online

Santiago 3 - CHUYA QELLQA La Biblia en Quechua de Ayacucho 2012 bible

Santiago 3

¹Wawqe-panillaykuna, amayá qam-kuna ukupiqa llumpay yachachi-kuqkunallañaqa kaychikchu, yachas-qaykichikpi hinapas yachachikuqkunaqa aswan juzgasqam kasunchik.

²Llapa-llanchikmi imaymanapi pantanchik, sichum rimasqanwan pipas mana huchallikuspanqa mana pantaq runañam kachkan, chayna kaspaqa tukuy cuerpontapas controlanmanmi.

³Kasuwananchikpaqmi caballopa siminman frenota churanchik, chaywanmi lliw cuerponta sujetanchik.

⁴Qawariychikyá barcokunatapas, maynaña hatun kaptinpas hinaspa sinchi wayrapa apasqa kaptinpas, chullalla runam taksa timonwan munasqan lawman apan.

⁵Chaynam cuerponchikpiqa qallunchikpas taksalla, ichaqa imakunatañapas rimarunmanmi. Huk ninapa chispallanmi maynaña montetapas kañarunman.

⁶Qallunchikpas chay nina hinam, tukuy mana allinkunata rimaspan llapallan cuerponchiktaña huchallichiwanchik. Infiernopa ratachisqan nina hinam tukuy kawsayninchikta huchallichin.

⁷Runaqa mansarunmanmi ima purun animalkunatapas, alton pawaq animalkunatapas, maqta urukunatapas chaynataq lamar qochapi kaqkunatapas.

⁸Qallutam ichaqa mana pipas controlayta atinmanchu. Qalluqa mana allinmi, pipapas mana controlay atinanmi, chayqa kachkan wañuchikuq venenowan huntasqam.

⁹Qallunchikwanmi Dios Taytanchikta qapaqchanchik, hina qallunchikwantaqmi kikinman rikchakuq Diospa unanchasqan runatapas ñakanchik.

¹⁰Hina simillanchikmantam lloqsimun bendicionpas chaynataq ñakaypas. Wawqe-panillaykuna, chayqa manam chaynachu kanan.

¹¹¿Yaqachum huk pukyullamanta miski yakuwan qatqe yaku lloqsimunman?

¹²Wawqe-panillaykuna, ¿yaqachum higos sachaqa rurunman aceitunasta otaq uvasñataq higosta? Chaynataqmi huk pukyullamantaqa miski yakuwan puchqo yakuqa mana lloqsimunmanchu.

¹³Qamkuna ukupi yachayniyuq hinaspa allin entiendeq runa kaspaqa allin kawsakuyninwan hinaspa llampu sonqo kayninwanyá yachayniyuq kasqanta reqsichikuchun.

¹⁴Sichum qamkunapi envidianakuykuna kaptinqa hinaspa kikillaykichikpaq imatapas munaspaqa, amayá hatun tukuychikchu yachayniyuq kasqaykichikmantaqa, chaynata ruwaspaqa cheqap kaqpa contranpim llullakuchkankichik.

¹⁵Chayna yachayqa manam Diosmantachu hamun, aswanqa kay pachallamantam, runapa tanteollanmantam hinaspa kikin diablomantam.

¹⁶Maypim envidianakuykunapa hinaspa kikillanpaq imapas munaykunapa kasqanpiqa, kachkanraqmi chaqwanakuykuna hinaspa tukuy mana allin ruwaykuna.

¹⁷Hanaq pachamanta hamuq yachayqa chuyam. Chay yachaywan kaq runakunaqa hawka kawsakuqkunam, allin ruwaqkunam, llampu sonqokunam, allin yuyaywan kawsaqkunam, kuyakuqkunam, tukuy imapi allin kaqta ruwaqkunam, mana pimanpas sayapakuqkunam hinaspa mana iskay uyakunam.

¹⁸Hawkayay maskaqkunaqa, hawkayaypim tarpuchkanku allin kawsakuypa ruruyninta cosechanankupaq.