Read CHUYA QELLQA La Biblia en Quechua de Ayacucho 2012 Santiago 5 Bible Online

Santiago 5 - CHUYA QELLQA La Biblia en Quechua de Ayacucho 2012 bible

Santiago 5

¹Apukuna, ¡kayta uyariychik! Qepa punchaw ñakarinaykichikmantayá waqaspa qaparkachaychik.

²Tukuy kapuqnikichikmi ismusqa kachkan, pachaykichikpas puyupa mikusqanmi kachkan.

³Llapa qorikichikpas qollqekichikpas lliwñam akarun, chaykunam contraykichikpi rimarinqa, hinaspam aychaykichiktapas nina hina rupanqa. Tukupay punchawkunapaqmi tukuy ima kapuqnikichikta huñukurunkichik.

⁴Cosechaykichikpi llamkaqkunamanmi mana pagarqankichikchu, chaymi paykunapa qayakusqanta Tukuy Atiyniyuq Señor uyarirun. Chay mana pagasqaykichik qollqem Diospa qayllanpi acusasunkichik.

⁵Kay pachapi kawsaspaykichikmi aychaykichik kusichiypi, sonqoykichikpa munasqanpi purirqankichik, nakanapaq wirayachisqa ganado hinaraqmi poqorunkichik.

⁶Qamkunam mana huchayuq runakunata acusaspaykichik mana harkakuy atichkaqta wañuchirqankichik.

⁷Chaynaqa, wawqe-panillaykuna, Señor-ninchik kutimunankamayá paciencia-kuychik. Chakrapi llamkaqpas allin-ta cosechananpaqqa tarpuy paratawan poqoy paratam pacienciawan suyan.

⁸Chaynayá qamkunapas ama hukmanyaspa pacienciakuychik, Señorninchikpa kutimunanqa hichpallañam kachkan.

⁹Wawqe-panillaykuna, amayá qamkunaqa quejanakuychikchu, chaynapi ama castigasqa kanaykichikpaq, punkupi hinallañam juzgawaqninchikqa kachkan.

¹⁰Wawqe-panikuna profetakunapa ejemplontayá qatisunchik, paykunam ñakaristinpas pacienciakuspanku Señorpa sutinpi willakurqaku.

¹¹Ñoqanchikqa ñakarispa pacienciakuqkunataqa kusi-kuyniyuqpaqmi hapinchik. Uyarirqan-kichikmi Job sutiyuq runapa pacien-cianmanta, yachankichiktaqmi ñaka-riyninkuna tukuruptin Señorqa paywan imam ruwasqanmantapas, Señorqa kuyapayakuqmi hinaspa llakipayakuqmi.

¹²Wawqe-panillaykuna, tukuy imamantapas astawanqa amayá hanaq pacharaykupas, kay pacharaykupas, nitaq imaraykupas juraychikchu. Chayrayku, “arí” nisqaykichikqa “arí” nisqa kachun, “manam” nisqaykichikpas “manam” nisqa kachun, chaynapi Dios mana castigasunaykichikpaq.

¹³Mayqannikichikpas llakisqa kaspa-qa Diostayá mañakuychik. Mayqan-nikichikpas kusisqa kaspaqa takispayá Diosta yupaychaychik.

¹⁴Qamkuna ukupi pipas onqosqa kaptinqa iglesiapi ancianokunatayá qayaychik, chaynapi Señorpa sutinpi chay onqoqta aceitewan untaykuspa Diosta mañapunankupaq.

¹⁵Iñiywan Diosta mañakuyqa onqoqtam sanoyachin, Señormi sayarichinqa, huchapi kaptinpas pampachaykunqam.

¹⁶Huchaykichikta willanakuspayá Diosta mañakuychik, chaynapi sanoyanaykichikpaq. Justo runapa tukuy sonqonwan Dios mañakusqanqa llumpay atiyniyuqmi.

¹⁷Profeta Eliaspas ñoqanchik hinam karqa, paymi tukuy sonqonwan Diosta mañakurqa mana paramunanpaq chaymi kimsa wata soqta killan mana paramurqachu.

¹⁸Huktawan Diosta mañakuptinñataqmi paraykamurqa, chaymi chakrapi kawsaykuna huktawan rururqa.

¹⁹Wawqe-panillaykuna, sichum mayqannikichikpas cheqap yachachikuymanta pantaruptinqa, huknikichikñataq kutichimuptinqa

²⁰yachaychikyá: Chay huchallikuq runata pantay ñanmanta kutirachimuqqa huk almatam wañuymanta salvarun, hinaspam nana-nanaq huchankunatapas pampachaykachin.