Read CHUYA QELLQA La Biblia en Quechua de Ayacucho 2012 1~Pedro 2 Bible Online

1~Pedro 2 - CHUYA QELLQA La Biblia en Quechua de Ayacucho 2012 bible

1~Pedro 2

¹Chaynaqa, saqeychikñayá mana allin ruwaykunata, engañakuykunata, iskay uya kayta, envidiakuykunata, cuento qepi kayta.

²Imaynam naceq wawakuna ñuñuta maskachkaq hinayá Diospa cheqap palabranta maskaychik, chaywan wiñaspa salvo kanaykichikpaq.

³Qamkunaqa Señorpa kuyakuq sonqo kasqantaqa haypaykunkichikñam.

⁴Señorninchikmanyá asuykuychik, payqa kawsaq rumim, paytam runakuna wischupakurqaku, Diospaqmi ichaqa akllasqa ancha valorniyuq sumaq kawsaq rumi.

⁵Qamkunapas kawsaq rumi hinam kachkankichik. Diosmi qamkunawan rumiwan perqachkaq hina mana rikuy atina templota ruwachkan, chaynapi sacerdotekunaña kaspa Jesucristontakama mana rikuy atina sacrificiokunata Diosman ofrecenaykichikpaq.

⁶Chayraykum Qellqapas kaynata nin: “Ñoqam Sión moqopi cimientopaq churani kuyayllapaq suni takyaq akllasqa esquina rumita, pipas chay rumipi hapipakuqqa manam penqaypichu kanqa”, nispa.

⁷Qamkunapaqqa chay rumiqa ancha valorniyuqmi, mana iñiqkunapaqmi ichaqa Qellqapa kayna nisqan cumplikun: “Wasi perqaqkunapa wischupakusqanku rumim cimientopa esquinan hapiq rumiña rikurirun”, nispa.

⁸Kaytapas nintaqmi: “Paymi mitkana rumi hinaspa urmachikuq hatun rumi”, nispapas. Paykunaqa Diospa palabranta mana kasukusqankuraykum mitkarunku, chaypaqqa citasqañam karqaku.

⁹ Qamkunam ichaqa kankichik, Diospa akllasqan ayllukuna, Reyta serviq sacerdotekuna, Diospaq chuyanchasqan llaqta hinaspa Diospa rantisqan runankuna, chaynapi Diospa atiyninmanta willakunaykichikpaq, paymi tutayaymanta qayasurqankichik admirakuypaq achkiyninpi purinaykichikpaq.

¹⁰Ñawpaqtaqa manam llaqtanchu karqankichik, kunanmi ichaqa Diospa llaqtanña kankichik. Ñawpaqtaqa mana llakipayasqam karqankichik, kunanmi ichaqa Diospa llakipayasqanña kachkankichik.

¹¹Kuyasqay wawqe-panillaykuna, huklaw llaqtayuqta hinaspa illakuyllapi kaqta hinam ruegakuykichik, aychaykichikpa mana allinkuna munasqantaqa amayá ruwaychikchu, chaykunaqa almaykichikpa contranpim peleachkan.

¹²Diosta mana reqsiqkunapa qayllanpiyá allinta kawsaychik, chaynapim hucha ruwaqmanta hina contraykichikpi rimachkaspankupas allin ruwasqaykichikta qawaspanku, Diospa cuenta mañaq hamusqan punchawpi payta yupaychanqaku.

¹³Señorninchikraykuyá kasukuychik runakunamanta kaq autoridadkunata, reykunata, ancha munayniyuq kasqankurayku.

¹⁴Kasukuychikyá paypa churasqan kamachikuqkunatapas, paykunaqa churasqa kachkanku mana allin ruwaqkunata castiganankupaqmi hinaspa allin ruwaqkunatañataq hatunchanankupaqmi.

¹⁵Kaymi Diospa munayninqa: Allin kaqta ruwaspa, mana yachayniyuq runakunapa rimasqanta upallachiymi.

¹⁶Libre kaq runakuna hinayá kawsaychik, amataqyá libre kasqaykichikman hinaqa mana allinkunataqa ruwaychikchu, aswanqa Diosta serviq runakuna hinayá kawsaychik.

¹⁷Llapallantayá respetaychik, llapa iñiqmasikichiktapas kuyaychik, Diostapas hatunchaychik, reytapas kasukuychik.

¹⁸Criadokuna, patronnikichiktayá respetaspa kasukuychik, amayá allin runa kaptillanchu aswanqa piña-piña runa kaptinpas.

¹⁹Pipas Diospa munayninta yachachkaspa, mana kaqmanta ñakarispaqa pacienciakuchun, chayna ruwanatam Diosqa munan.

²⁰Sichum qamkunapas mana allinkuna ruwasqaykichikmanta castigasqa kaspaykichikqa, ¿ima allintaq kanman pacienciawan ñakariynikichikqa? Allin kaqkuna ruwasqaykichikmanta pacienciawan ñakariymi ichaqa Diospa qayllanpiqa allinpuni kanqa.

²¹Chaypaqmi Diosqa qayasurqankichik, Cristopas qamkunaraykum ñakarirqa, chaynapi paypa ejemplonta qatinaykichikpaq.

²²Cristoqa manam huchallikurqachu, nitaqmi pitapas engañarqachu.

²³Insul-taptinkupas manam kutipakurqachu, ñakarichiptinkupas manam amenazarqachu, payqa mana piman sayapakuspa allin arreglo ruwaq Diospa makinmanmi churaykurqa.

²⁴Kikin Cristom chakatasqa kaspan cuerponpi tukuy huchanchikkunata aparqa, chaynapi huchapaq wañusqaña kaspa allintaña kawsananchikpaq. Cristopa heridasqa kasqanwanmi sanoyayta haypankichik.

²⁵Qamkunaqa chullaruq ovejakuna hinam karqankichik, kunanmi ichaqa Cristomanña kutirikunkichik, paymi allin michiq hina almaykichikta michichkan.