Read CHUYA QELLQA La Biblia en Quechua de Ayacucho 2012 Jueces 19 Bible Online

Jueces 19 - CHUYA QELLQA La Biblia en Quechua de Ayacucho 2012 bible

Jueces 19

¹Chay punchawkunapiqa manam Israel nacionpi rey karqaraqchu. Efraín law orqokunamanta karupim Leví ayllumanta kaq runa huklaw llaqtayuq hina yacharqa, paymi Judá lawpi Belén llaqtamanta warmita uywanakuqmasin kananpaq pusamurqa.

²Hinaptinmi chay warmiqa piñakuruspan Judá law Belén llaqtapi taytanpa wasinman kutikurqa. Tawa killaña chaypi kachkaptinmi,

³qosanñataq qepanta qatirqa kuyakuyllawan rimapayaspan kutichimunanpaq. Pusarqataqmi criadontawan iskay asnokunatapas. Chayaruptinmi chay warmiqa taytanpa wasinpi chaskiykurqa.

⁴Chay warmipa taytanpas kusikuywanmi wasinpi chaskiykurqa. Harkaptinmi mikuspanku, upyaspanku hinaspa chaypi puñuspanku kimsa punchaw qeparurqa.

⁵Tawa kaq punchawmanñataqmi hatarirurqaku, Levitapas hatariruspanmi ripukunanpaq allichakurqa, ichaqa ripukunanpaq kachkaptinmi, chay sipaspa taytan nirqa: Asllatapas mikuykuyraq ñanpi mana pisiparunaykipaq, chaymantañachiki pasakunki, nispa.

⁶Chaymi mikunankupaq hinaspa upyanankupaq iskayninku tiyaykurqaku, hinaptinmi masanta sipaspa taytan nirqa: Ama hina kaspayá kunan tutatawanraq kaypi qepaykuy chaynapi sonqoykita kusichinaykipaq, nispa.

⁷Hatariruspan pasakunanpaqña kachkaspanpas suegron ruegapayasqanraykum huktawan chay tuta qeparurqa.

⁸Pichqa kaq punchawpipas tutapayta hatariruspan pasakunanpaq kachkaptinmi sipaspa taytan nirqa: Kunanpas mikuykuyraqyá kallpanchakunaykipaq, kaypiraqyá tardeykunankama karisunchik, nispa. Chaynapim iskayninku mikurqaku.

⁹Warmintawan criadonta pusarikuspa pasanankupaq chay qari hatariptinmi yapamanta suegron nirqa: Tutaykamuchkanñam, kunan tutatawanyá kaypi samakuy. Kayqaya punchawqa tutaykamuchkanña, sonqoykita kusichinaykipaqyá kaypi puñukuy. Paqarin tutapaytañachiki wasikiman ripukunki, nispa.

¹⁰Ichaqa chay runam, huk tutatawanraq mana qepayta munaspan, iskay silla asnontin chaynataq uywanakusqan warminpiwan pasakurqaku.

¹¹Jebús llaqtapa otaq Jerusalén llaqtapa chimpanmanmi yaqa inti seqaykuytaña chayarurqaku, hinaptinmi criadon nirqa: Jebuseokunapa llaqtanpi kay tuta samakunanchikpaq hakuchik, nispa.

¹²Chaymi patronninñataq nirqa: Mana Israelpa mirayninkunapa llaqtanmanqa manam richwanchu, Gabaa llaqtakamam chayasunchikqa, nispa.

¹³Samaspaqa samasunchik Gabaa llaqtapi otaq Ramá llaqtapiñam, nispa.

¹⁴Rispankum inti seqaykuytaña Benjamín lawpi Gabaa llaqtapa hich-panman chayarurqaku.

¹⁵Chaymi sama-pakunankupaq ñanmanta rakikuruspa Gabaa llaqtaman muyuykurqaku, ichaqa mana pipas samachiyta munaptinmi llaqtapa plazanpi tiyaykurqaku.

¹⁶Hinachkaptinmi huk machucha chakrapi llamkasqanmanta tutaykuqtaña hamuchkasqa, payqa Efraín orqokunamanta kasqanraykum Gabaa llaqtapi huklaw llaqtayuq hina yacharqa. Chay llaqtapi yachaqkunaqa Benjaminpa mirayninkunam karqaku.

¹⁷Chay machucham llaqtapa plazanpi tiyaq illakuq runata rikuruspan tapurqa: ¿Maymantataq hamuchkanki? ¿Maymantaq richkanki? nispa.

¹⁸Chaymi payñataq nirqa: Judá lawpi Belén llaqtamantam hamuchkaniku, hinaspam Efraín law orqokunapa waklawninpi maymi yachanaykuman richkaniku. Judá law Belén llaqtapim kamurqani, kunanñataqmi Tayta Diospa santuarionman richkani, ichaqa manam pipas wasinpi samaykachiwayta munanchu.

¹⁹Kachkanmi Asnoykupaq pajapas chaynataq pastopas. Ñoqapaq, warmiypaq chaynataq criadoykupaqpas kachkanmi tantawan vinopas, manam imapas pisipuwankuchu, nispa.

²⁰Hinaptinmi chay machucha nirqa: Wasiyman hakuchik, imapas pisisuqnikitaqa ñoqam qosqayki, amayá kay plazapiqa puñuychu, nispa.

²¹Wasinman pusaruspanmi asnonkunamanpas qaramurqa. Samakuqkunañataqmi chakinkuta mayllakuruspanku mikuspa upyarqaku.

²²Kusisqa kachkaptinkum, chay llaqtapi mana allin qarikuna wasita muyururqaku, punkuta takaspankum wasipa dueñonta nirqaku: Wasikiman yaykumuq runata abusanaykupaq hurqomuy, nispanku.

²³Wasiyuqmi ichaqa lloqsiramuspan ruegakurqa: Runamasillaykuna, amayá kay millakuypaq kaqtaqa ruwaychikchu, kay illakuq runaqa wasiypi samachisqaymi.

²⁴Kayqaya manaraq qari reqsiq warmi churiypas chaynataq kay qaripa warminpas kachkan, paykunata hurqomuptiyá munasqaykichikta ruwaychik, amayá kay qaritaqa abusaspa millakuypaq kaqtaqa ruwaychikchu, nispa.

²⁵Ichaqa chay runakunam uyariytapas mana munarqakuchu. Hinaptinmi chay Leví casta runa warminta hawaman hurqoramuptin tukuylla tuta achikya-nankama abusarqaku, achikyamuchkaptinñam saqerurqaku.

²⁶Pacha achikyaqtañam chay warmiqa qosanpa kasqanman kutimuspan machuchapa wasinpa punkupi wañururqa, chaypim achikyanankama karqa.

²⁷Qosanñataqmi tutapayta hatariruspan, ripukunanpaq punkuta kichaykuspan warminta punkupa pilarninman hapipakuykuspa wañusqa chutarayachkaqtaña tariykurqa.

²⁸Chaymi qosan nirqa: Hatariy, haku ripusun, nispa. Ichaqa wañusqaña kasqanraykum mana rimarirqañachu, chaymi qosanqa warminpa ayanta asnonman churkuykuspan maymi yachasqanman ripukurqa.

²⁹Wasinman chayaruspanmi cuchillota hapiykuspan, warminpa ayanta chunka iskayniyuqman kuchuparurqa, hinaspam Israel nacionpi sapa aylluman apachirqa.

³⁰Chaymi llapallan chayta qawaqkuna nirqaku: Israelpa mirayninkuna Egipto nacionmanta lloqsimusqankumanta kunankamapas manam haykapipas kaynataqa rikurqanchikchu. Chaynaqa, imatam ruwananchikpaqyá allinta tanteanakusun, nispanku.