Read CHUYA QELLQA La Biblia en Quechua de Ayacucho 2012 Jueces 21 Bible Online

Jueces 21 - CHUYA QELLQA La Biblia en Quechua de Ayacucho 2012 bible

Jueces 21

¹Israelpa mirayninkunam Mizpa llaqtapi kaynata jurarqaku: Amam mayqanninchikpas warmi churinchikta Benjamín castakunawanqa casarachisunchu, nispanku.

²Ichaqa Bet-el llaqtapi huñunakuruspankum Tayta Diospa qayllanpi tukuylla punchaw sinchita waqaspanku nirqaku:

³Israelpa yupaychasqan Dios Tayta-llayku, ¿imataq kay pasawanku Israel nacionpi huk ayllu faltananpaq? nispanku.

⁴Paqarinnintin punchawmi tutapayta hatariruspanku, altarta chaypi ruwaspanku lliw kañanapaq animalkunatawan allinlla kasqankumanta ofrendakunata ofrecerqaku.

⁵Hinaspam tapunakurqaku: Llapallan Israelpa mirayninkunamanta, ¿mayqan ayllutaq Tayta Diospa qayllanpi huñunakuyman mana rirqachu? nispanku. Paykunam kaynata jurarqaku: Tayta Diospa qayllanpi Mizpa llaqtapi huñunakuyman mana riqkunaqa wañuchisqapunim kanqaku, nispanku.

⁶Israelpa mirayninkunam sinchi llakisqa karqaku Benjamín ayllu hatun llakipi tarikusqanrayku, hinaspam nirqaku: Kunanmi Israel castamanta huk ayllu chinkarun.

⁷¿Imatataq ruwasunchik Benjamín ayllumanta puchuq qarikunapaq warmita tarinanchikpaq? Diosrayku juraspam nirqanchik: “Warmi churinchikwanqa amam casarachisunchu”, nispanchik.

⁸Chaynaqa, ¿kachkanchu Israelpa mirayninkunamanta hukkaqnin ayllu Mizpa llaqtapi Tayta Diospa qayllanpi huñunakuyman mana hamuq? nispanku. Hinaspam yuyarirurqaku chay guerrapaq huñunakuyman Galaad lawpi kaq Jabes llaqtamanta mana mayqanninpas hamusqanta.

⁹Runakunata yupaptinkum Galaad lawpi yachaq Jabes llaqtamantaqa mana pipas karqachu.

¹⁰Chaymi huñunakuypi llapallan kaqkuna Galaad law Jabes llaqtapi kaqkunaman chunka iskayniyuq waranqa soldadokunata kacharqaku; chaynapi qarikunata, wawakunata hinaspa qari reqsiq warmikunata lliwta wañuchimunankupaq.

¹²Chaymi Galaad law Jabes llaqtapi tawa pachak manaraq qari reqsiq sipaskunata tariramurqaku, hinaspam Canaán law Silo llaqtapi campamentoman pusamurqaku.

¹³Chaymantam Rimón qaqapi pakakuq Benjamín castakunaman Israelpa mirayninkuna willachimurqaku allinyanakuyman yaykunankupaq.

¹⁴Benjamín castakuna hamuruptinkum Israelpa mirayninkuna Galaad law Jabes llaqtamanta pusamusqanku warmikunata warminkupaq qoykurqaku, ichaqa manam llapankupaqqa hayparqachu.

¹⁵Israelpi wakin ayllukunam Benjamín ayllumanta llakikurqaku, Israelpa mirayninpi huk aylluta Tayta Dios chinkarachisqanrayku.

¹⁶Chaymi llapa ancianokuna huñunakuspa ninakurqaku: ¿Imatataq ruwasunchik mana warmiyuq puchuqkunapaq? Benjamín casta warmikunataqa lliwmi wañurachimunku,

¹⁷Benjamín castamanta lluptiqkunaqa mirayniyuqmi kananku, chaynapi Israel nacionpi huk ayllu mana chinkananpaq.

¹⁸Warmi churinchikkunawanqa manam casarachichwanchu. Ñoqanchikqa juraspam nirqanchik: “Ñakasqayá kachun Benjamín castakunawan pipas warmi churinta casarachiqqa”, nispanchik.

¹⁹Chaynaqa, sapa watam Tayta Diospaq Silo llaqtapi hatun fiestata ruwanku. (Silo llaqtam tarikun Bet-el llaqtapa norte lawninpi, Siquem llaqtaman riq ñanpa intipa qespimunan lawninpi hinaspa Lebona llaqtapa sur lawninpi).

²⁰Chaynata nispankum Israelpa ancianonkuna, Benjamín aylluman kaynata nichimurqaku: Silo llaqtapa hichpan uvas huertakunapi pakakuspam

²¹listollaña kankichik. Maypacham Silo llaqtamanta warmikuna tusustin lloqsimuptinkum qamkunapas pakakusqaykichikmanta lloqsiramuspa sapakama huk sipasta warmikichik kananpaq suwamunkichik, hinaspam Benjamín law llaqtaykichikman apakunkichik.

²²Sichum paykunapa taytan otaq turinpas reclamaq hamuwaptinkuqa kaynatam nisaqku: “Qoykullawaykuyá, ñoqaykum Jabes llaqtapi kaqkunawan peleamuspayku mana llapankupaqchu warmita pusamurqaniku. Manam kikikichikmantachu qochkankichik jurasqaykichikmanta huchayuq kanaykichikpaqqa”, nispanku.

²³Benjaminpa mirayninkunañataqmi chaynata ruwaspanku sapakama huk sipasta warminku kananpaq suwamurqaku. Tusuqkunamanta suwaruspankum herencia allpankuman kutikurqaku, hinaspam llaqtakunata musoqmanta hatarichispanku chaypi yacharqaku.

²⁴Israelpa wakin mirayninkunapas chaymantam sapakama kutikurqaku. Sapakamam maymi yachasqankuman otaq herencia allpankuman kutikurqaku.

²⁵Chay punchawkunapiqa Israel nacionpi manaraq rey kasqanraykum sapakama munasqankuman hina kawsakurqaku.