Read CHUYA QELLQA La Biblia en Quechua de Ayacucho 2012 Jueces 3 Bible Online

Jueces 3 - CHUYA QELLQA La Biblia en Quechua de Ayacucho 2012 bible

Jueces 3

¹Tayta Diosmi kay nacionkunata puchuchirqa Israelpa qepa nacemuq mirayninkunata pruebananpaq, paykunaqa manam Canaán allpapi guerrakunataqa rikurqakuchu.

²Chayraykum Israelpa mirayninkuna guerrapi peleayta yachanankupaq kay nacionkunata Tayta Dios puchuchirqa:

³Filisteamanta pichqa kamachikuqkunata, cananeokunata, sidoniokunata chaynataq Líbano orqopi yachaq heveokunatapas Baal-hermón orqomanta qallarispa Hamat lawman yaykuna qasakama.

⁴Chay runakunawanmi Israel miraykunata Tayta Dios pruebarqa, chaynapi kasukusqankuta otaq mana kasukusqantapas yachananpaq, chay kamachikuykunatam ñawpaq taytankuman Moisesnintakama Tayta Dios kamachirqa.

⁵Chaynapim Israelpa mirayninkunaqa cananeokunawan, he-teokunawan, amorreokunawan, ferezeokunawan, heveokunawan hinaspa jebuseokunawan yacharqaku.

⁶Warmi churinkutawan qari churinkutapas chay nacionniyuq runakunapa wawa-churinkuwanñam casarachirqaku, hinaspam chay runakunapa idolonkunatañam yupaycharqaku.

⁷Israelpa mirayninkunam mana allinkunata ruwaspa Tayta Diospa qayllanpi huchallikurqaku, hinaspam Tayta Diosmanta karunchakuruspanku Baal idolokunatawan Asera idolokunataña servirqaku.

⁸Chaymi Israel castakunapaq Tayta Dios piñakuspan [2]Mesopotamiapa reynin Cusan-risataimmanña qoykurqa, chaynapim Israelpa mirayninkunaqa Cusan-risataimtaña pusaq wata servirqaku.

⁹Hinaptinmi Israelpa mirayninkuna qaparispa Tayta Diosta mañakurqaku, chaymi librananpaq Calebpa sullka wawqen Cenazpa churin Otonielta Tayta Dios hatarichirqa.

¹⁰Otonielman Tayta Diospa espiritun huntaykuptinmi Israel miraykunata kamachispan guerrapi peleaq lloqsirqa, hinaptinmi Siria nacionpa reynin Cusan-risataimta Otonielpa makinman Tayta Dios churaykuptin vencerurqa.

¹¹Chaymi Israel nacionpi tawa chunka wata guerra mana karqachu, chaymantam Cenazpa churin Otoniel wañukurqa.

¹²Israelpa mirayninkunam kasqallan Tayta Diospa qayllanpi mana allinkunata ruwarqaku, chaymi Moab nacionpa reynin Eglonta Israel miraykunapa contranpi Tayta Dios kallpanchaykurqa.

¹³Rey Eglonmi Amonpa chaynataq Amalecpa mirayninkunata huñuruspan Israel miraykunawan peleaspan Palmeras sutiyuq llaqtata hapikuykurqa.

¹⁴Chaymi Moabpa reynin Eglonta Israelpa mirayninkuna chunka pusaqniyuq wata servirqaku.

¹⁵Israelpa mirayninkuna qaparispa Tayta Diosta mañakuptinkum libraqninkuta hatarichirqa, chay libraqninkum karqa Benjamín ayllumanta kaq Gerapa churin Aod. Payqa ichoq makinwanmi imatapas ruwaq. Paywanmi Moabpa reynin Eglonman Israelpa mirayninkuna impuestota apachirqaku.

¹⁶Aodmi parte metro sayayniyuq chaynataq iskay lawnin filoyuq espadata ruwakuruspan pachanpa alleq lawnin ukunman churakuykurqa.

¹⁷Hinaspam Moabpa reynin Eglonman impuestota aparqa. Eglonqa llumpay wirasapam karqa.

¹⁸Eglonman impuesto apasqanta qoykuspanmi, riqmasinkunata aviarurqa.

¹⁹Hinaspanmi Gilgal llaqtapi idolokunapa kasqankama riruspan rey Eglonpa kasqanman kutirispan nirqa: Reynilláy, willanaymi kachkan, nispan. Chaymi reyñataq nirqa: ¡Upallay! nispan. Hinaspanmi serviqninkunata kamachirqa qayllanmanta lloqsinankupaq, chaymi ñawpaqninmanta lliw lloqsirurqaku.

²⁰Wayraparikuna salapi rey Eglón tiyachkaptinmi, sapallankupiña asuykuspan Aod nirqa: Diospa palabranmi qanman willanay kachkan, nispa. Chaymi rey Eglón tiyananmanta hatariruptin,

²¹Aodñataq ichoq makinwan alleq lawninmanta espadanta hurqoykuspan reypa wiksanta tuksirurqa,

²²espadapas cabontin usturuspa wiksanpi chinkaykunankama, espadanta Aod mana hurqoptinmi, rey Eglonpa hatun ispayninpas lliw taqtakaramurqa.

²³Aodñataqmi corredorman lloqsiramuspan salapa punkunkunata cerrojowan as allinta wichqaruspan ventananta lloqsikururqa.

²⁴Aod lloqsiruptinñam reypa serviqninkuna hamururqaku, hinaspam salapa punkunkunata wichqasqata qawaykuspanku nirqaku: Reyqa ispakuchkanchá, nispanku.

²⁵Salapa punkunkunata manaña kichamuptinmi, suyasqankumanta muspaypi hinaña kaspanku llavewan kicharurqaku, hinaptinmi reyninkuqa wañusqaña pampapi chutarayachkasqa.

²⁶Reypa serviqninkuna suyanankukamam Aodqa lluptirurqa, hinaspam Gilgal llaqtapi idolokunapa kasqanta pasaruspan Seirat lawman ayqekurqa.

²⁷Chayman chayaruspanmi Efraín law orqokunapi trompetata tocaykurqa, hinaptinmi Israelpa mirayninkuna paywan kuska orqomanta uraykamurqaku, Aodñataqmi paykunapa ñawpaqninta rispan

²⁸nirqa: Qatiwaychik, enemigonchik Moab castakunatam Tayta Dios makinchikman churaykamun, nispa. Chaymi payta qatispa Moabman chim-pana Jordán mayupa vadonkunapi churakururqaku hinaspankum manaña pitapas chaynintaqa pasachirqakuñachu.

²⁹Chay tiempopim Moabpa yaqa chunka waranqa allinnin qari-qari soldadonkunata wañurachirqaku, manam chulla runatapas lluptichirqakuchu.

³⁰Chaynapim Moab nacionqa Israel castakunapa munaychakusqanña karqa, chaymantam pusaq chunka wata guerra mana karqachu.

³¹Aodpa qepantañataqmi Anatpa churin Samgarña hatarirqa, paymi torokunata tuksina puyawan filisteokunamanta soqta pachak runakunata wañurachirqa, paypas Israelpa mirayninkunatam librarqa.