Read CHUYA QELLQA La Biblia en Quechua de Ayacucho 2012 Jueces 9 Bible Online

Jueces 9 - CHUYA QELLQA La Biblia en Quechua de Ayacucho 2012 bible

Jueces 9

¹Jerobaalpa churin Abimelecmi mamanmanta ayllunkunapa kasqan Siquem llaqtaman rispan mamanpa ayllunkunata kaynata nirqa:

²Ama hina kaspayá Siquem llaqtapi llapallan kamachikuqkunata kaynata niychik: “¿Mayqantataq munawaqchik, Jerobaalpa llapallan qanchis chunka churinkuna kamachisunaykichiktachu icha ñoqalla kamachinaytachu? Amayá qonqaychikchu ñoqaqa qamkunapa aylluykichikmi kani”, nispa.

³Mamanmanta kaq wawqenkunam kaykunata Siquem llaqtapi kaqkunaman willaykurqaku, hinaptinmi chay runakunapa sonqonqa Abimelecpa favorninpi karqa, “payqa ayllunchikmi”, nispanku.

⁴Baal-berit idolopa templonmanta medio kilo masnin qollqeta Abimelecman qoykuptinkum, payta puriysinanpaq chaywan qella runakunata contratarurqa.

⁵Chaymi Ofra llaqtapi taytanpa ayllunkunaman Abimelec rispan, Jerobaalpa qanchis chunka qari churinkunata huk rumipa hawallanpi wañurachirqa, Jerobaalpa sullka churin Jotamllañam pakakurusqanrayku mana wañururqachu.

⁶Siquem llaqtapi yachaqkunawan Bet-milo llaqtapi yachaqkunañataqmi huñunakururqaku, Siquem lawpi tarikuq encina sachapa hichpanpi chaynataq yupaychasqanku pilarpa waqtanpi, hinaspam Abimelecta reypaq churarurqaku.

⁷Jotamñataqmi chaykunata yacha-ruspan, Gerizim orqopa puntanman qespispan chaymanta qayakamurqa kaynata: ¡Siquem llaqtapi yachaqkuna, uyariwaychik! ¡Qamkunatapas Tayta Diosyá uyarisunkichik!

⁸Huk kutipis llapa sachakuna reynin-kuta akllayta munasqaku, hinaspankus aceitunas sachata nisqaku: “Qamyá kamachiwayku”, nispanku.

⁹Chaysi acei-tunas sachaqa nisqa: “¿Aceite qonaytachu saqeruyman sachakunata kamachinaypaq? Chay aceiteywanmi Diospas chaynataq runakunapas kusikun”, nispa.

¹⁰Hinaptinsi sachakunaqa higos sachataña nisqaku: “Qamyá kamachiwayku”, nispanku.

¹¹Hinaptinsi higos sachañataq nisqa: “¿Miski ruruyniytachu saqeruyman sachakunataña kamachinaypaq?” nispa.

¹²Chaymantas sachakunaqa uvas sachataña nisqaku: “Chaynaqa, qamyá kamachiwayku”, nispanku.

¹³Hinaptinsi uvas sacha nisqa: “¿Diostapas chaynataq runakunatapas kusichiq vinoytachu saqeruyman sachakunataña kamachinaypaq?” nispa.

¹⁴Chaysi llapallan sachakunaqa tankar kichkataña nisqaku: “Qamyá kamachiwayku”, nispanku.

¹⁵Hinaptinsi tankar kichkaqa nisqa: “Cheqaptapuni kamachikunaypaq churaruwaspaykichikqa, hamuspa ñoqapa ukuypi llantukuychik, mana chayna kaptinqa ñoqamanta nina lloqsispa Libanopi cedrokunata ruparuchun”, nispa.

¹⁶Chaynaqa, kunanyá tapusqaykichik: ¿Abimelecta reypaq churaspaykichikqa cheqap kaqwan chaynataq allin sonqowanchu ruwarunkichik? ¿Jerobaaltapas chaynataq ayllunkunatapas allintachu ruwarunkichik? ¿Ruwapususqaykichikman hinachu pagarunkichik?

¹⁷Taytayqa qamkunarayku peleaspanmi, madianitakunamanta librasunaykichikpaq vidantapas wañuyman churarqa,

¹⁸qamkunañataqmi taytaypa ayllunkunapa contranpi hatariruspaykichik huk rumipa hawallanpi qanchis chunka qari churinkunata wañurachinkichik, hinaspam Siquem llaqtapi yachaq runakunapi kamachikunanpaq, taytay Jerobaalpa criadanpa wawan Abimelecta churarunkichik, chaynataqa ruwarunkichik aylluykichik kasqanraykum.

¹⁹Sichum cheqap kaqwan chaynataq allin sonqoman hina taytay Jerobaalwan hinaspa ayllunkunawan kunan ruwaspaykichikqa, Abimelecwanyá allin kaychik, paypas qamkunawantaqyá allin kachun.

²⁰Mana chayna kaptinqa Abimelecmanta nina lloqsiramuspan Siquem llaqtapi runakunatawan Milo llaqtapi yachaqkunata ruparuchun; chay llaqtakunamanta nina lloqsimuspañataq Abimelecta ruparuchun, nispa.

²¹Chaynata niruspanmi Jotamqa Beer llaqtaman ayqekurqa, wawqen Abime-lecmanta pakakunanpaq.

²²Abimelecmi Israel miraykunapi kimsa wataña munaychakuchkarqa.

²³Ichaqa Abimelecmanwan Siquem llaqtapi yachaqkunamanmi cheqninakuy espirituta Tayta Dios kachaykurqa, hinaptinmi Siquem llaqtapi yachaqkuna Abimelecpa contranpi hatarirurqaku.

²⁴Chaynataqa ruwarqa, Jerobaalpa qanchis chunka qari churinkunata wañurachisqanmanta Abimelecmanta vengakunanpaqmi chaynataq Siquem llaqtapi yachaqkunamantapas wañuchiypi Abimelecta yanapasqankumanta vengakunanpaqmi.

²⁵Siquem llaqtapi yachaq-kunam orqokunapa puntanpi suwakunata churarurqaku llapa ñannin pasaqkunata suwanankupaq. Chaytam Abimelecman willaykurqaku.

²⁶Huk punchawmi Ebedpa churin Gaalqa wawqenkunawan Siquem llaqtaman chayarurqa, hinaptinmi Siquem llaqtapi yachaqkuna payman hapipakururqaku.

²⁷Chaymantam Siquem llaqtayuqkunaqa chakraman rispanku uvasninkuta pallaruspa vinota ruwarurqaku, hinaspam diosninkupa templonpi fiestata ruwarqaku, chaypim mikuspanku upyaspanku Abimelecta ñakarqaku.

²⁸Ebedpa churin Gaalñataqmi nirqa: Siquem llaqtapi yachaqkuna, ¿pitaq Abimelecqa payta servinanchikpaqqa? ¿Manachum payqa Jerobaalpa churin? ¿Manachum Zebulpas paypa yanapaqnin? Siquem llaqtata hatarichiq Hamortayá servisunchikqa, amayá Abimelectachu.

²⁹Amalaya kamachiqnikichikña rikuriruyman, chayna kaptinqa Abimelecta qarqoruspaycha niyman: “Tropaykikunata huñumuspa peleananchikpaq lloqsimuy”, nispay.

³⁰Ebedpa churin Gaalpa rimasqankunata uyariruspanmi llaqtapa gobernadornin Zebul llumpayta piñakururqa.

³¹Hinaspanmi mana pipapas yachasqallanta willakuqkunata kacharqa Abimelecman kaynata nimunankupaq: Ebedpa churin Gaalmi wawqenku-napiwan kay Siquem llaqtaman hamu-runku, hinaspam runakunata contraykipi umachachkanku.

³²Chaynaqa, kunan tutayá soldadoykikunapiwan rispa wateqaqkunata chakrakunapi churamuy,

³³hinaspayá paqarin inti qespimuyta llaqtaman yaykuy, chaynapi runankunapiwan Gaal contraykipi lloqsimuptin munasqaykiman hina ruwanaykipaq, nispa.

³⁴Chaymi Abimelecqa tutan rispan tropankunata tawaman rakinaruspa, Siquem llaqtata wateqarqaku.

³⁵Llaqtapa punkunman Ebedpa churin Gaal lloqsiramuptinmi, Abimelecpas llapallan tropankunapiwan pakakusqankumanta lloqsiramurqaku.

³⁶Chay tropakunata qawaykuspanmi Zebulta Gaal nirqa: Qaway, orqokunapa puntanmantam runakuna uraykamuchkan, nispa. Hinaptinmi Zebulñataq nirqa: Qamqa orqokunapa llantuynintam runakunata hina rikuchkanki, nispa.

³⁷Chaymi Gaalñataq huktawan nirqa: Qaway, “Allpapa Puputin” nispa sutichasqanku orqomantapas runakunam uraykamuchkan, wakin tropañataqmi Qatipaqkunapa Encina Sachan nispa sutichasqanku ñanninta hamuchkanku, nispa.

³⁸Hinaptinmi Zebulñataq nirqa: ¿Maytaq tukuy rimasqaykiqa? Manachum qamqa nirqanki: “¿Pitaq Abimelecqa payta servinanchikpaqqa nispayki? ¿Manachum paykunaqa mana kaqpaq hapisqayki runakuna? Chaynaqa, lloqsispayá peleamuy”, nispa.

³⁹Chaymi Gaalqa, Siquem llaqtapi yachaqkunata pusaspan Abimelecpa contranpi peleamunanpaq lloqsirqa.

⁴⁰Ichaqa Gaalta Abimelec qatiptinmi paypa qayllanmanta lluptirurqa, chaymi Siquem llaqtapa punkunpi achkaq wañururqaku.

⁴¹Abimelecmi Aruma lawpi qeparurqa, Zebulñataqmi Gaaltawan ayllunkunata Siquem llaqtamanta qarqorurqa.

⁴²Paqarinnintin punchawmi Siquem llaqtayuqkuna campoman lloqsirurqaku. Chayta Abimelec yacharuspanmi,

⁴³tropankunata kimsaman rakiruspa pakakuspalla wateqarqaku. Siquem llaqtamanta runakuna lloqsiramuptinkum, pakakusqankumanta lloqsiramuspanku paykunawan pelearqaku.

⁴⁴Abimelecmi paywan kaq tropakunapiwan pasaspa llaqtapa punkunpi churakururqaku, iskayman rakinasqan tropakunañataqmi campopi kaqkunata lliwta wañurachirqaku.

⁴⁵Abimelecqa tukuy punchawmi Siquem llaqtapa contranpi pelearqa, llaqtata hapikuykuspanmi chaypi runakunatapas wañurachirqa, llaqtatapas purmarachispanmi kachitaraq machqeykurqa.

⁴⁶Siquem llaqtapa torrenpi kaqkunañataqmi Abimelecpa ruwasqanta uyariruspanku Berit idolopa templonpa torrenman yaykururqaku.

⁴⁷Siquem llaqtapa torrenpi huñunakurusqankuta Abimelecman willaykuptinkum,

⁴⁸Salmón orqoman llapallan tropankunapiwan rirqa, hinaspam sachapa kallmanta hachawan kuchururqa, chayta hombrokuykuspanmi runankunata nirqa: Ruwasqayta hina apurawman ruwaychik, nispa.

⁴⁹Chaynapim tropankunapas sapakama sachapa kallmankunata kuchuspanku Abimelecta Siquem llaqtapa torrenkama qatirqaku, chay torrepa muyuriqninman llapa kallmakunata montoykuspankum torreta kañaykurqaku, hinaptinmi warmipas qaripas yaqa waranqa runakuna wañururqaku.

⁵⁰Chaymantam Abimelecqa Tebes llaqtamanpas pasarqa, hinaspam Tebes llaqtata atacaspan hapikururqa.

⁵¹Chay llaqtapa chawpinpim qaqay-qaqay torre karqa, chaymanmi llapallan qarikuna, warmikuna chaynataq llaqtapi yachaqkunapas pakakurqaku, hinaspam punkukunata wichqakuruspanku torrepa hawanman seqarurqaku.

⁵²Abimelecñataqmi torreman chayaruspan atacayta qallaykurqa. Kañaykunanpaq kachkaptinmi,

⁵³huk warmi pakisqa tunaw rumita Abimelecpa umanman kachaykamurqa, hinaptinmi umanta chitqarurqa.

⁵⁴Chaymi arman apaq soldadota apurawman qayaspan nirqa: Espadaykita hurqospa wañurachiway, yanqam “Warmim wañurachin ninmanku”, nispa. Hinaptinmi arman apaq soldadonqa, espadawan tuksiruspa wañurachirqa.

⁵⁵Israel miraykunañataqmi Abimelecta wañusqataña qawaykuspanku, sapakama wasinkuman kutikurqaku.

⁵⁶Chaynatam Abimelecta Tayta Dios castigarurqa, taytanpa contranpi mana allinta ruwaspa qanchis chunka waw-qenkuna wañurachisqanmanta.

⁵⁷Siquem llaqtayuq runakunapa tukuy mana allin ruwasqantam, kikinkupa hawanman Tayta Dios kutichipurqa, Jerobaalpa churin Jotampa ñakasqanmi paykunaman chayarurqa.