Read CHUYA QELLQA La Biblia en Quechua de Ayacucho 2012 Apocalipsis 11 Bible Online

Apocalipsis 11 - CHUYA QELLQA La Biblia en Quechua de Ayacucho 2012 bible

Apocalipsis 11

¹Chaymantam soqos kaqlla tupuna varata qoykuwaspan niwarqa: Diospa templontawan altartayá tupuramuy, yuparamuytaqyá chaypi yupaychaqkunatapas.

²Ichaqa amam templopa pationtaqa tupumunkichu, chayqa kachkan mana judío kaqkunaman qosqam. Paykunam chay chuya llaqtataqa tawa chunka iskayniyuq killa sarutyaspa munaychakunqaku.

³Ñoqañataqmi iskay testigoykunata kachasaq, chaynapi qachqa pachawan hinakuykuspanku waranqa iskay pachak soqta chunka punchaw ñoqamanta willakamunankupaq, nispa.

⁴Chay iskay testigokunaqa iskay olivos sachapiwan hinaspa iskay candelabrokunam, chaykunaqa kay pachapi Diospa qayllanpim kachkanku.

⁵Sichum pipas paykunata imanaytapas munaptinqa siminkumanta lloqsimuq ninam enemigonkuta kañarunqa, chaynatam wañunqa imanaruy munaqpas.

⁶Chay testigokunaqa parata usyachinankupaq atiyniyuqmi kasqaku, chaynataqa usyachiqku Diosmanta willakuy tukunankukamam. Paykunaqa yakutapas yawar-yachinankupaq hinaspa kay pachapi runakunata tukuy rikchaq castigokunawan munasqankuman hina ñakarichinankupaq atiyniyuqmi kasqaku.

⁷ Paykuna willakuyta tukuruptinkuñataqmi, uku pachamanta lloqsimuq manchakuypaq animalqa paykunapa contranpi guerrata hatarichinqa, paykunata venceruspanmi wañurachinqa.

⁸Ayankupas hatun llaqtapa plazanpim chutarayanqa. Chay llaqtatam tupachinku Sodomawan hinaspa Egiptowan, chaypim Señorninchikpas chakatasqa karqa.

⁹Kimsa punchaw partenpunim llapa runakuna, tukuy rikchaq ayllukunamanta, tukuy rikchaq rimayniyuqkunamanta hinaspa llapa nacionkunamanta chay testigokunapa ayanta qawanqaku, hinaspam pampanankutapas mana munanqakuchu.

¹⁰Kay pachapi kawsaqkunañataqmi chay wañuqkunamanta kusikunqaku, hinaspam kusikuymanta regalokunatapas apachinakunqaku, chaynataqa ruwanqaku chay iskay profetakuna kay pachapi yachaqkunata manaña ñakarichisqankuraykum.

¹¹Ichaqa kimsa punchaw partenmantam Diospa kachamusqan kawsachikuq espíritu chay iskay wañusqa testigokunaman yaykururqa hinaptinmi kaw-sarirurqaku, chaymi qawaqninkunañataq hatu-hatunta mancharikurqaku.

¹²Hinaptinmi chay iskay testigokunaqa hanaq pachamanta hatun qayakuyta uyarirqaku “¡Kayman qespimuychik!” niqta. Chaymi enemigonkuna qawachkaptinku hanaq pachaman puyupi qespirqaku.

¹³Hina chay ratollataqmi nisyu-nisyu terremoto karurqa, hinaptinmi llaqtapa chunka kaq parten tuñirurqa, chay terremotowanmi qanchis waranqa runakuna wañururqa. Wakinñataqmi hatu-hatunta mancharikuspanku hanaq pachapi kaq Diosta qapaqcharqaku.

¹⁴Iskay kaq, ¡ay! nisqanqa pasarunñam, ichaqa kimsa kaqñataqmi chaylla hamuchkan.

¹⁵Trompetanta qanchis kaq ángel tocaykuptinmi hanaq pachamanta hatunmanta qapariy uyarikamurqa: “Kay pachapi munaychakuymi Cristopaña rikurirun, payñam wiña-wiñaypaq munaychakunqa”, niq.

¹⁶Hinaptinmi Diospa qayllanpi iskay chunka tawayuq tronopi tiyaq ancianokuna pampakama kumuykuspa Diosta hatunchaspanku kaynata nirqaku:

¹⁷Señorllayku, graciastam qoykiku, Tukuy Atiyniyuq Diosnillayku, Qamqa ñawpaqtapas kunanpas hina kaqllam kanki, qamllataqmi hamuq kaqpas kanki. Qamqa munaychakunaykipaqmi hatun atiyta chaskirqanki.

¹⁸Nacionkunam piñakurun; castiganaykipaq punchawmi chayaramun. Wañuqkunata juzganayki punchawmi chayaramun, serviqniki profetaykikunaman paganayki punchawmi chayaramun, chuya llaqtaykimanwan sutiki kasukuqkunaman paganayki punchawmi chayaramun, taksamanpas hatunmanpas llapallanmanmi pagapunki, kay pacha tuñichiqkunatam chinkachinki, nispanku.

¹⁹ Hanaq pachapi Diospa templon kichakuykuptinmi pacto ruwanan Arcapas rikukurqa. Hinaptinmi karqa llipyaykuna, qapariykuna, rayokuna, terremotokuna, karqataqmi sinchi runtu parapas.