Read CHUYA QELLQA La Biblia en Quechua de Ayacucho 2012 Apocalipsis 12 Bible Online

Apocalipsis 12 - CHUYA QELLQA La Biblia en Quechua de Ayacucho 2012 bible

Apocalipsis 12

¹Hanaq pachapim hatun señalta rikururqani: Warmim intiwan pachasqa kachkasqa, hinaspam killata saruchkasqa, umanpiñataqmi chunka iskayniyuq chaskakunamanta coronan kachkasqa.

²Chay warmim wiksayuq kachkasqa, hinaspam wachakunanpaq nanaywan kaspa qayaykachakurqa.

³Huktawanmi huk señalta hanaq pachapi rikururqani: Hatun puka animal Dragonta, chay animalmi kasqa qanchis umayuq, chunka waqrayuq, sapa umankunapiñataqmi huk corona kasqa.

⁴Chupanwan aysaspanmi cielopi kimsa kaq parten chaskakunata kay pachaman wischuykamurqa. Dragonñataqmi wachakuywan kaq warmipa ñawpaqninpi sayachkarqa, chaypiqa sayachkarqa chay warmipa naceruq wawanta mikurunanpaqmi.

⁵Chay warmiqa qari wawatam wachakururqa, paymi fierro tawnawan hina hatun atiyninwan llapallan nacionkunata kamachinqa. Chay wawata qechuruspankum Diospa hinaspa trononpa qayllanman aparurqaku.

⁶Warmiñataqmi Diospa alistapusqan chunniqman ayqekurqa, chaypi waranqa iskay pachak soqta chunka punchaw uywasqa kamunanpaq.

⁷Chaymantam hanaq pachapi hatu-hatun guerra karqa. Miguelmi angelninkunapiwan dragonpa contranpi pelearqa. Dragonpas angelninkunapiwanmi kutichikurqa

⁸ichaqa manam venceyta atirqachu, chaynapim paykunapaqqa hanaq pachapi sitiopas manaña karqañachu.

⁹Chaynapim chay hatun dragonqa wischumusqa karqa. Payqa ñawpaqmantaraq Diablowan hinaspa Satanaswan sutichasqa maqta urum. Paymi kay pachapi llapallan runakunata engañan. Paymi angelninkunapiwan kay pachaman wischumusqa karqa.

¹⁰Chaymantam hanaq pachapi kayna niq qayakuyta uyarirqani: “Kunanmi salvación chayaramuwanchik, chayaramuntaqmi Diospa atiyninwan, munaychakuyninpas chaynataq Cristopa munayninpas. Wawqe-paninchikkunapa contranpi tuta punchaw Diosman acusaq diabloqa ñam wischurachikamunña hanaq pachamanta.

¹¹Wawqe-paninchikkunaqa Corderopa yawarninwanmi hinaspa willakusqanku palabrawanmi vencerqaku, paykunaqa manam wañuytapas manchakurqakuchu.

¹²Chaynaqa, ¡cielokuna kusikuychik, kusikuychiktaqyá chaypi yachaqkunapas! ¡Ay, imaynaraq kanqa kay pachapi kaqkunaqa! Diabloqa piñasqallañam qamkunaman uraykaramun, payqa yachakunmi pisi tiempollapaqña kananta”, nispa.

¹³Dragonñataqmi kay pachaman wischusqa kasqanta qawakuykuspan qari wawa wachakuq warmita qatikacharqa.

¹⁴Hinaptinmi warmiman qoykurqaku ankapa rapranta hina iskay raprakunata, chaytaqa qoykurqaku maqta urupa qayllanmanta maymi kasqan chunniqman pawarikunanpaqmi, chaynapi kimsa wata parten chaypi uywasqa kananpaq.

¹⁵Dragonñataqmi siminmanta mayu hina achka-achka yakuta atqorqa chay warmita aparunanpaq.

¹⁶Ichaqa allpam chay warmita yanaparqa hinaspam siminta kichariykuspan Dragonpa atqomusqan achka-achka yakuta millpururqa.

¹⁷Hinaptinmi Dragonqa warmipa contranpi piñakururqa, hinaspam chay warmipa mirayninpa contranpi peleaq pasarqa, chay miraykunaqa Diospa kamachikuynin kasukuqkunam hinaspa Jesuspi iñiqkunam karqaku.