Read CHUYA QELLQA La Biblia en Quechua de Ayacucho 2012 Apocalipsis 14 Bible Online

Apocalipsis 14 - CHUYA QELLQA La Biblia en Quechua de Ayacucho 2012 bible

Apocalipsis 14

¹Chaymantam rikurqani Sión moqopa hawanpi Cordero sayachkaqta. Paywanmi sayachkasqa pachak tawa chunka tawayuq waranqa runakuna, paykunaqa kachkasqa Corderopa sutinwan hinaspa Taytanpa sutinwan urkunkupi qellqasqakamam.

²Uyarirqanitaqmi hanaq pachamanta achka yakupa hinaspa sinchi rayopa qapariynin hina qayakuytapas, chay qayakuyqa karqa arpa tocaqkunapa tocasqan hinaraqmi.

³Paykunam musoq takita takirqaku, tronopa ñawpaqninpi, tawa kawsaqkunapa hinaspa ancianokunapa qayllanpi. Chay takitaqa manam pipas yachayta atirqakuchu, aswanqa pachak tawa chunka tawayuq waranqa kay pachamanta rantisqa runakunallam yacharqaku.

⁴Paykunaqa manam qacha warmikunawanpas qanrachakurqakuchu. Paykunaqa Corderotam qatikunku maymanña riptinpas. Paykunaqa kawsaykunapa punta rikurimuq rurun hinam, chaynataqmi Diospaqwan Corderopaq runakuna ukumanta rantisqa karqaku.

⁵Paykunaqa mana llullakuqmi hinaspa mana chikan huchayuqmi kasqaku.

⁶Rikurqanitaqmi huk angeltapas cielopa chawpinta pawachkaqta, paymi wiñaypaq kaq allin noticiata apachkasqa kay pachapi llapallan runakunaman, nacionkunaman, ayllukunaman, tukuy rikchaq rimayniyuqkunaman hinaspa llaqtakunaman.

⁷Hatunmanta qaparispanmi nirqa: Diostayá manchakuywan qapaqchaychik, juzganan horam chayaramunña, hanaq pachatapas kay pachatapas, lamar qochatapas hinaspa pukyukunatapas unanchaqtayá yupaychaychik, nispa.

⁸Iskay kaq angelñataqmi nirqa: “¡Tuñirunñam, tuñirunñam Babilonia hatun llaqtaqa! Chay llaqtam vino upyachichkaq hina llapa runakunaman huchapakuyninta upyachirqa”, nispa.

⁹Kimsa kaq angelpas paykunata qatistinmi qaparirqa: Pipas manchakuypaq animaltawan imagenninta yupaychaqqa hinaspa urkunpi otaq makinpi marcachikuqqa,

¹⁰Diospa piñakuynin vinotam paypas upyanqa. Chay piñakuyninqa mana chaqrusqa vino hinam kachkan Diospa piñakuynin sutiyuq vasopi. Chay upyaqkunaqa ninapiwan azufrepim Corderopa qayllanpi hinaspa chuya angelkunapa qayllanpi ñakarichisqa kanqaku.

¹¹Ñakariyninqa ninapa qosniynin hinaraqmi wiña-wiñaypaq qosninqa. Manchakuypaq animal yupaychaqkunaqa chaynataq marcan chaskiqkunaqa, tutapas punchawpas manam hawkayayta tarinqakuchu.

¹²Kaypim qawachikun Diosllapaqña kawsaqkunapa takyaynin, kamachikuynin kasukuqkuna hinaspa Jesuspi iñiqkunapa pacienciakuyninku, nispa.

¹³Hanaq pachamantam huk qayakuyta uyarirqani, chay qayakuymi nimuwarqa: “Kayta qellqay, mayna kusisqam kanqa kunanmanta ñawpaqman Diospi iñispa wañuqkunaqa”, nispa. Arí, Espiritupas nintaqmi: “Paykunaqa llamkasqankumantapas samanqakuñam, allinkuna ruwasqankum ichaqa paykunawan kuska kanqa”, nispa.

¹⁴Chaymantam rikurqani yuraq puyuta, chay puyupa hawanpim tiyachkasqa runapa Churinman rikchakuq, payqa kachkasqa qorimanta coronayuqmi hinaspa makinpi ñawchi rutunayuqmi.

¹⁵Hinaptinmi templomanta huk ángel lloqsiramurqa, paymi hatunmanta qaparispa puyupa hawanpi tiyaqta qayarqa: “Rutunaykiwan rutuy, ñam rutuna tiempoqa chayaramunña, kay pachapi cosechaqa ñam poqosqaña kachkan”, nispa.

¹⁶Puyupa hawanpi tiyaqmi rutunanwan kay pachata rutururqa, hinaptinmi kay pachapi cosechaqa huñusqaña karqa.

¹⁷Chaymantam huk angelpas hanaq pachapi kaq templomanta lloqsiramurqa filoyuq rutunanta aparikuspan.

¹⁸Altarmantapas huk angelmi lloqsiramurqa, payqa ninata kamachiqmi karqa, hinaspam ñawchi rutunayuq angelta qayarqa: “Ñawchi rutunaykiwan kay pachapi uvaskunata rutuy, ñam uvaskunaqa poqosqaña kachkan”, nispa.

¹⁹Hinaptinmi rutunanwan chay ángel kay pachapi uvaskunata rutururqa, hinaspam uvas saruna pozoman huntarachirqa. Chay pozoqa karqa Diospa piñakuynin sutiyuq pozom.

²⁰Llaqtapa hawa lawninpim uvasqa sarusqa karqa, chay pozomantam yawar pawaramurqa caballokunapa frenonman haypanankamaraq. Chay yawarqa kimsa pachak kilometrokamaraqmi hayparqa.