Read CHUYA QELLQA La Biblia en Quechua de Ayacucho 2012 Apocalipsis 20 Bible Online

Apocalipsis 20 - CHUYA QELLQA La Biblia en Quechua de Ayacucho 2012 bible

Apocalipsis 20

¹Chaymantañataqmi huk angelta hanaq pachamanta urayka-muchkaqta rikurqani, payqa uku pachapa llaventawan hatun cadenata aparikuspanmi uraykamuchkasqa.

²Chay angelmi ñawpaq maqta uruwan sutichasqa dragonta hapirurqa, chay dragonqa Satanaswan sutichasqa Diablom, paytam waranqa watapaq chaqnarurqa.

³Paytam tutayaq ukuman wischuykurqa, hinaspam punkunta wichqaruspan sellota churarurqa waranqa wata pasanankama, chaynapi nacionkunatapas amaña engañananpaq. Waranqa wata pasaruptinñataqmi pisi tiempollapaq kacharisqa kanqa.

⁴Rikurqanitaqmi tronokunatapas, chay-kunapiqa juzganankupaq kamachisqakunam tiyachkasqaku. Rikurqanitaqmi Jesusrayku hinaspa Diospa palabranta willakusqankurayku kunkan qorusqakunapa almankunatapas. Paykunaqa manam yupaycharqakuchu [2]manchakuypaq animaltapas nitaq imagennintapas, manataqmi urkunkupipas nitaq makinkupipas marcantaqa churachikurqakuchu. Paykunaqa kawsarimuspankum Cristowan kuska waranqa wata munaychakunqaku.

⁵Wakin wañuqkunam ichaqa waranqa wata tukunankama mana kawsarimurqakuchu. Kayqa punta kaq kawsarimuymi.

⁶Mayna kusisqam hinaspa chuyataqmi kanku punta kawsarimuypi kawsarimuqkunaqa. Iskay kaq wañuyqa manañam paykunataqa imananqañachu, aswanqa kanqaku Diospa hinaspa Cristopa sacerdotenkunañam, paykunaqa Cristowanmi waranqa wata munaychakunqaku.

⁷Waranqa wata pasaruptinñataqmi Sata-nasqa preso kayninmanta kacharisqa kanqa,

⁸hinaspam lloqsimunqa kay pachapi llapallan nacionkunata engañananpaq. Gogtawan Magogtapas engañaspanmi paykunapa tropankunata guerrapaq huñunanqa, chay tropakunaqa lamar qochapa patanpi aqo hina manaña yupay atinam kanqa.

⁹Chay tropakunam tukuy kay pachapi purimunqaku, hinaspam Diosllapaqña kawsaqkunapa campamentontawan kuyasqan llaqtanta muyurirurqaku, chaymi Diosñataq hanaq pachamanta ninata kachaykamuspan llapallanta kañarurqa.

¹⁰Engañaqninku diabloñataqmi azufreyuq rupachkaq qochaman wischusqa karqa, manchakuypaq animalpa hinaspa pantachikuq profetapa kasqanman, chaypim tuta punchaw wiña-wiñaypaq ñakarinqaku.

¹¹Chaynataqmi rikurqani hatu-hatun yuraq tronotapas, rikurqanitaqmi chaypi tiyaqtapas. Paypa ñawpaqninmantam hanaq pachawan kay pacha chinkarurqa, hinaptinmi paykunapa kananpaq mana maypas karqachu.

¹²Chaymantam rikurqani hatunpas, taksapas ñawpaq wañuqkunatapas, paykunaqa Diospa qayllanpim sayachkasqaku, hinaptinmi librokuna kichasqa karqa. Wiñay kawsay libropas kichasqataqmi karqa hinaptinmi chay libropi qellqasqaman hina hinaspa imam ruwasqankuman hina wañusqakuna juzgasqa karqaku.

¹³Lamar qochapas chaypi kaq wañusqakunatam qomurqa, qomurqataqmi wañuypas chaynataq [3]Hadespas chaypi wañusqakunata, chaymi sapakama juzgasqa karqaku imam ruwasqankuman hina.

¹⁴Wañuypas chaynataq wañusqakunapa kasqanpas azufreyuq rupachkaq qochamanmi wischusqa karqaku. Kayqa iskay kaq wañuymi.

¹⁵Kawsay libropi sutinku mana qellqasqa kaqkunapas chay rupachkaq qochamanmi wischusqa karqaku.