Read CHUYA QELLQA La Biblia en Quechua de Ayacucho 2012 Apocalipsis 8 Bible Online

Apocalipsis 8 - CHUYA QELLQA La Biblia en Quechua de Ayacucho 2012 bible

Apocalipsis 8

¹Rollopa qanchis kaq sellonta Cordero kichaykuptinmi hanaq pachapi kaqkuna upallalla yaqa media hora karqaku.

²Chaymantam rikurqani qanchis angelkunata Diospa qayllanpi sayachkaqta, paykunamanmi qanchis trompetakuna qosqa karqa.

³Hinaptinmi huk ángel qorimanta qontichinayuq hamuspan altarpa waqtanpi sayaykurqa, paymanmi qoykurqaku achka inciensota iñiqkunapa mañakuyninman yapaykuspan qorimanta altarpa hawanpi kañananpaq. Chay altarqa kachkasqa Diospa trononpa ñawpaqninpim.

⁴Chay kañasqan inciensopa qosniyninmi Diospa kasqanman chayarqa iñiqkunapa mañakuyninkupiwan kuska.

⁵Hinaspam chay angelqa hapisqan qontichinaman altarpa hawanmanta nina sansata hinaykuspan kay pachaman wikutiykamurqa hinaptinmi rayokuna, qapariykuna, llipyaykuna hinaspa terremoto karurqa.

⁶Trompetayuqkama qanchis angelkunam tocanankupaq alistakurqaku.

⁷Trompetanta punta kaq ángel tocaykuptinmi yawarwan chapusqa ninayuq runtu para kay pachaman chayamurqa, chaymi kay pachapa kimsa kaq partenta, sachakunapa hinaspa qewakunapa kimsa kaq partenta ruparurqa.

⁸Trompetanta iskay kaq ángel tocaykuptinmi ninawan lenwachkaq hatu-hatun orqo hina lamar qochaman wischuykamusqa karqa, hinaptinmi lamar qochapa kimsa kaq parten yawaryarurqa.

⁹Chaymi lamar qochapi kawsaq animalkuna kimsa kaq parte wañururqa, barcokunapas kimsa kaq partenmi ñutusqa karqa.

¹⁰Trompetanta kimsa kaq ángel tocaykuptinmi cielomanta rupachkaq nina hina hatu-hatun chaska wichiykamurqa. Chay chaskaqa mayukunapa hinaspa pukyukunapa kimsa kaq partenpa hawanmanmi wichiykamurqa.

¹¹Chay chaskapa sutinqa kasqa “Ajenjom” chaymi chay yakukunapa kimsa kaq parten qatqeyarurqa, achka runakunam chay qatqe yakuta tomaruspanku wañururqaku.

¹²Trompetanta tawa kaq ángel tocaykuptinñataqmi intipa, killapa hinaspa chaskakunapa kimsa kaq parten tutayarurqa, hinaptinmi chaykunapa kimsa kaq parten tutayaruptin, punchawpa hinaspa tutapa kimsa kaq partenpi manaña achkirqañachu.

¹³Huk angeltapas rikururqanitaqmi cielopa chawpinta pawachkaqta, paymi kaynata qaparirqa: ¡Ay, ay, ay! ¡Imaynaraq kanqaku kay pachapi kaqkuna, kimsa angelkunapas trompetata tocaykuptinqa! niqta.