Read CHUYA QELLQA La Biblia en Quechua de Ayacucho 2012 Rut 1 Bible Online

Rut 1 - CHUYA QELLQA La Biblia en Quechua de Ayacucho 2012 bible

Rut 1

¹Israel nacionpi juezkuna kamachikuchkaptinkum muchuy karqa, chaymi Judá lawpi Belén llaqtayuq runa ripukurqa warmintin hinaspa iskaynin qari churinkunapiwan, Moab lawman chaypiña yachanankupaq.

²Chay runapa sutinmi karqa Elimelec, warminpañataq Noemí, iskaynin churinkunapañataq Mahlonwan Quelión. Paykunaqa karqaku Judá nacionpi Belén law Efrata llaqtayuqmi. Paykunam Moab lawman chayaruspanku chaypiña yacharqaku.

³Ichaqa qosan Elimelec wañukuptinmi Noemiyqa sapallanña qeparurqa iskaynin qari wawankunapiwan.

⁴Paykunam Moabita warmikunawan casarakururqaku; chay warmikunapa sutinkum karqa Orfa chaynataq Rut. Yaqa chunka wataña Moabpi yachachkaptinkum

⁵Mahlonwan Quelionpas wañukurqaku, chaymi Noemiyqa sapallanña qeparullarqa mana qosayuq chaynataq mana wawayuq.

⁶Moab lawpi yachachkaspam Noemí uyarirurqa llaqtamasinkunaman Dios allin cosecha qoykusqanta, chaymi Moab-manta iskaynin llumchuyninkunapiwan llaqtanman kutikurqa.

⁷Chaynapim yachasqanku allpamanta lloqsispanku Judá lawman rirqaku.

⁸Richkaptinkum llumchuyninkunata Noemí nirqa: Mamaykichikpa wasinman sapakama kutikuychik. Diosyá bendecisunkichik imaynam qamkunapas ñoqawan chaynataq wañukuq wawaykunawanpas ruwasqaykichikman hina.

⁹Diostaqyá qaritapas sapakamaman qosunkichik casarakuspa wasikichikpi hawkayayta tarinaykichikpaq, nispa. Chaynata nispa Noemí muchaykariptinmi qaparispa waqakuywan

¹⁰llumchuyninkuna nirqaku: Ñoqaykuqa qanwanmi llaqtaykiman ripusaqku, nispanku.

¹¹Noemiyñataqmi nirqa: Kutikuychik wawallaykuna, ¿imapaqtaq ñoqawan riwaqchik? Manañam waway-pas kanqañachu casarakunaykichikpaq.

¹²¡Kutikuychik wawallaykuna! Qosayuq kanaypaqpas payañam kani. “Wawayuqraqmi kasaq” nispay kunan tuta qosaywan puñuruyman hinaspa qari wawakunata wachakuruptiypas

¹³¿hatunyanankamachu suyawaqchikraq? ¿Paykunata kuyaspachu suyawaqchik mana casarakuspa? ¡Manam wawallaykuna! Qamkunamantapas aswan llakisqam tarikuni Diospa piñakuynin ñoqapa contraypi kasqanrayku, nispa.

¹⁴Hinaptinmi paykuna huktawan qaparispa waqarqaku. Chaymantam Orfaqa suegranta muchaykuspan kutikurqa, Rutñataqmi Noemiywan qeparurqa.

¹⁵Chaymi huktawan Noemí nirqa: Waqaya llumchuymasikipas llaqtanman, diosninkunaman kutikun; chaynayá qampas kutikuy, nispa.

¹⁶Rutmi ichaqa nirqa: Ama ruegawaychu qanmanta rakikuspa kutikunaypaqqa. Maymi risqaykimanmi ñoqapas risaq, maymi yachasqaykipim yachasaq, llaqtaykim kanqa llaqtay, Diosnikim kanqa Diosniy.

¹⁷Maypim wañukusqaykipim ñoqapas wañusaq, chaypitaqmi pampakusaqpas. Sichum kawsananchikkama qanmanta rakikuptiyqa Diosyá anchata castigawachun, wañuyllañam qamtawan ñoqataqa rakinawasunchik, nispa.

¹⁸Rut mana imaraykupas rakikuyta munaptinmi, Noemiyqa chayta qawaykuspa manaña hikutarqañachu.

¹⁹Chaynapim iskayninku ripukurqaku Belén llaqtaman, chayaruptinkum llaqtantin lliw runakuna paykunamanta admirakurqaku. Hinaptinmi warmikuna ninakurqaku: ¿Noemiychus wak warmiqa? nispanku.

²⁰Chaymi Noemiyñataq nirqa: Amaña [1]Noemí niwaychikñachu, aswanqa [2]Mara niwaychikña, Tukuy Atiyniyuq Diospa sinchi llakirachiwasqanrayku.

²¹Kaymantaqa lloqsirqani tukuy imayuqmi, ichaqa Diosmi mana imayuqtaña kutirachimuwan. Chaynaqa, ¿imapaqñataq Noemí nisparaq sutichawankichik? Diosmi ñoqapa contraypi hatarirun, Tukuy Atiyniyuqmi llakirachiwan, nispa.

²²Chaynatamá Noemí kutimurqa Moab llaqtayuq llumchuynin Rutpiwan. Moab lawmanta lloqsimuspam Belén llaqtaman chayarurqaku cebada rutuy qallarichkaptin.