Read CHUYA QELLQA La Biblia en Quechua de Ayacucho 2012 1~Samuel 18 Bible Online

1~Samuel 18 - CHUYA QELLQA La Biblia en Quechua de Ayacucho 2012 bible

1~Samuel 18

¹Davidwan Saúl rimayta tukuruptinmi, Davidwan Jonatán amistadta armarurqaku, hinaspam kikinta hina kuyarqa.

²Chay punchawmantam Saulpas yanapaqninpaq Davidta akllaykurqa, hinaspam taytanpa wasinman kutinanta manaña munarqachu.

³Jona-tanwan Davidñataqmi contratota ruwar-qaku juramentomanta wiñaypaq amigo kanankupaq.

⁴Chaymi Jonatán capanta hurqokuykuspan Davidman qoykurqa, qoykurqataqmi espadantawan flechanantapas hinaspa weqaw watantapas.

⁵Davidmi Saulpa tukuy ima kamachisqanta allinta ruwaq, chaymi guerrapi peleaq runakunapa kamachiqnin kananpaqña Saúl churarurqa, chaynapim llapallan tropakunawan chaynataq Saulpa serviqninkunawanpas kuyaykachikurqa.

⁶Filisteo runata David wañuchis-qanmanta tropakuna kutimuptinmi, Israel nacionpi llaqtakunamanta llapa warmikuna kusikuyllawanña takispa tusustin hinaspa rikchaqmana tocanakunata tocastin lloqsimurqaku, rey Saulta chaskinankupaq.

⁷Chay warmikunam tusustin takispa nirqaku: Saulmi waranqa soldadokunata wañurachimun. Davidñataqmi chunka waranqata wañurachimun, nispanku.

⁸Chay takisqankuta Saúl uyariruspanmi llumpayta piñakuspan nirqa: Davidmantam chunka waranqa wañu-chisqanmanta takichkanku, ñoqamanta-ñataqmi waranqalla wañuchisqaymanta. Reyta churanallankuñam faltan, nispa.

⁹Chay punchawmantam Davidta Saúl cheqnipakururqa.

¹⁰Paqarinnintinmi Saulta Diospa kacha-musqan mana allin espíritu hapirurqa, hinaptinmi Saulqa palacion ukupi loco hinaña hapisqanta rimakurqa. Davidña-taqmi ñawpaq tocapusqanta hina arpata tocarqa. Saulqa lanza hapirisqam kachkarqa.

¹¹Chay lanzanwanmi Davidta choqarurqa. Paymi tantearqa: Kay Lanzawanmi Davidta perqaman clavarusaq, nispa. Ichaqa David surtiruptinmi iskaykama choqaspapas mana hapichirqachu.

¹²Saulmi manchakururqa Davidta Tayta Dios yanapasqanrayku, Saultam ichaqa manaña yanaparqachu.

¹³Chayraykum Saulqa manaña Davidwan kuska kayta munaspan, waranqa soldadokunapa kamachiqnin kananpaqña churarurqa, chaymi tropankunata Davidqa kamachispan tukuy hinastinman lloqsispa kutimuq.

¹⁴Tayta Dios yanapaptinmi Davidqa tukuy imata allinta ruwaq.

¹⁵Chayna tukuy imatapas allinta ruwasqanraykum Saulñataq payta manchakuq.

¹⁶Israel runakunawan Judá runakunañataqmi Davidta kuyarqaku. Payqa tropankunata kamachispanmi tukuy hinastinman riq.

¹⁷Huk punchawmi Davidta Saúl nirqa: Merab sutiyuq mayor warmi churiywanmi casarachisqayki, ichaqa ñoqam munani mana manchakuspa Tayta Diospa guerrankunapi peleanaykita, nispa. Chaynataqa nirqa kaynata tanteaspam: Manam kikiychu Davidtaqa wañuchisaq, paytaqa filisteokuna wañurachimuchun, nispa.

¹⁸Chaymi Davidñataq nirqa: Reynilláy, ¿pitaq ñoqaqa kani reypa masan kanaypaqqa? Aylluypas Israel ukupiqa manam ancha reqsisqachu, nispa.

¹⁹Ichaqa Davidta warmi churin Me-rabwan casarachinan tiempo chayaramuptinmi, chay warmi churinta Saúl casararachirqa Mehola llaqtayuq Adrielwan.

²⁰Saulpa huknin warmi churin Micalñataqmi Davidta llumpayta kuyarqa. Chayta Saulman willaykuptinkum allinpaq rikchakarapurqa,

²¹hinaptinmi Saulqa tantearurqa paywanña Davidta casarachiq tukuspa huk trampaman wichiykachiyta, chaynapi Davidta filisteokuna wañurachinanpaq. Chayraykum huktawan Davidta nirqa: Kunanmi ichaqa masayña kanki, nispa.

²²Hinaspanmi serviqninkunata Saúl kamachirqa, mana pipa uyarisqallanta Davidta kaynata nimunankupaq: “Reyqa llumpaytam kuyasunki, lliw serviqninkunapas kuyasunkim. Chaynaqa, reypa masanña karuy”, nispa.

²³Saulpa serviqninkuna chaynata willaykuptinkum paykunata David nirqa: ¿Yanqallapaqchu reypa masan karuyta hapinkichik? Ñoqaqa wakcham kani, nitaqmi reqsisqachu kani, nispa.

²⁴Hinaptinmi Saulman serviqninkuna willamurqaku Davidpa imam nisqanta.

²⁵Saulmi munachkarqa Davidqa filisteokunapa makinman wichiykunanta. Chayraykum serviqninkunata nirqa: Davidta nimuychik: Costumbreman hina warmi churinrayku imapas qonaykimantaqa reyqa munachkan enemigon filisteokuna vengakuytam. Reyqa mu-nachkan pachak filisteokunata wañu-chimuspa qari kayninkupa qarachanta payman qonaykitam, nispa.

²⁶Saulpa serviqninkuna chaykunata willaykuptinkum, David tantearqa: Chaynalla reypa masan karuyqa allinpunim, nispa. Chaymi manaraq plazo cumplikuchkaptin,

²⁷runankunawan David pasarqa, hinaspam iskay pachak filisteokunata wañurachimuspan chay wañuq runakunapa qari kayninpa qarachanta aparqa, chaytam reyman qoykurqa chaynapi masan kananpaq. Chaymi Mical sutiyuq warmi churinwan Davidta Saúl casarachirqa.

²⁸Ichaqa chayta qawaykuspanmi Saúl aswanraq yacharurqa Davidtaqa Tayta Diospuni yanapasqanta, qawaykurqataqmi imaynam churin Micalpas Davidta kuyasqanta.

²⁹Chaymi Saulqa aswan mastaraq Davidta manchakururqa. Chaymantapunim Saulqa wañukunankama Davidpa enemigon rikurirurqa.

³⁰Filistea tropa kamachiqkuna sapa kuti peleaq lloqsimuptinkum David vencerariq Saulpa llapallan soldadonkunamantapas aswan mastaraq, chaynapim Davidqa ancha reqsisqa rikurirurqa.