Read CHUYA QELLQA La Biblia en Quechua de Ayacucho 2012 1~Samuel 23 Bible Online

1~Samuel 23 - CHUYA QELLQA La Biblia en Quechua de Ayacucho 2012 bible

1~Samuel 23

¹Huk punchawmi filisteokuna Keila llaqtaman yaykururqaku, hinas-pam chayllaraq trillasqa trigokunata suwakurqaku. Chayta Davidman willaykup-tinkum,

²Tayta Diosta tapurqa: ¿Filisteokunawan peleaq riymanchu? nispa. Chaymi Tayta Dios nirqa: Rispa peleamuy hinaspa Keila llaqtata libramuy, nispa.

³Runankunam ichaqa Davidta nirqaku: Judapi kachkaspanchikpas manchakuchkanchik, aswanchiki Keila llaqtapi Filistea tropakunawan peleamuspaqa, nispanku.

⁴Chaymi huktawan Tayta Diosta David tapurqa. Tayta Diosñataqmi nirqa: “Keila llaqtaman riy, filisteokunataqa ñoqam makikiman churasaq, nispa”.

⁵Davidmi runankunawan Keila llaqtaman pasarqa, chaypim filisteokunawan peleaspa pasaypaqta vencerurqaku, hinaspam llapa uywankutapas apakurqaku. Chaynatam Keila llaqtapi yachaqkunata David librarqa.

⁶Davidwan pakakuq Ahimelecpa churin Abiatarpas efod apakusqam Keila llaqtaman uraykurqa.

⁷Hinaptinmi Saulman willaykurqaku Davidqa Keila llaqtapiña kasqanta, chaymi Saulqa sonqonpi nirqa: Kunanqa Diosmi makiyman churaykamun, punkuyuq llaqtaman yaykuruspanqa cerrojowan wichqasqa hinañam rikurirun, nispa.

⁸Chaymi tropankunata Saúl qayachirqa, chaynapi Keila llaqtaman rispanku Davidtawan runankunata chawpicharunankupaq.

⁹Chayta yacharuspanmi Sacerdote Abiatarta David nirqa: Efodta aparamuy, nispa.

¹⁰Hinaspam mañakuspan David nirqa: Israelpa yupaychasqan Dios Taytalláy, kay serviqnikim yacharuni Keila llaqtaman Saulpa hamuy munasqanta, ñoqaraykum kay llaqta puchukarachiyta munachkan.

¹¹¿Cheqaptachu maskawananpaq Saúl hamunqa? ¿Yaqachu Keila llaqtayuqkuna paypa makinman churaykuwanqaku? Israelpa yupaychasqan Dios Taytalláy, kay serviqnikim willaykuwanaykipaq mañakullayki, nispa. Hinaptinmi Tayta Dios nirqa: Arí, Saulqa hamunqapunim, nispa.

¹²Huktawanmi David tapurqa: ¿Keila llaqtayuq runakunaqa yaqachu ñoqatapas runaykunatapas Saulman qoykuwanqaku? nispa. Chaymi Tayta Dios nirqa: Arí Saulmanmi hapiykachisunkichik, nispa.

¹³Hinaptinmi Keila llaqtamanta David lloqsirqa yaqa soqta pachak runankunapiwan, hinaspam kayman chayman purirqaku. Ichaqa Keila llaqtamanta Davidpa lluptirusqanta yacharuspanmi Saulqa mana rirqañachu.

¹⁴Davidmi pakakuspa yacharqa Zif law chunniq orqonkunapi. Sapa punchawña Saúl maskaptinpas, Diosqa manam tarichirqachu.

¹⁵Wañuchinanpaq Saulpa lloqsiramusqanta yacharuspanmi Davidqa Horespi pakakurqa, Horesqa tarikun Zif law chunniqpim.

¹⁶Horespi David kachkaptinmi Jonatán rispan Diosman hapipakunanpaq Davidta kallpancharqa

¹⁷kaynata: Ama manchakuychu, manam taytay Saulqa tarisunkichu, qamqa Israelpa reyninmi kanki, ñoqañataqmi qampa qepaykiman kamachikuq kasaq, chaytaqa taytay Saulpas yachanñam, nispa.

¹⁸Chaypim iskayninku Diospa qay-llanpi contratota ruwarqaku, chaymantam wasinman Jonatán kutikur-qa, Davidñataqmi Horespi qeparur-qa.

¹⁹Ichaqa Zif llaqtayuq runakunam Gabaa llaqtaman rispanku Saulman willaykamurqaku: Davidqa allpaykupim Horespi Haquila orqopa qaqankunapi pakakuchkan, chunniqpa sur lawninpi.

²⁰Chaynaqa, reyllayku llaqtaykuman chaylla hamuptikim hapiruspa qoykamusqaykiku, nispanku.

²¹Saulñataqmi nirqa: ¡Tayta Diosyá bendecisunkichik llakipayariwasqaykichikmanta!

²²Chaynaqa, kutispa maypi kasqantapas hinaspa piku-nam rikusqantapas sumaqta yachay-kamuychik. Willawarqakum payqa llum-pay sakri runa kasqanta.

²³Sumaqta qawaykamuychik maykunapim pakakusqantapas, hinaspayá willaykamuwaychik. Cheqapta allpaykichikpi kaptinqa qamkunawanmi risaq, hinaspam Judá ayllukunapa ukunpi tarinaykama kuchun-kuchun maskamusaq, nispa.

²⁴Hinaptinmi Saulpa qayllanmanta Zif llaqtayuq runakuna llaqtankuman kutikurqaku. Davidñataqmi runankunapiwan Maón sutiyuq chunniqpi tarikurqa, Arabá chunniqpa sur lawninpi.

²⁵Saulmi runankunawan Davidta maskaq pasarqa, ichaqa Davidman willaykuptinkum Maón sutiyuq chunniqpi qaqapa kasqanman uraykamurqa. Chayta Saúl yacharuspanmi, Davidta hapimunanpaq Maón sutiyuq chunniqman kachakuykurqa.

²⁶Hinaspam runankunapiwan Saúl rirqa orqopa waklaw waqtanta, Davidñataqmi runankunapiwan Saulmanta karunchakunankupaq orqopa kaylaw waqtanta utqayman rirqa. Runankunawan Saúl chawpicharuspa Davidta hapinanpaqña kachkaptinmi,

²⁷huk willakuq chayaramuspan Saulta nirqa: ¡Reynilláy utqayman kutiriy! ¡Filis-teokunam nacionninchikman yaykuramunku! nispa.

²⁸Chaymi Davidta qatikachasqanmanta Saúl kutirirqa filisteokunawan peleamunanpaq. Chayraykum chay sitiota suticharqaku [5]Sela-hamajlecot nispa.

²⁹Chaymantam David pasakurqa En-gadi lawpi qaqakunaman, chaypi pakakunanpaq.