Read CHUYA QELLQA La Biblia en Quechua de Ayacucho 2012 1~Samuel 24 Bible Online

1~Samuel 24 - CHUYA QELLQA La Biblia en Quechua de Ayacucho 2012 bible

1~Samuel 24

¹Filisteokunata qatisqanmanta kutiramuptinmi Saulman willay-kurqaku: Davidqa En-gadi chunniqpim pakakuchkan, nispanku.

²Chaymi Israel runakunamanta kimsa waranqa soldadokunata Saúl akllaykurqa, hinaspam Davidtawan runankunata maskaq rirqaku purun cabrakunapa purinan qaqankunata.

³Richkaspankum chayarurqaku ovejakunapa kanchanman. Chaypa hichpanpim huk machay tarikurqa. Davidmi runankunapiwan chay machaypi pakakuchkarqaku, chaymanmi ispakunanpaq Saúl yaykururqa.

⁴Chaymi Davidta runankuna nirqaku: Kayqaya cumplikurun Tayta Diospa “Enemigoykitam qosqayki” nispa prometesusqaykiqa. Chaynaqa, Saulwan munasqaykita ruway, nispanku. Davidñataqmi upallalla asuykuruspan Saulpa capanpa patanta kuchururqa.

⁵Ichaqa chay ruwasqanmanta Davidpa conciencian acusaptinmi ñakakurqa.

⁶Chaymi runankunata nirqa: Tayta Diosyá reyniyta wañuchinaymanta waqaychawachun. Payqa Tayta Diospa sapaqchakusqanmi, nispa.

⁷Chaynata nispam soldadonkunata David harkarurqa Saulman pawaykunankumanta. Chaymi machaymanta lloqsiruspan Saúl pasakurqa.

⁸Ichaqa Davidmi machaymanta Saulpa qepallanta lloqsiramuspan qayarqa: ¡Señorlláy, reynilláy! nispa. Chaymi qepaman Saúl qawariykuptin Davidñataq qonqoranpa pampaman kumuykuspan,

⁹Saulta nirqa: Reynilláy, ¿imanasqataq uyarinki “Davidqa contraykipim kachkan” nispa yanqa rimaq runakunata?

¹⁰Reynilláy, qawasqaykiman hinam wak machaypi qamta makiyman Tayta Dios churaykamurqa, chaymi “wañurachiy” nispa niwaptinkupas qamta llakipayaspa mana wañurachirqaykichu, aswanmi nirqani: “Reyniytaqa manam wañuchiymanchu, payqa Tayta Diospa sapaqchakusqan reymi”, nispay.

¹¹Taytalláy qawarimuy, capaykipa patantam hapichkani, capaykipa patanta kuchuruchkaspaypas manam wañurachirqaykichu. Chaynaqa, reyni-lláy kunanqa yachankim ñoqaqa mana contraykipi huchallikuq kas-qayta; qanmi ichaqa wañuchiwanay-kipaq maskawachkanki.

¹²¡Tayta Dios-yá iskayninchikta juzgawasun! ¡Pay-taqyá castigawachun qanmanta venga-kuptiyqa! Ñoqallayqa manam makiytaqa hoqarisaqchu qampa contraykipiqa.

¹³Ñawpaqmantaraqmi kay rimay hamun: “Mana allin ruwaykunaqa lloqsimun mana allin runakunamantam”, nispa. Chaymi makiytaqa mana haykapipas hoqarisaqchu qampa contraykipiqa.

¹⁴Chaynaqa, reynilláy ¿pi maskaqtaq lloqsimurqanki? ¿Pitataq qatikachachkanki? ¿Wañusqa allqotachu icha pikitachu?

¹⁵Tayta Diosyá tanteasqanman hina qamtawan ñoqata juzgawasun. Paytaqyá makikimantapas waqaychawachun, nispa.

¹⁶David rimayta tukuruptinmi Saúl nirqa: ¿Manachum kay rimapayawaqniyqa churillay David? nispanmi qaparispa Saúl waqakurqa.

¹⁷Hinaspanmi Davidta nirqa: Ñoqamantaqa qamqa allin ruwaqmi kanki. Qampaq mana allinta munach-kaptiypas allinwanmi kutirachiwanki.

¹⁸Kunanmi kuyapayakuynikita qawayka-chiwanki, makikiman Tayta Dios churay-kuwachkaptinpas manam wañurachiwarqankichu.

¹⁹¿Pitaq enemigonta tarichkaspa mana imananmanchu? Tayta Diosyá kuyapayaykuwasqaykimanta allinwan kutichipusunki.

²⁰Kunanmi ichaqa sumaqta yachaykuni rey kayman chayanaykimanta, qanwanqa Israel nacionqa allintam ñawpaqman rinqa.

²¹Chaynaqa, David, Tayta Diospa sutinpiyá juraykuway mirayniykunatapas nitaq aylluykunatapas ama puchukarachinaykipaq, nispa.

²²David juraykuptinmi wasinman Saúl kutikurqa, Davidñataqmi runankunawan pakakunan machayman pasakurqa.