Read CHUYA QELLQA La Biblia en Quechua de Ayacucho 2012 1~Samuel 25 Bible Online

1~Samuel 25 - CHUYA QELLQA La Biblia en Quechua de Ayacucho 2012 bible

1~Samuel 25

¹Samuel wañukuptinmi Israelpa mirayninkuna huñunakuruspanku waqarqaku, hinaspam Ramá llaqtapi kaq wasinpi pamparurqaku. Chaymantam David, Parán sutiyuq chunniqman ripukurqa.

²Maón llaqtapim yacharqa huk apu runa, kimsa waranqa ovejayuq, waranqa cabrayuq. Paymi chay punchawkunapi Carmel llaqtapi ovejankunata rutuchkarqa.

³Payqa karqa Calebpa mirayninmantam, sutinñataqmi karqa Nabal. Chay runaqa pasaypaq rumi sonqo mana allinta kawsaq runam karqa. Warmin Abigailmi ichaqa buenamoza hinaspa yachaywan imapas allin ruwakuq karqa.

⁴Chunniqpi kachkaspam David uyarirurqa Nabalqa ovejankuna rutusqanta.

⁵Chaymi chunka runankunata kacharqa kaynata nispa: Carmel llaqtaman rispa ñoqapa sutiypi Nabalta saludaykamuychik.

⁶Hinaspa nimuychik: “Hawkayay kachun qanwan, aylluykikunawan chaynataq tukuy imayki kaqkunawanpas.

⁷Kunanmi yachaykuni ovejaykikuna rutusqaykita. Qampas yachankitaqmi michiq runaykikuna ñoqaykuwan Carmel lawpi tarikusqankuta. Paykuna ñoqaykuwan kaptinkuqa manam imanarqanikuchu nitaqmi imankutapas qechurqanikuchu.

⁸Munaspaqa michiqnikikunata tapuy, paykunam aswanqa willasunki. Chayraykum valekuyki kachamusqay jovenkunata allinllata chaskiykunaykipaq, allin horallapim hamuchkanku. Paykunamanyá imallaykitapas qoykapamullaway, ñoqapas qampaqqa churiki hinam kani”, nispa.

⁹Chaymi Davidpa runankuna pasaspanku chay encargota Nabalman willarqaku, hinaspam paypa rimarinanta upallalla suyarqaku.

¹⁰Hinaptinmi Nabal kaynata nirqa: ¿Pitaq chay Davidqa? ¿Pitaq chay Isaipa churinqa? ¡Kunan punchawkunaqa achkaq criadokunam dueñonkumanta lluptikuchkanku!

¹¹¿Imaynataq qoyman rutuqniykunapaq ruwasqay mikuyta, yakuta, tantata hinaspa aychatapas mana reqsisqa runamanqa? Manam maymanta hamusqantapas yachanichu, nispa.

¹²Chaymi runankuna kutispanku Davidman willaykurqaku Nabalpa rimas-qanta.

¹³Hinaptinmi runankunata David kamachirqa: ¡Espadaykichikta watakuychik! nispa. Chaymi espadankuta weqawninman watakuykuptinku, Davidpas espadanta watakuykurqa, hinaspam tawa pachak runakunawan pasarqa, iskay pachak runakunañataqmi qepinkuta waqay-chanankupaq qeparurqaku.

¹⁴Ichaqa Nabalpa huknin criadonmi pasaspan Nabalpa warmin Abigailman willaykamurqa: Davidmi kachamusqa runankunata patronniy Nabalta saludaykunankupaq, ichaqa paymi piñakuspan kutirachin.

¹⁵Paykunaqa allinllam ñoqaykuwan karqaku, purunkunapi tukuy tiempo puriptiykupas manam imanawarqakuchu, manataqmi imallaykupas chinkarqachu.

¹⁶Ovejaykuta michiptiykupas aswanraqmi paykunaqa huk muralla hina tuta punchaw imamantapas harkawaqku.

¹⁷Ichaqa rumi sonqo qosaykim mana pipa rimapayaykunan. Chaynaqa, mamalláy, qamyá tantearispa imallatapas ruway, mana chayqa ima mana allintapas Davidqa ruwanmanmi, Nabalta chaynataq ayllunkunatapas, nispa.

¹⁸Chaymi Abigailqa utqayllamanña qepichakurqa iskay pachak tantata, iskay odre vinota, pichqa oveja kankasqata, yaqa tawa chunka kilo trigo hamkata, uvas pasasmanta pachak tortillakunata, higos pasasmanta iskay pachak tortillakunatapas; chaykunata asnonkunapi cargakuykuspanmi,

¹⁹criadonkunata nirqa: Ñawpachkaychikña, ñoqapas hamuchkaniñam, nispa. Ichaqa chay ruwasqantam qosan Nabalman mana willarqachu.

²⁰Abigailmi asnopi sillakuykuspan orqomanta pakan-pakanlla uraykamurqa. Davidñataqmi runankunapiwan pay lawman hamuchkasqa, chaymi Abigail payman taripaykurqa.

²¹Davidmi kaynata yuyaymanachkarqa: Chay runapataqa yanqapaqmi tukuy imantapas hunniqpi nanachikurqani, manam paypaqqa imallanpas chinkar-qachu, aswanraqmi allinninta ruwach-kaptiypas payqa mana allinwan kutirachiwan, nispa.

²²Chaymi juraspan nirqa: ¡Kunanmi chay enemigoy Nabalpa llapa runankunata wañurachimusaq, manam hukllapas puchunqachu, mana chayna kaptinqa Diosyá llumpayta castigawachun! nispa.

²³Abigailmi Davidta rikuruspan as-nomanta utqayllaman uraykuspa David-pa ñawpaqninpi qonqoranpa kumuy-kurqa.

²⁴Hinaspam chakinman wis-chukuykuspan nirqa: Taytáy, ¡ñoqamanyá kay hucha chayawachun! ¡Ama hina kaspaykiyá kay rimarisqayta uyariykullaway!

²⁵¡Taytalláy, ama chay rumi sonqo [6]Nabalpa rimasqantaqa kasuychu! Paytaqa sutinpas rikchayninpas reqsinmi. Payqa mana yuyayniyuq llutan runam. Kay serviqnikiqa manam kacha-musqayki runaykikunataqa rikurqa-nichu.

²⁶Aswanpas Tayta Diosmi harkaykusurqanki, hamuruspayki ya-warta chaqchuspa makikiwan justicia ruwarunaykita. Diosyá munachun enemigoykikunapas chaynataq mana allin ruway munasuqnikikunapas Nabal hina castigasqa kananta.

²⁷Ama hina kaspayá kay regalokuna apamusqayta runaykikunaman rakiykariy.

²⁸Ruegakuykitaqmi kay serviqllaykipa huchantapas pampachaykunaykipaq. Tayta Diosmi munaychakuq kaynikitapas takyachinqa chaynataq aylluykikunatapas. Qamqa Tayta Diospa rantinpim peleachkanki, chayraykum kawsanaykikamaqa ima mana allinpas mana pasasunkichu.

²⁹Pipas qati-kachasuspayki wañurachiyta munasuptikiqa, Tayta Diosmi waqaychasunki. Enemigoykikunataqa Diosmi rumita warakachkaq hina warakarunqa.

³⁰Chaynaqa, tukuy allinkuna prometesusqaykita Tayta Dios cumplispa Israel runakunata kamachinaykipaq churasuptikiqa,

³¹amam imamantapas llakikunkichu, nitaqmi sonqoykipas hukmanyanqachu, huchayuq mana huchayuqtapas wañuchispa vengakusqaykimantaqa; chaynaqa tukuy imapi Tayta Dios bendecisuptikipas amam kay serviqllaykitaqa qonqarullawankichu, nispa.

³²Chaymi Abigailta David nirqa: ¡Israelpa Diosnin, Tayta Diosyá yupaychasqa kachun! Paymi kachamusurqanki ñoqawan kunan tupay-kunanchikpaq.

³³Qamtapas Diosyá bendecisunki allin yachaywan ruwasqaykimanta. Kunanmi harkaykuwanki vengakuspa runakunapa yawarnin chaq-chunaymanta.

³⁴Tayta Diosraykum, Israelpa Diosninraykum jurani, paymi harkaykuwan qamta ama imananaypaq. Sichum ñoqawan tupanaykipaq mana utqayman hamuwaqchu karqa, hinaptinqa Nabalpa llapallan runankunaqa manañam paqarinqa chullapas kawsanmankuñachu karqa, nispa.

³⁵Abigailpa apamusqankunata chaskiykuspanñataqmi David nirqa: Hawkallañayá wasikiman kutikuy, kunanqa imam mañakuwasqaykitam uyariykuykiña, nispa.

³⁶Abigailmi wasinman kutispan qosan Nabalta tarirurqa rey hinaraq hatun convidota ruwaspa llumpay kusisqa hinaspa sinchi machasqa kachkaqta. Chayraykum paqarinnintinkama mana imatapas nirqachu.

³⁷Paqarinnintinpaq Nabal mallaqyaruptinmi warmin Abigail tukuy chaykunata willarqa. Chaymi Nabal hukmanyaruspan kaskitakururqa.

³⁸Chunka punchawmantam Nabalta Tayta Dios wañurachirqa.

³⁹Nabal wañurusqanta yacharuspanmi David nirqa: Tayta Diosyá yupaychasqa kachun, insultawasqanmanta Nabalta wañurachispan, imapas mana allin ruwanaymanta harkaykuwasqanmanta. Tayta Diosmi Nabalman mana allin ruwasqankunata kutirachin, nispa. Chaymantam Abigailwan casarakuyta munaspa runankunata kacharqa rimapayamunankupaq.

⁴⁰Davidpa serviqninkunam Carmel lawman rispanku Abigailta kaynata rimapayarqaku: Davidmi qanwan casarakuyta munan, nispanku.

⁴¹Chaymi qonqoranpa kumuykuspan Abigail nirqa: Kayqayá kaypi kachkani señorniypa serviqninkunapa chakin mayllanaypaq, nispa.

⁴²Chaynata nispam utqayllamanña alistakuruspa, pichqa criadankunawan kuska Davidpa runankunata asnopi sillakuykuspan qatirqa, hinaspam paywan casarakurqa.

⁴³Davidqa casarakurqataqmi Jezreel llaqtayuq Ahinoamwanpas, chaynapim Iskayninku warminkuna karqaku.

⁴⁴Davidpa warmin Micaltam taytan Saúl Galim llaqtayuq Laispa churin Paltiman qoykurqa.