Read CHUYA QELLQA La Biblia en Quechua de Ayacucho 2012 1~Samuel 29 Bible Online

1~Samuel 29 - CHUYA QELLQA La Biblia en Quechua de Ayacucho 2012 bible

1~Samuel 29

¹Filistea tropakunam Afec llaqtapi huñunakururqaku, Israel tropakunañataqmi campamentonkuta sayachirqaku Jezreel law pukyupa kasqanpi.

²Filistea soldadokuna tropa-tropa riptinkum, paykunapa qepantañataq Davidqa runankunapiwan rirqa rey Aquiswan kuska.

³Hinaptinmi filisteokunapa kamachiqninkuna rey Aquista tapurqaku: ¿Imatataq wak hebreo runakuna kaypi ruwachkanku? nispanku. Chaymi rey Aquis nirqa: Israelpa reynin Saulpa yanapaqnin Davidmi, payqa unayñam ñoqawan yachan. Tupasqayku punchawmantapunim paypiqa mana imatapas tarirqanichu, nispa.

⁴Hinaptinmi filisteokunapa kamachiqninkuna piñakuspanku rey Aquista nirqaku: Chaynaqa, qosqayki allpaman kutinanpaq kamachiy, manam munanikuchu ñoqaykuwan guerraman rinanta; yanqañataq peleachkaptinchik enemigonchik rikurirunman. Payqa reyninwan allinyanakuyta munaspaqa soldadonchikunapa umanta aparikuspam kutirunman.

⁵Kay Davidmantam warmikunapas tususpa takirqaku: “Saulmi waranqa soldadokunata wañurachimun, Davidñataqmi chunka waranqata wañurachimun”, nispanku.

⁶Chaymi Davidta rey Aquis nirqa: ¡Tayta Diosraykum niki, qamqa mana engañakuq allin qari kasqaykita! Campamen-toykupi allin qawachikusqaykim gustoypaq karqa. Chayamusqayki punchawmantapas qampiqa manam ima pantaytapas tarirqanichu. Ichaqa kamachikuqkunapaqmi mana sonqonkupaq hinachu kanki.

⁷Chaynaqa, David hawkalla kutikuy, chaynapi filis-teokunapa kamachiqninkunata ama piñachinaykipaq, nispa.

⁸Hinaptinmi rey Aquista David nirqa: Reynilláy, ¿imatataq ruwaruni? ¿Ima mana allin ruwasqaytataq kay serviqnikipi tarirunki? ¿Imanasqataq enemigoykikunawan peleanayta mana munankichu? nispa.

⁹Chaymi rey Aquisñataq nirqa: Ñoqaqa yachanim qamqa Diospa angelnin hina allin runa kasqaykita; ichaqa filisteokunapa kamachiqninkunam mana munankuchu ñoqaykuwan guerraman rinaykita.

¹⁰Chaynaqa, David, soldadoykikunapiwan kuska paqarin tutapayta kutikuychik, nispa.

¹¹Hinaptinmi Davidqa runankunapi-wan tutapayta hatarispanku filisteokunapa llaqtanman kutikurqaku, Filistea tropakunañataqmi Jezreel llaqtaman rirqaku.