Read Библия Церковнославянская Бытїѐ 11 Bible Online

Бытїѐ 11 - Библия Церковнославянская bible

Бытїѐ 11

¹И҆ бѣ̀ всѧ̀ землѧ̀ ѹ҆стнѣ̀ є҆ди҄нѣ, и҆ гла́съ є҆ди́нъ всѣ҄мъ.

²И҆ бы́сть внегда̀ поитѝ и҆̀мъ ѿ востѡ́къ, ѡ҆брѣто́ша по́ле въ землѝ сеннаа́рстѣй и҆ всели́шасѧ та́мѡ.

³И҆ речѐ человѣ́къ бли́жнемѹ своемѹ̀: прїиди́те, сотвори́мъ плї҄нѳы и҆ и҆спече́мъ и҆̀хъ ѻ҆гне́мъ. И҆ бы́сть и҆̀мъ плі́нѳа въ ка́мень, и҆ бре́нїе вмѣ́стѡ мѣ́ла.

⁴И҆ реко́ша: прїиди́те, сози́ждемъ себѣ̀ гра́дъ и҆ сто́лпъ, є҆гѡ́же ве́рхъ бѹ́детъ да́же до небесѐ: и҆ сотвори́мъ себѣ̀ и҆́мѧ, пре́жде не́же разсѣ́ѧтисѧ на́мъ по лицѹ̀ всеѧ̀ землѝ.

⁵И҆ сни́де гдⷭь ви́дѣти гра́дъ и҆ сто́лпъ, є҆го́же созида́ша сы́нове человѣ́честїи.

⁶И҆ речѐ гдⷭь: сѐ, ро́дъ є҆ди́нъ, и҆ ѹ҆стнѣ̀ є҆ди҄нѣ всѣ́хъ, и҆ сїѐ нача́ша твори́ти: и҆ нн҃ѣ не ѡ҆скѹдѣ́ютъ ѿ ни́хъ всѧ҄, є҆ли҄ка а҆́ще восхотѧ́тъ твори́ти.

⁷Прїиди́те, и҆ соше́дше смѣси́мъ та́мѡ ѧ҆зы́къ и҆́хъ, да не ѹ҆слы́шатъ кі́йждо гла́са бли́жнѧгѡ (своегѡ̀).

⁸И҆ разсѣ́ѧ и҆̀хъ ѿтѹ́дѹ гдⷭь по лицѹ̀ всеѧ̀ землѝ: и҆ преста́ша зи́ждѹще гра́дъ и҆ сто́лпъ.

⁹Сегѡ̀ ра́ди нарече́сѧ и҆́мѧ є҆гѡ̀ [смѣше́нїе], ѩ҆́кѡ та́мѡ смѣсѝ гдⷭь ѹ҆стна̀ всеѧ̀ землѝ, и҆ ѿтѹ́дѹ разсѣ́ѧ и҆̀хъ гдⷭь по лицѹ̀ всеѧ̀ землѝ.

¹⁰И҆ сїѧ҄ бытїѧ҄ си́мѡва: и҆ бѧ́ше си́мъ сы́нъ ста̀ лѣ́тъ, є҆гда̀ родѝ а҆рфаѯа́да, во второ́е лѣ́то по пото́пѣ:

¹¹и҆ поживѐ си́мъ, повнегда̀ роди́ти є҆мѹ̀ а҆рфаѯа́да, лѣ́тъ пѧ́ть сѡ́тъ и҆ родѝ сы́ны и҆ дщє́ри: и҆ ѹ҆́мре.

¹²И҆ поживѐ а҆рфаѯа́дъ лѣ́тъ сто̀ три́десѧть пѧ́ть и҆ родѝ каїна́на:

¹³и҆ поживѐ а҆рфаѯа́дъ, повнегда̀ роди́ти є҆мѹ̀ каїна́на, лѣ́тъ три́ста три́десѧть и҆ родѝ сы́ны и҆ дщє́ри: и҆ ѹ҆́мре. И҆ поживѐ каїна́нъ лѣ́тъ сто̀ три́десѧть и҆ родѝ салѹ̀: и҆ поживѐ каїна́нъ, повнегда̀ роди́ти є҆мѹ̀ салѹ̀, лѣ́тъ три́ста три́десѧть и҆ родѝ сы́ны и҆ дщє́ри: и҆ ѹ҆́мре.

¹⁴И҆ поживѐ сала̀ лѣ́тъ сто̀ три́десѧть и҆ родѝ є҆ве́ра:

¹⁵и҆ поживѐ сала̀, повнегда̀ роди́ти є҆мѹ̀ є҆ве́ра, лѣ́тъ три́ста три́десѧть и҆ родѝ сы́ны и҆ дщє́ри: и҆ ѹ҆́мре.

¹⁶И҆ поживѐ є҆ве́ръ лѣ́тъ сто̀ три́десѧть четы́ри и҆ родѝ фале́ка:

¹⁷и҆ поживѐ є҆ве́ръ, повнегда̀ роди́ти є҆мѹ̀ фале́ка, лѣ́тъ три́ста се́дмьдесѧтъ и҆ родѝ сы́ны и҆ дщє́ри: и҆ ѹ҆́мре.

¹⁸И҆ поживѐ фале́къ лѣ́тъ сто̀ три́десѧть и҆ родѝ рага́ва:

¹⁹и҆ поживѐ фале́къ, повнегда̀ роди́ти є҆мѹ̀ рага́ва, лѣ́тъ двѣ́стѣ де́вѧть и҆ родѝ сы́ны и҆ дщє́ри: и҆ ѹ҆́мре.

²⁰И҆ поживѐ рага́въ лѣ́тъ сто̀ три́десѧть два̀ и҆ родѝ серѹ́ха:

²¹и҆ поживѐ рага́въ, повнегда̀ роди́ти є҆мѹ̀ серѹ́ха, лѣ́тъ двѣ́стѣ се́дмь и҆ родѝ сы́ны и҆ дщє́ри: и҆ ѹ҆́мре.

²²И҆ поживѐ серѹ́хъ лѣ́тъ сто̀ три́десѧть и҆ родѝ нахѡ́ра:

²³и҆ поживѐ серѹ́хъ, повнегда̀ роди́ти є҆мѹ̀ нахѡ́ра, лѣ́тъ двѣ́стѣ и҆ родѝ сы́ны и҆ дщє́ри: и҆ ѹ҆́мре.

²⁴И҆ поживѐ нахѡ́ръ лѣ́тъ се́дмьдесѧтъ де́вѧть и҆ родѝ ѳа́ррѹ:

²⁵и҆ поживѐ нахѡ́ръ, повнегда̀ роди́ти є҆мѹ̀ ѳа́ррѹ, лѣ́тъ сто̀ два́десѧть де́вѧть и҆ родѝ сы́ны и҆ дщє́ри: и҆ ѹ҆́мре.

²⁶И҆ поживѐ ѳа́рра лѣ́тъ се́дмьдесѧтъ и҆ родѝ а҆вра́ма и҆ нахѡ́ра и҆ а҆рра́на.

²⁷Сїѧ҄ же бытїѧ҄ ѳа́рры: ѳа́рра родѝ а҆вра́ма и҆ нахѡ́ра и҆ а҆рра́на. А҆рра́нъ же родѝ лѡ́та:

²⁸и҆ ѹ҆́мре а҆рра́нъ пред̾ ѳа́ррою ѻ҆тце́мъ свои́мъ въ землѝ, въ не́йже роди́сѧ, въ странѣ̀ халде́йстѣй.

²⁹И҆ поѧ́ста а҆вра́мъ и҆ нахѡ́ръ себѣ̀ жєны̀: и҆ и҆́мѧ женѣ̀ а҆вра́мли са́ра, и҆ и҆́мѧ женѣ̀ нахѡ́ровѣ ме́льха, дщѝ а҆рра́нѧ: се́й є҆́сть ѻ҆те́цъ ме́льхинъ и҆ ѻ҆те́цъ є҆́схинъ.

³⁰Бѧ́ше же са́ра непло́ды и҆ не ражда́ше дѣте́й.

³¹И҆ поѧ́тъ ѳа́рра а҆вра́ма сы́на своего̀ и҆ лѡ́та сы́на а҆рра́нѧ, сы́на сы́на своегѡ̀, и҆ са́рѹ снохѹ̀ свою̀, женѹ̀ а҆вра́ма сы́на своегѡ̀: и҆ и҆зведѐ ѧ҆̀ и҆з̾ землѝ халде́йскїѧ и҆тѝ на зе́млю ханаа́нскѹ: и҆ прїидо́ша да́же до харра́на и҆ всели́шасѧ та́мѡ.

³²Бы́ша же всѝ дні́е ѳа҄ррины въ землѝ харра́ни лѣ́тъ двѣ́стѣ пѧ́ть: и҆ ѹ҆́мре ѳа́рра въ харра́нѣ.